កាសែតបាងកកប៉ុស្ដិ៍បានដកស្រង់សម្ដីរបស់អ្នកនាំពាក្យក្រសួងការបរទេសថៃ ផានិច វិគីសិត ដែលបាននិយាយថា អតីតនាយករដ្ឋមន្រ្តីថៃរូបនេះត្រូវបានប្រទេសអារ៉ាប់រួមអេមីរ៉េត ស្នើឲ្យចាកចេញពីប្រទេសនេះ ដោយថា លោក ថាក់ស៊ីន បានរំលោភលើកិច្ចព្រមព្រៀងថា មិនយកប្រទេសនេះធ្វើជាមូលដ្ឋានក្នុងការធ្វើសកម្មភាពនយោបាយ។
ទន្ទឹមគ្នានេះដែរ មានសេចក្ដីរាយការណ៍មួយចំនួនសរសេរថា លោក ថាក់ស៊ីន បានចេញពីប្រទេសអារ៉ាប់រួមអេមីរ៉េតហើយ ហើយធ្វើដំណើរទៅក្រុងសៀមរាប នៃប្រទេសកម្ពុជា។
លោក កុយ គួង មន្រ្តីអ្នកនាំពាក្យក្រសួងការបរទេសកម្ពុជា មិនបានបដិសេធដំណឹងនេះទេ ក៏ប៉ុន្តែលោកមានប្រសាសន៍ថា ខ្លួនលោកផ្ទាល់ លោកមិនបានទទួលដំណឹងនេះសោះ។
លោក កុយ គួង មានប្រសាសន៍ដូច្នេះ ៖ «មិនទាន់បានទទួលព័ត៌មានហ្នឹងផង អត់ទាន់បានទទួលព័ត៌មានថា គាត់មកខេត្តសៀមរាបផង។ និយាយចំពោះរូបខ្ញុំផ្ទាល់ គឺខ្ញុំអត់បានទទួលព័ត៌មានហ្នឹងទេ»។
ចំណែកលោក ថាក់ស៊ីន ខ្លួនឯងផ្ទាល់ត្រូវបានកាសែតបាងកកប៉ុស្ដិ៍ ដកស្រង់សម្ដីថា ដំណឹងថា មានការបណ្ដេញលោកចេញពីប្រទេសអារ៉ាប់រួមអេមីរ៉េត និងលោកធ្វើដំណើរទៅខេត្តសៀមរាប ប្រទេសកម្ពុជា មិនពិតទេ។ លោកបន្តថា ពេលនេះលោកកំពុងស្នាក់នៅប្រទេសអារ៉ាប់រួមអេមីរ៉េតនៅឡើយ តែលោកគ្រោងនឹងធ្វើដំណើរទៅប្រទេសអាល្លឺម៉ង់៕