ឧបនាយករដ្ឋមន្ត្រីថៃនឹងមកចូលរួមពិធីសម្ពោធផ្លូវនៅកម្ពុជា

ដោយ ឡេង ម៉ាលី

2009-07-03

មន្រ្តីក្រសួងការបរទេសខ្មែរបានថ្លែងឲ្យដឹងថា ឧបនាយករដ្ឋមន្ត្រីថៃ លោក ស៊ុធេប ធឿកស៊ុបាន់ នឹងធ្វើដំណើរមកកាន់ប្រទេសកម្ពុជាជាថ្មីទៀតនៅថ្ងៃស្អែកនេះដើម្បីចូលរួមពិធីសម្ពោធផ្លូវមួយដែលស្ថាបនាដោយប្រាក់កម្ចីរបស់រដ្ឋាភិបាលថៃ។

លោក ស៊ុធេប ធឿកស៊ុបាន់ ធ្លាប់មកទស្សនកិច្ចប្រទេសកម្ពុជាកាលពីថ្ងៃសៅរ៍កន្លងទៅនេះក្នុងកិច្ចពិភាក្សាមួយជាមួយលោកនាយករដ្ឋមន្រ្តី ហ៊ុន សែន ជុំវិញជម្លោះព្រំដែននៅតំបន់ប្រាសាទព្រះវិហារនោះ។

លោក កុយ គួង អ្នកនាំពាក្យក្រសួងការបរទេសបានមានប្រសាសន៍ប្រាប់វិទ្យុអាស៊ីសេរីថា ក្រៅពីការមកចូលរួមក្នុងពិធីសម្ពោធផ្លូវនោះ លោកមិនមានព័ត៌មានថា ឧបនាយករដ្ឋមន្ត្រីថៃ នឹងអាចជជែកបញ្ហាអ្វីខ្លះទៀតទេជាមួយនឹងនាយករដ្ឋមន្រ្តីខ្មែរនោះ។

លោក កុយ គួង បានមានប្រសាសន៍ថា ៖ «តាមកំណត់លោកនឹងអញ្ជើញចូលរួមនៅវេលាថ្ងៃស្អែកគឺថ្ងៃទី៤ ពិធីសម្ពោធផ្លូវលេខ៦៧ ជាមួយសម្ដេចតេជោ នាយករដ្ឋមន្ត្រី មានន័យថា កម្ចីសម្បទានពីរដ្ឋាភិបាលថៃ»។

ផាន សូផាត ៖ ប៉ុន្តែក្រៅពីការសម្ពោធហ្នឹងអាចមានគម្រោងនឹងពិភាក្សាអ្វីផ្សេងទៀតដែរឬទេ? កុយ គួង ៖ ជាផ្លូវការដូចអត់មានទេ។

យោងតាមការផ្សាយរបស់ទីភ្នាក់ងារសារព័ត៌មានថៃ ធីអិនអេ (TNA) បានដកស្រង់សម្ដីលោកឧបនាយករដ្ឋមន្ត្រីថៃ លោក ស៊ុធេប ធឿកស៊ុបាន់ និយាយថា ប្រទេសថៃនិងកម្ពុជាបានព្រមព្រៀងគ្នាក្នុងការកាត់បន្ថយកងទ័ពនៅតំបន់ព្រំដែនក្បែរប្រាសាទព្រះវិហារចាប់ពីថ្ងៃសុក្រនេះហើយ។

លោក ស៊ុធេប ធឿកស៊ុបាន់ បានបញ្ជាក់ថា ការអនុវត្តនេះបានធ្វើឡើងតាមការព្រមព្រៀងក្នុងកិច្ចពិភាក្សរបស់លោកជាមួយនឹងលោកនាយករដ្ឋមន្រ្តី ហ៊ុន សែន នៅទីក្រុងភ្នំពេញដើម្បីបង្កើនបរិយាកាសល្អរវាងប្រទេសទាំងពីរ និងការបង្កើនសហប្រតិបត្តិការសេដ្ឋកិច្ច និងការទាក់ទងគ្នាកាន់តែល្អឡើងទៀត៕

បោះពុម្ព អ៊ីម៉េល

មតិ

អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។