លោក ឈូក អាង មេបញ្ជាការនៃវរសេនាតូចការពារព្រំដែនលេខ៩១១ បានមានប្រសាសន៍នៅថ្ងៃនេះថា ប្រទេសថៃ ដាក់ពង្រាយកងទាហានឈុតខ្មៅ និងកងទ័ពឯកសណ្ឋានទាហានប៉ារ៉ាជាច្រើនរយនាក់ និងមានយន្តហោះប្រចាំការ ៤គ្រឿងនោះ គឺដើម្បីការពារសន្តិសុខ ខណៈដែលកូនស្ដេចថៃ មួយអង្គចុះទៅកាន់តំបន់នោះ។
លោក ឈូក អាង មានប្រសាសន៍ដូច្នេះ ៖ «គេការពារស្ដេចគេមក នៅភូមិគោកធ្យូង ចម្ងាយ៥គីឡូពីព្រំដែន។ ប្អូន សុរិនថន។ មិនមានអីទេ គេមិនប៉ះពាល់យើងទេ គេមានយន្តហោះ ៤គ្រឿង ហោះចុះឡើងៗ ប៉ុន្តែគេមិនហោះចូលដីយើងទេ គេប្រាប់យើង គេប្រាប់ប៉ុស្តិ៍របស់យើងខាងជួរមុខ»។
លោកឧត្ដមសេនីយ៍ត្រី ហ៊ុន ហ៊ាន ស្នងការនគរបាលខេត្តបន្ទាយមានជ័យ បានមានប្រសាសន៍បញ្ជាក់ថា ភាគីថៃ ដាក់កងកម្លាំងពង្រាយនៅតាមព្រំដែននោះ គឺគ្រាន់តែជាការការពារសន្តិសុខរបស់បុត្រីទី៤ មួយអង្គ របស់ស្ដេចថៃ ព្រះនាម ជូឡាផន ឡា ឡៃ ឡាក់ តែប៉ុណ្ណោះ មិនមានអ្វីប៉ះពាល់ដល់បញ្ហាសន្តិសុខនៅតាមព្រំដែនឡើយ។
លោក ហ៊ុន ហ៊ាន មានប្រសាសន៍ថា ៖ «គាត់ចុះមកសួរសុខទុក្ខកូនចៅរបស់គាត់ អត់មានអីផង ខាងកងកម្លាំងគាត់ក៏បានជូនដំណឹងឲ្យគ្នាទៅវិញទៅមកដែរ។ ព្រឹកមិញនេះខ្ញុំបានទៅដល់ព្រំដែនដែរ មានយន្តហោះអីចុះមែន»។
ប្រភពពីអាជ្ញាធរខ្មែរបានឲ្យដឹងទៀតថា ការដាក់កងកម្លាំងប្រដាប់អាវុធរបស់ភាគីថៃ នៅតាមខ្សែក្រវាត់ព្រំដែន ក្នុងខេត្តស្រះកែវ ជាប់ខេត្តបន្ទាយមានជ័យនេះ អាចនឹងបន្តរហូតដល់ថ្ងៃទី៣០ និង៣១ ខែសីហា ឆ្នាំ២០១០ ខាងមុខនេះទៀត ព្រោះថា ការទទួលដំណឹងពីភាគីថៃ ដែលបានផ្ដល់ឲ្យអាជ្ញាធរខ្មែរ គឺម្ចាស់ក្សត្រិយ៍ សុរិន ថន មួយអង្គផ្សេងទៀត នឹងយាងចុះទៅសួរសុខទុក្ខប្រជាពលរដ្ឋថៃ នៅតំបន់នោះថែមទៀត៕