លោក ហ៊ុន ហ៊ាន ស្នងការនគរបាលខេត្តបន្ទាយមានជ័យ បានមានប្រសាសន៍ថា ការផ្ទុះគ្រាប់បែកនេះ បានកើតឡើងកាលពីវេលាម៉ោង ១០និង៣០នាទីយប់ថ្ងៃទី២ ខែកញ្ញា ឆ្នាំ២០០៨ នៅភូមិដូនឡឹម ជាប់ច្រកព្រៃចន្ទខ្មែរ ក្នុងខេត្តបន្ទាយមានជ័យ។
លោកបានបញ្ជាក់ថា ពលរដ្ឋខ្មែរ ឈ្មោះ ហ៊ុល វៀន បានប្រាប់សមត្ថកិច្ចថា ពួកគេមានគ្នា ៣នាក់ បានស៊ីឈ្នួលឲ្យក្រុមជនទុច្ចរិតធ្វើដំណើរចូលទៅទឹកដីថៃទាំងយប់ ដើម្បីទៅយកម៉ូតូ ហើយនៅពេលទៅដល់គោលដៅ ស្រាប់តែភាគីថៃស្រវាឱបនិងភ្ជង់កាំភ្លើងទៅលើឈ្មោះ ហែល តូច អាយុ ៣១ឆ្នាំ ហើយឈ្មោះ ហែល តូច មានគ្រាប់បែកក៏ដកគន្លឹះ បណ្ដាលឲ្យផ្ទុះ ធ្វើឲ្យទាហានឈុតខ្មៅថៃ របួសធ្ងន់ពីរនាក់និងរបួសស្រាលម្នាក់។ ហើយទាហានឈុតខ្មៅថៃម្នាក់ ដែលរបួសស្រាលបានងើបឡើងយកកាំភ្លើងបាញ់សម្លាប់ឈ្មោះ ហែល តូច តែម្ដង។
លោក ហ៊ុន ហ៊ាន បានរៀបរាប់ដូច្នេះថា ៖ «ឱបអ៊ីចឹង គឺថាខ្លួនមានគ្រាប់បែក ក៏ដកគន្លឹះគ្រាប់បែក ហើយបណ្ដាលឲ្យផ្ទុះរបួសខាងទាហានឈុតខ្មែរថៃនោះ គឺថាបីនាក់ ធ្ងន់ពីរនាក់ ស្រាលម្នាក់ ហើយខ្លួនឯងហ្នឹងក៏ត្រូវរបួសដែរ។ ដល់ពេលថៃ ឃើញដូច្នេះ គឺអ្នករបួសស្រាល បានងើបឡើងបាញ់ឈ្មោះ ហែល តូច។ តូច នេះ គឺងាប់នៅនឹងកន្លែងទៅ»។
លោកស្នងការបានបន្តថា ចំណែកឯព័ត៌មានពីភាគីថៃ បានចោទប្រកាន់ប្រជាពលរដ្ឋទាំង៣នាក់នោះថា ជាអ្នករកស៊ីជួញដូរថ្នាំញៀនទៅវិញ ៖ «ខាងថៃឯណោះ គឺថា គាត់ហាក់បីដូចជាលាក់លៀមមិនចង់ឲ្យយើងនិយាយទេ ប៉ុន្តែក្រោយពេលដែលយើងដឹងថា ជនជាតិយើងស្លាប់ យើងក៏ត្រូវតែបើកករណីនេះ»។
លោក ហ៊ុន ហ៊ាន បានបន្តថា ទោះបីមានការអះអាងយ៉ាងនេះក្ដីសមត្ថកិច្ចមិនទាន់ធ្វើការសន្និដ្ឋាន ទៅលើករណីនេះទេ ដោយបន្តធ្វើការស្រាវជ្រាវជាបន្តទៀត។
មន្រ្តីក្រុមប្រឹក្សាឃុំអូរបីជាន់ លោក ជូ សុភ័ណ បានថ្លែងថា សាកសពពលរដ្ឋខ្មែរម្នាក់ ដែលថៃបានដឹកយកទៅទីក្រុងបាងកកទាំងយប់ ក្រោយពីការកើតហេតុនោះ ត្រូវបានគេយកមកប្រគល់ឲ្យក្រុមគ្រួសារវិញហើយ នាថ្ងៃទី៤ ខែកញ្ញា ឆ្នាំ២០០៨។
លោក ជូ សុភ័ណ បានបញ្ជាក់ថា ខ្មែរដែលស្លាប់ទៅនោះ មានឈ្មោះ ហែល តូច ភេទប្រុសអាយុ ២៨ឆ្នាំ និងពលរដ្ឋខ្មែរ ២នាក់ផ្សេងទៀត មានឈ្មោះ ពៅ វៀត ភេទប្រុសអាយុ១៨ឆ្នាំ និងឈ្មោះ សេង សុង ភេទប្រុស អាយុ៣៨ឆ្នាំ អ្នកទាំងបីរស់នៅក្នុងភូមិព្រៃចន្ទ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
លោក ជូ សុភ័ណ បានបន្តថា សាកសពជនរងគ្រោះឈ្មោះ ហែល តូច បច្ចុប្បន្ន ត្រូវក្រុមគ្រួសារធ្វើបុណ្យសពនៅវត្តព្រៃចន្ទ ស្ថិតនៅក្នុងភូមិអូរបីជាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ៕