បញ្ហាបា្រសាទព្រះវិហារខ្មែរធ្វើឲ្យរដ្ឋមន្ត្រីការបរទេសថៃលាលែងពីតំណែង
ដោយ ជា មករា
2008-07-10
រដ្ឋមន្ត្រីក្រសួងការបរទេសថៃ បានប្រកាសលាលែងពីមុខតំណែង កាលពីរសៀលថ្ងៃព្រហស្បតិ៍នេះ ជុំវិញបរាជ័យក្នុងការរារាំងប្រាសាទព្រះវិហារពីការដាក់បញ្ចូលជាសម្បត្តិភិភពលោកដោយភាគីកម្ពុជា ។
ប្រាសាទព្រះវិហារនៃព្រះរាជាណាចក្រកម្ពុជា ។
នៅក្នុងសន្និសីទកាសែតមួយនៅក្រសួងការបរទេសថៃនៅប៉ុន្មានម៉ោងមុននេះ លោក ណុបផាដុន បាតាម៉ា បានថ្លែងថា ការលាលែងតំណែងរបស់លោក គឺដោយសារលោកទ្រាំមិនបាននឹងសម្ពាធនៃការរិះគន់ពីប្រជាពលរដ្ឋនិងក្រុមអ្នកនយោបាយបក្សប្រឆាំងរបស់ថៃជុំវិញបរាជ័យក្នុងការរារាំងមិនឲ្យកម្ពុជា ដាក់ប្រាសាទព្រះវិហារជាសម្បត្តិបេតិកភណ្ឌពិភពលោកដោយអង្គការយូណេស្កួ ។
លោក ណុបផាដុន ថ្លែងការពារខ្លួនលោកនិងក្រសួងការបរទេសថៃថា លោកពិតជាបានធ្វើរឿងត្រឹមត្រូវមួយសម្រាប់ជាតិខ្លួននិងប្រទេសជិតខាងជុំវិញបញ្ហាប្រាសាទព្រះវិហារ ៖ «បងប្អូនជនរួមជាតិថៃជាទីស្នេហា ខ្ញុំមិនបានក្បត់ប្រទេសជាតិរបស់ខ្ញុំទេ ខ្ញុំស្រឡាញ់ប្រទេសជាតិដូចអ្នករាល់គ្នាដែរ ហើយខ្ញុំចង់បញ្ជាក់ថា ខ្ញុំមិនបានបំផ្លិចបំផ្លាញប្រទេសជាតិសោះឡើយ ដោយសារតែប្រទេសនេះមានសារសំខាន់ជាងមុខតំណែងរបស់ខ្ញុំទៅទៀត ។ ខ្ញុំសុំបង្ហាញអំពីស្មារតីនិងការទទួលរបស់ខ្ញុំក្នុងការលាលែងពីមុខតំណែងជារដ្ឋមន្ត្រីក្រសួងការបរទេសដែលនឹងមានប្រសិទ្ធភាពពីថ្ងៃទី១៤ កក្កដា នេះតទៅ» ។
លោក ណុបផាដុន នៅព្រឹកថ្ងៃព្រហស្បតិ៍នេះ បានវិលត្រលប់ពីទីក្រុងឡុងដ៍ ប្រទេសអង់គ្លេស បន្ទាប់ពីលោកបានចូលរួមក្នុងកិច្ចប្រជុំរបស់គណៈកម្មាធិការបេតិកភណ្ឌពិភពលោក នៅទីក្រុងកេបិច ប្រទេសកាណាដា ទីដែលប្រាសាទព្រះវិហារត្រូវបានសម្រេចដាក់បញ្ចូលជាសម្បត្តិបេតិកភណ្ឌពិភពលោក តាមសំណើរបស់កម្ពុជា កាលពីថ្ងៃទី៧ ខែកក្កដា ឆ្នាំ២០០៨ នេះ ។
លោក ណុបផាដុន បានត្រូវចោមរោមដោយបាតុករប្រឆាំងនឹងការដាក់បញ្ចូលប្រាសាទព្រះវិហារជាមរតកពិភពលោកតាមសំណើរបស់កម្ពុជា ចំនួន២០០នាក់ កាលពីព្រឹកមិញនេះ ។
នៅស្របពេលនឹងការប្រកាសលាលែងពីមុខតំណែងរបស់រដ្ឋមន្ត្រីការបរទេសថៃនេះ គណបក្សអ្នកប្រជាធិបតេយ្យរបស់ថៃ បានដាក់ពាក្យបណ្តឹងទៅព្រឹទ្ធសភាថៃ ដោយចោទប្រកាន់លោក ណុបផាដុន ថា លោកបានប្រញាប់ប្រញាល់ពេកក្នុងការព្រមព្រៀងឲ្យកម្ពុជាដាក់បញ្ចូលប្រាសាទព្រះវិហារជាមរតកពិភពលោក ។
គណបក្សប្រឆាំងថៃចោទលោក ណុបផាដុន ទៀតថា ការប្រញាប់ព្រមព្រៀងជាមួយកម្ពុជានេះ គឺដោយសារតែមានការដោះដូរផលប្រយោជន៍អ្វីមួយជាមួយគ្នា ៕
ឧបករណ៍រឿង
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
|
ចែករំលែករឿងនេះ |
អត្ថបទដែលទាក់ទង
ស្ថានការណ៍នៅតំបន់ព្រំដែនប្រាសាទព្រះវិហារ
ស្ថានការណ៍នៅតំបន់ក្បែរប្រាសាទព្រះវិហារមានសភាពធម្មតាវិញហើយ
ទាហានខ្មែរនិងថៃពើបប្រយុទ្ធគ្នាមួយប្រាវក្បែរប្រាសាទព្រះវិហារ
មន្ត្រីជាន់ខ្ពស់គ្រោងទៅទស្សនកិច្ចតំបន់ប្រាសាទព្រះវិហារ
កម្ពុជាបដិសេធការលើកឡើងរបស់ក្រសួងការបរទេសថៃពីរឿងព្រះវិហារ
មន្ត្រីខ្មែរ៖ ការលុបចោលសេចក្តីប្រកាសរួមកម្ពុជាថៃមិនមានផលប៉ះពាល់អ្វីទេ
មេបញ្ជាការយោធាខ្មែរព្រមានថៃជុំវិញការប៉ុនប៉ងរំលោភចូលដីខ្មែរ
មន្រ្តីខ្មែរ៖ ស្ថានការណ៍នៅតំបន់ព្រំដែនខ្មែរ-ថៃមានសភាពស្ងប់ស្ងាត់
មេបញ្ជាការខ្មែរ-ថៃគ្រោងជួបប្រជុំគ្នាដើម្បីបន្ធូរបន្ថយភាពតានតឹង
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
មើលមតិទាំងអស់.