លោកស្រី ស៊ីចាន់ ភិនប៊ុនទៀង តំណាងពាណិជ្ជករថៃ២៤នាក់ បានថ្លែងនៅព្រឹកថ្ងៃច័ន្ទ ទី១៧ ខែវិច្ឆិកាថា ទំនិញចំនួន៣៨ប្រភេទគឺជាសម្ភារៈប្រើប្រាស់ត្រូវបានមន្ត្រីគយនៅច្រកទ្វារអន្តរជាតិប៉ោយប៉ែត ហាមឃាត់ដោយសំអាងថា ទំនិញទាំងនោះមិនស្របតាមនីតិវីធីនៃការយកពន្ធ ៖ «៣៨មុខ ២៤នាក់ ម្នាក់បន្តិចៗ ទៅដល់ចូលបង់តែម្ដងទៅ ម៉េចចាំបាច់រត់ការមុន? គេថា អីវ៉ាន់របស់ខ្ញុំខុសច្បាប់ អត់មានអត្រាបង់ពន្ធ គេមិនចេះបង់ពន្ធទេ»។
លោកស្រីបានបន្តថា គយខ្មែរបានបដិសេធមិនព្រមយកពន្ធតាមមុខផលិតផលនីមួយៗរបស់ពាណិជ្ជករថៃទាំង២៤នាក់ទេ ប៉ុន្តែបានបង្ខំឲ្យលោកស្រីបង់ប្រាក់ ៣៥ម៉ឺនបាតតម្កល់ ហើយជំរុញឲ្យមានការបញ្ជាក់មុខទំនិញពីទីចាត់ការគយនៅក្រុងភ្នំពេញ។
លោកស្រី ស៊ីចាន់ ភិនប៊ុនទៀង បានបញ្ជាក់ថា គយខ្មែរម្នាក់បានប្រាប់ថា រាល់ផលិតផលទាំង៣៨មុខ ដែលលោកស្រីបាននាំចូលកន្លងទៅនោះ គេអាចយកពន្ធបាន ប៉ុន្តែមន្រ្តីគយខ្មែរនៅទីនោះមិនអនុវត្ត ៖ «គាត់មកសុំមើលដឺម៉ង់ខ្ញុំ មើលរួចគាត់ក៏ថា ភ្នាក់ងារគយហ្នឹងធ្វើការខុសទាំងអស់ ការពិតទំនិញហ្នឹងអាចបង់ពន្ធបាន ប៉ុន្តែមិនព្រមបង់ពន្ធឲ្យខ្ញុំ ដើម្បីគាបសង្កត់ខ្ញុំស៊ីលុយក្រៅ»។
លោក ភូនសាវ៉ាត់ លេខារបស់លោកស្រី ជារ៉ាណាន់ បូមង្គល អគ្គទីប្រឹក្សាផ្នែកពាណិជ្ជកម្មនៃស្ថានទូតថៃប្រចាំកម្ពុជាបានថ្លែងថា បញ្ហានេះគឺក្រុមពាណិជ្ជករថៃមិនមានឯកសារគ្រប់គ្រាន់ក្នុងការនំាទំនិញចូលកម្ពុជា ៖ «យើងបានបញ្ជូនលិខិតមួយច្បាប់ទៅឲ្យខាងពាណិជ្ជកម្មថៃហើយ ដើម្បីឲ្យសម្របសម្រួលជាមួយគយនៅប៉ោយប៉ែត»។
ទោះជាយ៉ាងនេះក្តី មន្ត្រីគយសុំមិនបញ្ចេញឈ្មោះនៅច្រកទ្វារអន្តរជាតិប៉ោយប៉ែត បានថ្លែងថា ពួកគេបានអនុវត្តតាមច្បាប់ ហើយថា សាខាគយនៅប៉ោយប៉ែត អាចយកពន្ធនាំចូលលើមុខទំនិញត្រឹមតែ ៣០០ដុល្លារ ហើយបើលើសពីចំនួននេះត្រូវឆ្លងកាត់ទីចាត់ការគយនៅទីក្រុងភ្នំពេញជាមុនសិន ៖ «អាហ្នឹង បើសិនគាត់រត់ការពីទីចាត់ការមក គាត់យកឯកសារមកខាងខ្ញុំហ្នឹង ខាងខ្ញុំអនុវត្តតាមការសម្រេចរបស់ទីចាត់ការ។ បង់ពន្ធតាមធម្មតា អត់មានធ្វើអីគាត់ផង»។
គួរបញ្ជាក់ថា កាលពីថ្ងៃទី៧ ខែវិច្ឆកាកន្លងទៅនេះ ពាណិជ្ជករថៃចំនួន២៤នាក់ មកពីខែត្រក្រុង៤ គឺខែត្រត្រាត ចាន់បូរី ស្រះកែវ និងក្រុងឈាងម៉ៃ បាននាំផលិតផលចំនួន ៣៨ប្រភេទរបស់ថៃ ចូលដាក់តាំងលក់នៅក្នុងពិធីតាំងពិព័រណ៍មួយនៅក្រុងសៀមរាប៕