លោកនាយករដ្ឋមន្ត្រីថៃបាននិយាយបែបនេះជាប្រតិកម្មតបទៅនឹងការប្រកាសរបស់លោកនាយករដ្ឋមន្ត្រី ហ៊ុន សែន ថា លោកនឹងតែងតាំងអតីតនាយករដ្ឋមន្ត្រីថៃ លោក ថាក់ស៊ីន ឈីនណាវ៉ាត្រ (Thaksin Shinawatra) ជាទីប្រឹក្សាសេដ្ឋកិច្ច និងរៀបចំលំនៅឋានមួយជូនលោក ថាក់ស៊ីន នៅកម្ពុជា។
លោក អាភីស៊ិត បានបន្តថា លោកនាយករដ្ឋមន្ត្រី ហ៊ុន សែន មិនគួរលើកយកបញ្ហាលោក ថាក់ស៊ីន ទៅនិយាយនៅក្នុងកិច្ចប្រជុំកំពូលអាស៊ាននោះទេ។ លោកនាយករដ្ឋមន្ត្រី ហ៊ុន សែន បានប្រដូចលោក ថាក់ស៊ីន ទៅនឹងអ្នកស្រី អង់សានស៊ូជី នៃប្រទេសភូមា។
លោកថា ហេតុអ្វីក៏មិនឲ្យគាត់និយាយពីលោក ថាក់ស៊ីន ដែលជាមិត្តរបស់គាត់បាន នៅពេលដែលគេគ្រប់គ្នាត្រូវបានអនុញ្ញាតឲ្យនិយាយពីអ្នកស្រី អង់សានស៊ូជី បាននោះ។
លោកនាយករដ្ឋមន្ត្រី ហ៊ុន សែន បានបញ្ជាក់ចំពោះសេចក្តីសម្រេចចិត្តរបស់លោកថា មិនជាការជ្រៀតជ្រែកកិច្ចការផ្ទៃក្នុងរបស់ប្រទេសថៃទេ តែជាសិទ្ធិនយោបាយរបស់កម្ពុជា៕