កិច្ចប្រជុំ​បន្ទាន់​របស់​មេ​ដឹកនាំ​ថៃ​នោះ​ធ្វើ​ឡើង​នៅ​បន្ទាប់​ពី​រដ្ឋាភិបាល​កម្ពុជា​បាន​បដិសេធ​សំណើ​ជា​ផ្លូវការ​របស់​រដ្ឋាភិបាល​ថៃ​ដែល​ស្នើ​ឲ្យ​កម្ពុជា​ចាប់ លោក ថាក់ស៊ីន ឈីនណាវ៉ាត្រ (Thaksin Shinawatra) អតីត​នាយក​រដ្ឋមន្រ្តី​ថៃ ដែល​តុលាការ​ថៃ​កំណត់​ថា​មាន​ទោស​ត្រូវ​ជាប់​ពន្ធនាគារ​២​ឆ្នាំ​ពី​បទ​ប្រព្រឹត្ត​អំពើ​ពុក​រលួយ​នោះ ថៃ​ស្នើ​ឲ្យ​ធ្វើ​បត្យាប័ន​បញ្ជូន​ទៅ​ឲ្យ​ថៃ​វិញ​ក្នុង​គ្រា​ដែល​លោក ថាក់ស៊ីន កំពុង​មាន​វត្តមាន​នៅ​ក្នុង​ប្រទេស​កម្ពុជា​នោះ។

កាសែត​បាងកក​ប៉ុស្តិ៍​ផ្សាយ​ឲ្យ​ដឹង​បន្ថែម​ថា អ្នក​សារព័ត៌មាន​ពុំ​ត្រូវ​បាន​ឲ្យ​ដឹង​ថា កិច្ច​ប្រជុំ​បន្ទាន់​របស់​មេ​ដឹកនាំ​ថៃ​នោះ​ជជែក​គ្នា​អំពី​បញ្ហា​អ្វី​ទេ ប៉ុន្តែ​គេ​គ្រាន់​តែ​បាន​ដឹង​ថា ក្រៅ​ពី​លោក​នាយក​រដ្ឋមន្រ្តី​ថៃ​និង​ឧប​នាយក​រដ្ឋមន្រ្តី​ថៃ គឺ​មាន​រដ្ឋមន្រ្តី​ក្រសួង​យុត្តិធម៌​និង​រដ្ឋមន្រ្តី​ក្រសួង​ថាមពល រួម​ទាំង​រដ្ឋមន្រ្តី​ទីស្តីការ​គណៈ​រដ្ឋមន្រ្តី​ថៃ​ក៏​បាន​ចូលរួម​ក្នុង​កិច្ច​ប្រជុំ​បន្ទាន់​នោះ​ដែរ។

នាយក​រដ្ឋមន្ត្រី​ថៃ៖ កិច្ច​សហ​ប្រតិបត្តិការ​រវាង​ថៃ​និង​កម្ពុជា​ត្រូវតែ​សើរើ

នៅ​បន្ទាប់​ពី​រដ្ឋាភិបាល​កម្ពុជា​បាន​បដិសេធ​ជា​ថ្មី​មិន​ព្រម​ធ្វើ​បត្យាប័ន​បញ្ជូន​លោក ថាក់ស៊ីន តាម​សំណើ​របស់​រដ្ឋាភិបាល​ថៃ គឺ​នាយក​រដ្ឋមន្រ្តី​ថៃ​បាន​ថ្លែង​តប​កាល​ពី​ថ្ងៃ​ពុធ ទី​១១ វិច្ឆិកា ថា កិច្ច​សហ​ប្រតិបត្តិការ​ទាំង​អស់​រវាង​ថៃ​និង​កម្ពុជា​ត្រូវតែ​សើរើ។

តែ​ទោះ​ជា​យ៉ាង​ណា​ក៏​ដោយ​រដ្ឋាភិបាល​ថៃ​ថា​នឹង​មិន​ប្រើ​អាវុធ​ប្រឆាំង​នឹង​កម្ពុជា​ទេ ហើយ​ថៃ​ក៏​មិន​បិទ​ព្រំដែន​ដែរ ប៉ុន្តែ​ថៃ​នឹង​បង្កើន​ការ​បង្អាក់​ទឹក​ចិត្ត​មិន​ឲ្យ​ពលរដ្ឋ​ថៃ​ចូល​ទៅ​លេង​ល្បែង​នៅ​តាម​កាស៊ីណូ​ដែល​ឋិត​នៅ​ក្នុង​ដែន​ដី​ខ្មែរ​ក្បែរ​ព្រំដែន​ថៃ។

