ការស្នើនេះបានធ្វើឡើងបន្ទាប់ពីប្រមុខរដ្ឋាភិបាលនៃប្រទេសទាំងពីរកម្ពុជានិងថៃបានប្រារព្ធពិធីត្រួតពលនៅឯក្រសួងការបរទេសនិងសហប្រតិបត្តិការអន្តរជាតិនៅព្រឹកថ្ងៃសុក្រ ទី១២ ខែមិថុនា ឆ្នាំ២០០៩ ខណៈដែលនាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់ អញ្ជើញមកបំពេញទស្សនកិច្ចជាផ្លូវការនៅប្រទេសកម្ពុជា។
ថ្លែងទៅកាន់ក្រុមអ្នកយកព័ត៌មានជាតិនិងអន្តរជាតិ ជំនួយការផ្ទាល់របស់លោកនាយករដ្ឋមន្ត្រី ហ៊ុន សែន លោក អៀង សុផល្លែត បានមានប្រសាសន៍ថា លោកនាយករដ្ឋមន្ត្រី ហ៊ុន សែន បានលើកឡើងនូវសំណើចំពោះភាគីថៃទាក់ទងនឹងជម្លោះទឹកដីព្រំដែនក្បែរប្រាសាទព្រះវិហារ។
លោក អៀង សុផល្លែត បានឲ្យដឹងថា ៖ «សូមឲ្យប្រើប្រាស់រាល់យន្តការដែលមានស្រាប់ដើម្បីយកមកចរចាដោះស្រាយ ចៀសវាងនូវបញ្ហាផ្ទុះអាវុធនៅតាមព្រំដែន ហើយក៏បានស្នើសុំឲ្យភាគីថៃជួយធ្វើយ៉ាងណាទប់ស្កាត់ដើម្បីកុំឲ្យបញ្ហាជម្លោះពីតំបន់មួយវារាលដាលទៅដល់ជម្លោះនៅតំបន់ផ្សេងៗទៀតនិងប៉ះពាល់ដល់វិស័យផ្សេងៗទៀត»។
មិនមានការបញ្ជាក់ណាមួយពីភាគីថៃទាក់ទងនឹងសំណើរបស់នាយករដ្ឋមន្រ្តីខ្មែរនេះភ្លាមៗទេ។
នៅក្នុងដំណើរទស្សនកិច្ចរបស់នាយករដ្ឋមន្រ្តីថៃនេះដែរ ប្រមុខរដ្ឋាភិបាលនៃប្រទេសទាំងពីរក៏បានពិភាក្សាផ្ដោតទៅលើការពង្រឹងនិងពង្រីកកិច្ចសហប្រតិបត្តិការក្នុងវិស័យទេសចរណ៍ ពាណិជ្ជកម្ម ការអភិវឌ្ឍហេដ្ឋារចនាសម្ព័ន្ធរួមមានការស្ថាបនាផ្លូវជាតិលេខ៦៨និងការស្ថាបនាវារីអគ្គិសនីនៅតំបន់ស្ទឹងមេទឹកក្នុងខេត្តកោះកុងផងដែរ។
នៅក្នុងជំនួបនេះដែរមានការប្រគល់ជូនដល់ភាគីកម្ពុជាវិញនូវវត្ថុបុរាណចំនួន៧ ក្នុងនោះមានរូបចម្លាក់ព្រះកេសទេវតាចំនួន១និងរូបចម្លាក់ក្បាលយក្សចំនួន៦ដែលនាំយកមកដោយប្រតិភូនាយករដ្ឋមន្ត្រីថៃ។
ឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ លោក ហោ ណាំហុង បានសម្ដែងនូវអំណរសាទរចំពោះការប្រគល់នេះ។
លោក ហោ ណាំហុង បានបញ្ជាក់ថា ៖ «រាជរដ្ឋាភិបាលកម្ពុជាពិតជាមានការរីករាយសប្បាយណាស់បានវត្ថុបុរាណខ្មែរចំនួន៧ដុំដែលត្រូវបានលួចនាំចេញពីប្រទេសកម្ពុជា»។
ទោះជាយ៉ាងណាក៏ដោយនៅពេលជាមួយគ្នានៃដំណើរទស្សនកិច្ចរបស់នាយករដ្ឋមន្រ្តីថៃនេះក៏មានក្រុមអ្នកតវ៉ាប្រឆាំងការឈ្លានពានរបស់ថៃនៅតំបន់ព្រំដែនក្បែរប្រាសាទព្រះវិហារដែលការតវ៉ានេះដឹកនាំដោយសហភាពសហជីពកម្ពុជា ប៉ុន្តែត្រូវបានអាជ្ញាធររារាំងមិនអាចឲ្យមានការប្រមូលផ្តុំនិងហែក្បួនបានឡើយ៕