ទាហាន​ថៃ​ម្នាក់​ស្លាប់​ដោយសារ​ជាន់​មីន​នៅ​តំបន់​ភ្នំ​ទ្រព្យ​ក្បែរ​បា្រសាទ​ព្រះវិហារ

ប្រភព​មន្ត្រី​យោធា​ថៃ​បាន​ឲ្យ​ដឹង​ថា ទាហាន​ឈុត​ខ្មៅ​ថៃ​ម្នាក់​បាន​ដើរ​ជាន់​មីន​បណ្តាល​ឲ្យ​ផ្ទុះ​ស្លាប់​នៅ​តំបន់​ភូម៉ាក់ខឿ ដែល​ខ្មែរ​ហៅ​ថា តំបន់​ភ្នំ​ទ្រព្យ កាល​ពី​រសៀល​ថ្ងៃ​អាទិត្យ​នេះ។
ដោយ ឃឹម សារ៉ង
2008-11-17
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ទាហាន​ថៃ​ដើរ​នៅ​ក្បែរ​ជំរំ​នៅ​ជិត​ប្រាសាទ​ព្រះវិហារ​ខ្មែរ​ កាល​ពី​​ថ្ងៃ​ទី​១៤ ខែ​វិច្ឆិកា ឆ្នាំ​២០០៨។
ទាហាន​ថៃ​ដើរ​នៅ​ក្បែរ​ជំរំ​នៅ​ជិត​ប្រាសាទ​ព្រះវិហារ​ខ្មែរ​ កាល​ពី​​ថ្ងៃ​ទី​១៤ ខែ​វិច្ឆិកា ឆ្នាំ​២០០៨។
RFA/Hang Savyouth

មន្ត្រី​យោធា​ផ្នែក​ព័ត៌មាន​នៃ​កង​ទ័ព​ភូមិ​ភាគ​ទី​២​របស់​ថៃ លោក​វរសេនីយ៍ វិជិត ម៉ាការុន បាន​ប្រាប់​វិទ្យុ​អាស៊ីសេរី​ថា ទាហាន​ឈុត​ខ្មៅ​ថៃ​មួយ​រូប ឈ្មោះ វីរ៉ាយុត កាន់សាន បាន​បាត់​បង់​ជីវិត​ភ្លាមៗ ដោយសារ​ការ​ដើរ​ជាន់​គ្រាប់​មីន​ដែល​បង្កប់​ទុក​ក្នុង​ដី​នៅ​តំបន់​ភូម៉ាក់ខឿ ភាគ​ខាង​លិច​ប្រាសាទ​ព្រះវិហារ។

ប្រភព​បន្ត​ថា ការ​ផ្ទុះ​មីន​នោះ​កើត​ឡើង​នៅ​ខណៈ​ដែល​ទាហាន​ថៃ​រូប​នោះ​កំពុង​ដើរ​ល្បាត​នៅ​តំបន់​ភូម៉ាខឿ ដែល​កម្ពុជា​ហៅ​ថា​តំបន់​ភ្នំទ្រព្យ ប៉ុន្តែ​ប្រភព​នៅ​មិន​ទាន់​អាច​បញ្ជាក់​អំពី​ប្រភេទ​នៃ​គ្រាប់​មីន​នោះ​បាន​នៅ​ឡើយ​ទេ។

អ្នក​នាំ​ពាក្យ​ក្រសួង​ការបរទេស​ថៃ លោក ថារិត ចារុងវ៉ាត់ បាន​មាន​ប្រសាសន៍​ថា ការ​ផ្ទុះ​គ្រាប់​មីន​នោះ​កើត​ឡើង​នៅ​តំបន់​ប្រយុទ្ធ​គ្នា​រវាង​ទាហាន​ខ្មែរ​ក្រហម​និង​ទាហាន​វៀតណាម  ដែល​គាំទ្រ​រដ្ឋាភិបាល​ក្រុង​ភ្នំពេញ កាល​ក្នុង​សង្រ្គាម​ស៊ីវិល​កម្ពុជា​នា​ទសវត្សរ៍​ឆ្នាំ​១៩៨០។

ទោះ​ជា​យ៉ាង​នេះ​ក្តី លោក​បាន​ព្រលយ​សម្ដី​ថា វា​ក៏​អាច​ជា​លទ្ធភាព​មួយ ដែល​គេ​ទើប​តែ​នឹង​យក​គ្រាប់​មីន​នោះ​មក​ដាក់​បង្កប់​ក្នុង​ពេល​ថ្មីៗ​នេះ​ផង​ដែរ។

គេ​នៅ​មិន​ទាន់​ឃើញ​មាន​ការ​អះអាង​ពី​ប្រភព​កងទ័ព​កម្ពុជា​អំពី​ទីតាំង​ដែល​ទាហាន​ថៃ​បាន​ដើរ​ជាន់​គ្រាប់​មីន​នោះ​ថា នៅ​ត្រង់​ចំណុច​ណា​នៅ​ឡើយ​ទេ ប៉ុន្តែ​គេ​គ្រាន់​តែ​ដឹង​ថា តំបន់​ដែល​ថៃ​ហៅ​ថា ភូម៉ាក់ខឿ​នោះ គឺ​ឈ្មោះ​តំបន់​ភ្នំ​ទ្រព្យ ស្ថិត​ក្នុង​ទឹក​ដី​របស់​កម្ពុជា។

គួរ​ជម្រាប​ផង​ដែរ​ថា កាល​ពី​ថ្ងៃ​ទី​៦ ខែ​តុលា កន្លង​ទៅ​នេះ ទាហាន​ថៃ​ពីរ​នាក់​បាន​រង​របួស​ដោយសារ​ការ​ដើរ​ជាន់​មីន​នៅ​តំបន់​ព្រលាន​ឥន្ទ្រី ចម្ងាយ​ប្រហែល​៣​គីឡូម៉ែត្រ​ភាគ​ខាង​លិច​ប្រាសាទ​ព្រះវិហារ៕

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល