តាមកងយោធាខ្មែរបានអះអាងថា ការបញ្ជូនទាហានប៉ារ៉ាថៃមកបោះជំរំកាលពីពេលថ្មីៗ បានរំលោភចូលមកក្នុងទឹកដីខ្មែរផងដែរ។
មេបញ្ជាការកងយោធពលខេមរភូមិន្ទនៃកងពលថ្មើរជើងលេខ៨ ដែលគ្រប់គ្រងកម្លាំងយោធាខ្មែរនៅតំបន់នោះ លោកឧត្តមសេនីយ៍ត្រី យឹម ពឹម បានមានប្រសាសន៍កាលពីព្រឹកថ្ងៃអាទិត្យ ទី១៧ ខែឧសភាថា មេបញ្ជាការយោធាខ្មែរនៅតំបន់ជម្លោះបានជួបជជែកជាមួយមេបញ្ជាការយោធាថៃជាច្រើនលើកមកហើយ ដោយទាមទារឲ្យកងទាហានប៉ារ៉ាថៃដកចេញពីតំបន់ចាក់ច្រែងនោះ ជៀសវាងការប្រឈមមុខដាក់គ្នាដោយកងទ័ព ប៉ុន្តែពុំទាន់មានការឆ្លើយតបពីមេបញ្ជាការយោធាថៃនៅឡើយទេ។
លោកឧត្ដមសេនីយ៍ត្រី យឹម ពឹម ថ្លែងដូច្នេះថា ៖ «វានៅព្រៃឯលើឯណេះ ខាងតំបន់ហ្នឹងជាតំបន់ហាមឃាត់។ យើងទើបដាក់បញ្ហាហ្នឹងឡើង ដើម្បីឲ្យវាឆ្លើយ ប៉ុន្តែវាអត់ទាន់ឆ្លើយ»។
តាមកងយោធាខ្មែរឲ្យដឹងថា ទាហានប៉ារ៉ាថៃមួយក្រុមមានគ្នាប្រមាណ ២០នាក់ បានចូលមកបោះជំរំនៅតំបន់កំពូលភ្នំចាក់ច្រែងជិតមួយខែមកហើយ នៅក្រោយពេលនៃការប៉ះប្រយុទ្ធគ្នារវាងទាហានខ្មែរ-ថៃចុងក្រោយ នៅជិតប្រាសាទព្រះវិហារកាលពីអំឡុងខែមេសាមកនោះ។
យោធាខ្មែរមួយរូបដែលកំពុងប្រចាំការនៅលើកំពូលភ្នំប្រាសាទព្រះវិហារបាននិយាយថា រហូតមកដល់ថ្ងៃអាទិត្យនេះ កងទាហានប៉ារ៉ាថៃទាំងនោះនៅមិនទាន់មានផែនការដកចេញនៅឡើយទេ។
ទាហានខ្មែរដដែល បានអះអាងថា ការបោះជំរំរបស់ទាហានថៃមួយក្រុមនោះ បានលយចូលមកក្នុងបន្ទាត់ព្រំដែនខ្មែរ ប៉ុន្តែគេមិនអាចបញ្ជាក់ច្បាស់លាស់អំពីចម្ងាយប៉ុន្មានដែលចូលមកក្នុងព្រំដែនខ្មែរនោះទេ។
ចំណែកនៅច្រកព្រំដែនខ្មែរនៃតំបន់តាថាវ ចម្ងាយជាង ៦គីឡូម៉ែត្រភាគខាងលិចនៃប្រាសាទព្រះវិហារវិញមានសេចក្តីរាយការណ៏ថា ទាហានឈុតខ្មៅថៃចំនួន ១២នាក់ បានលួចចូលមកជិតខ្សែត្រៀមខ្មែរកាលពីថ្ងៃសៅរ៍ ទី១៦ ខែឧសភា។
មន្ត្រីប៉ូលិសព្រំដែនវរ៧៩៥ មួយរូប បានឲ្យដឹងថា ទាហានថៃទាំងនោះដឹកនាំដោយអនុសេនីយ៍ត្រីមួយរូប បានចូលមកព្រំដែនខ្មែរជាច្រើនម៉ោងត្រង់ចំណុចឈ្មោះចម្ការតាហង់ ៖ «ចូលមកម៉ោង ៩និង៣០នាទី ម៉ោង ២និង២០នាទី បានវាចេញទៅវិញ។ វាមកឃ្លាំមើលកម្លាំងយើងធ្វើការដែរហ្នឹង»។
ពេញមួយថ្ងៃអាទិត្យ មិនអាចស្វែងរកជួបមន្ត្រីទំនាក់ទំនងព្រំដែនថៃ-កម្ពុជាប្រចាំខេត្តស៊ីសាកេតដើម្បីអធិប្បាយជុំវិញព័ត៌មានទាំងនោះបាននៅឡើយទេ។
សូមរំឭកថា ជម្លោះព្រំដែនខ្មែរ-ថៃបានកើតឡើងតាំងពីខែកក្កដា ឆ្នាំ២០០៨ រហូតមកដល់ពេលនេះ រយៈពេល១០ខែហើយ ដោយកងទ័ពទាំងសងខាងបានប៉ះប្រយុទ្ធគ្នាចំនួន ៤លើក បណ្តាលឲ្យស្លាប់និងរបួសមួយចំនួន ហើយមានកិច្ចជួបចរចាតាមរយៈមន្ត្រីរដ្ឋាភិបាលនិងមន្ត្រីយោធានៃប្រទេសទាំងពីរជាច្រើនលើក ប៉ុន្តែមិនបានលទ្ធផលប្រសើរសម្រាប់រកដំណោះស្រាយបញ្ហានោះទេ៕