ពលរដ្ឋ​ថៃ​៤៥​នាក់​ឆ្លង​ដែន​ចូល​ដី​ខ្មែរ​ដើម្បី​ជួប​ថាក់ស៊ីន

ទន្ទឹម​ពេល​ដែល​រដ្ឋាភិបាល​ថៃ​ចាត់​វិធានការ​ថ្មីៗ​ទប់ទល់​នឹង​កម្ពុជា​ដែល​កម្ពុជា​អនុញ្ញាត​ឲ្យ​លោក ថាក់ស៊ីន មាន​វត្តមាន​នៅ​ក្នុង​ទឹក​ដី​ខ្មែរ​នោះ គឺ​ពលរដ្ឋ​ថៃ​៤៥​នាក់​ដែល​ជា​មេ​ដឹកនាំ​តំណាង​ឲ្យ​ក្រុម​ពលរដ្ឋ​ថៃ​ដែល​ពាក់​អាវ​ក្រហម​ជា​សញ្ញា បាន​នាំ​គ្នា​ឆ្លង​ដែន​ចូល​ដី​ខ្មែរ​ដើម្បី​នឹង​ទៅ​ជួប​លោក ថាក់ស៊ីន នៅ​ខេត្ត​សៀមរាប។

កាសែត The Nation ផ្សាយ​ឲ្យ​ដឹង​បន្ថែម​ថា ក្រុម​តំណាង​ឲ្យ​ពលរដ្ឋ​ថៃ​ទាំង​៤៥​នាក់​នោះ​បាន​ឆ្លង​ដែន​នៅ​ច្រក​ព្រំដែន​ស៊ីសាកេត​ចូល​កម្ពុជា​តាំង​ពី​ម៉ោង​១​រសៀល​ថ្ងៃ​ទី​១១ ខែ​វិច្ឆិកា ឆ្នាំ​២០០៩ ដើម្បី​ទៅ​ជួប​លោក ថាក់ស៊ីន ព្រោះ​នៅ​ថ្ងៃ​ព្រហស្បតិ៍​នេះ លោក ថាក់ស៊ីន នឹង​មាន​វត្តមាន​នៅ​ក្នុង​ខេត្ត​សៀមរាប​ដែន​ដី​នៃ​ប្រទេស​កម្ពុជា។

ក្នុង​កិច្ច​សម្ភាសន៍​រួម​គ្នា​ផ្សាយ​តាម​ទូរទស្សន៍​ជាតិ​កម្ពុជា (ទទក) លោក ថាក់ស៊ីន ថ្លែង​ថា លោក​ចង់​ជួយ​ប្រជាពលរដ្ឋ​លោក​ណាស់ ប៉ុន្តែ​លោក​គិត​ថា បើ​ជួយ​អ្នក​ជិត​ខាង​របស់​លោក គឺ​ដូច​ជា​ជួយ​ប្រជាពលរដ្ឋ​របស់​លោក​ពី​ចម្ងាយ​ដូច្នោះ​ដែរ៕

មតិ

អ្នក​អាច​បញ្ចេញ​មតិ​ដោយ​បំពេញ​ទម្រង់​ខាង​ក្រោម​នេះ​ក្នុង​ទម្រង់​ជា​អក្សរ​សុទ្ធ។. មតិ​ត្រូវ​តែ​អនុញ្ញាត​ដោយ​អ្នក​សម្រប​សម្រួល​និង​មិន​បង្ហាញ​ភ្លាមៗ​នៅ​លើ​ទំព័រ​នេះ​ទេ។ សូម​អញ្ជើញ​ត្រឡប់​មក​បើក​ទំព័រ​នេះ​ម្ដង​ទៀត​ដើម្បី​មើល​ថា​តើ​មតិ​របស់​អ្នក​ត្រូវ​បាន​ចុះ​ផ្សាយ​ឬ​អត់។