ក្រសួងការបរទេសថៃ ទទូចសុំដល់រាជរដ្ឋាភិបាលកម្ពុជា អនុញ្ញាតឲ្យក្រុមហ៊ុនត្រួតពិនិត្យជើងយន្តហោះហោះហើរនៅកម្ពុជា ដែលហៅកាត់ជាភាសាអង់គ្លេសថា (CATS) ឲ្យបុគ្គលិកខ្លួនជាជនជាតិថៃចំនួន៩នាក់ ចូលបំពេញការងារជាធម្មតាឡើងវិញ ក្នុងការត្រួតពិនិត្យមើលការខុសត្រូវលើចរាចរណ៍ហោះហើររបស់យន្តហោះគ្រប់ប្រភេទនៅព្រលានយន្តហោះអន្តរជាតិភ្នំពេញ។
កាសែតថៃបាងកកប៉ុស្តិ៍ផ្សាយពីថ្ងៃ១៩ វិច្ឆិកា បានឲ្យដឹងថា លោក កាស៊ិត ភិរមយ៉ា (Kasit Piromya) រដ្ឋមន្ត្រីការបរទេសថៃ បានថ្លែងថា កម្ពុជាត្រូវអនុវត្តនូវគោលការណ៍ក្នុងកិច្ចព្រមព្រៀងពាណិជ្ជកម្មរបស់ខ្លួនជាមួយក្រុមហ៊ុន Samart Corporation ហើយទង្វើណាមួយប្រឆាំងនឹងបុគ្គលិកក្រុមហ៊ុននិងក្រុមហ៊ុន គឺត្រូវតែធ្វើឡើងទៅតាមច្បាប់វិនិយោគទុនបរទេស ដែលបានចុះកុងត្រាជាមួយរដ្ឋាភិបាលកម្ពុជា ចំនួន៣២ឆ្នាំ ចាប់ពីឆ្នាំ២០០១ ដល់ឆ្នាំ២០៣៣។
សូមជម្រាបជូនថា កាលពីថ្ងៃព្រហស្បតិ៍(១៩ វិច្ឆិការ)នេះ កម្ពុជាបានហាមមិនឲ្យបុគ្គលិកសញ្ជាតិថៃ ដែលបំពេញការងារនៅក្រុមហ៊ុនត្រួតពិនិត្យជើងយន្តហោះហោះហើរចូលធ្វើការទេ ក្រោយពីមានការចាប់ខ្លួនបុរសជនជាតិថៃមួយរូប ជាបុគ្គលិកក្រុមហ៊ុននោះ និងក្រោយពីបានត្រូវចោទប្រកាន់ពីបទធ្វើចារកម្មលួចព័ត៌មានសម្ងាត់ ប៉ះពាល់ដល់សន្តិសុខជាតិ៕