មន្ត្រីក្រសួងពាណិជ្ជកម្មថៃ បានរំពឹងថា បន្ទាប់ពីទំនាក់ទំនងការទូតរបស់កម្ពុជា និងថៃ ត្រូវបានធ្វើឲ្យប្រសើរឡើងវិញ ក្រោយពេលដែលប្រទេសទាំងពីរនេះមានបញ្ហាការទូត ប្រទេសថៃនឹងក្លាយជាប្រទេសទី១ ក្នុងការដាក់អ្នកវិយោគទុននៅកម្ពុជា ក្នុងរយៈពេល ៥ឆ្នាំទៅមុនទៀត។
កាសែតថៃឈ្មោះ បាងកក ប៉ុស្តិ៍ (Bangkok Post) នៅថ្ងៃច័ន្ទ ទី៦ ខែកញ្ញានេះ បានដកស្រង់សម្ដីរបស់អនុរដ្ឋមន្ត្រីក្រសួងពាណិជ្ជកម្មថៃ អាឡុងកន ផុល្លាបុត្រ (Alongkorn Ponlabboot) ដែលបានមានប្រសាសន៍ថា ថៃនឹងអាចមានលទ្ធភាពក្លាយទៅជាអ្នកវិនិយោគទុនបរទេសឈានមុខគេនៅកម្ពុជា ប្រសិនបើខ្លួនអាចចាប់យកប្រយោជន៍ពីផ្លូវជាតិលេខ៥ របស់កម្ពុជាបាន។ ផ្លូវជាតិលេខ៥ គឺចាប់ផ្ដើមពីព្រំដែនប្រទេសថៃ ក្នុងខេត្តស្រះកែវ ឆ្លងកាត់ខេត្តបន្ទាយមានជ័យ មកភ្នំពេញ។
កាសែតថៃបាងកក ប៉ុស្តិ៍ បានឲ្យដឹងថា កាលពី២០០៩ វិនិយោគថៃនៅកម្ពុជា មានតែចំនួន ១៥,៥លានដុល្លារក្នុងគម្រោងចំនួន៥។ ថៃត្រូវបានជាប់ចំណាត់ថ្នាក់លេខ៣ សម្រាប់តម្លៃវិនិយោគទុន គឺតិចជាងចិន ដែលមានវិនិយោគទុនចំនួន ៤៣,៣លានដុល្លារ និងវៀតណាម ២៤,៧លានដុល្លារ។
ប្រទេសថៃ បានវិនិយោគក្នុងរយៈពេល ១៦ឆ្នាំនៅកម្ពុជា មាន ៨១គម្រោង ដែលមានទឹកប្រាក់ប្រមាណ ៣៦២លានដុល្លារ។
មន្ត្រីរដ្ឋាភិបាលកម្ពុជា នៅថ្ងៃច័ន្ទ ទី៦ ខែកញ្ញា បានមានប្រសាសន៍ប្រាប់វិទ្យុអាស៊ីសេរីឲ្យដឹងថា កម្ពុជានៅមិនទាន់ហ៊ានធ្វើការសន្និដ្ឋានដូចជាការអះអាងរបស់មន្ត្រីថៃ ដែលមានមហិច្ឆតាចង់ក្លាយជាអ្នកវិនិយោគទុនឈានមុខគេនៅកម្ពុជា នៅឡើយទេ។
លោក កឹម ស៊ីថន រដ្ឋលេខាធិការក្រសួងពាណិជ្ជកម្ម មានប្រសាសន៍នៅថ្ងៃច័ន្ទថា ទំហំពាណិជ្ជកម្មថៃនៅកម្ពុជា នៅមានលក្ខណៈល្អប្រសើរ ទោះបីបើមានជម្លោះព្រំដែនជាមួយកម្ពុជាក៏ដោយ។
លោក កឹម ស៊ីថន បានឲ្យដឹងថា កាលពីឆ្នាំ២០០៨ ទំហំពាណិជ្ជកម្មថៃ មានចំនួន ២.១០០លានដុល្លារ ហើយនៅឆ្នាំ២០០៩ ទំហំពាណិជ្ជកម្មថៃ បានកើនឡើងរហូតទៅដល់ ១០%។
លោក កឹម ស៊ីថន បន្តទៀតថា បច្ចុប្បន្ននេះមានប្រទេសជាច្រើន ដូចជាប្រទេសចិន វៀតណាម កូរ៉េ និងថៃ កំពុងចាប់អារម្មណ៍មកដាក់ទុននៅកម្ពុជា ហើយការដណ្ដើមគ្នារបស់ប្រទេសនីមួយៗដើម្បីមកធ្វើវិនិយោគទុននៅកម្ពុជា វានឹងធ្វើឲ្យសេដ្ឋកិច្ចបានប្រសើរឡើង។
ការប្រកាសរបស់លោក អាឡុងកន ផុល្លាបុត្រ ក្រោយពេលដែលលោកបានមកកម្ពុជា កាលពីសប្ដាហ៍មុន ហើយបានប្រកាសថា រដ្ឋាភិបាលថៃមានបំណងចង់បង្កើតតំបន់សេដ្ឋកិច្ចពិសេស នៅតំបន់អូរនាង ប្រទេសកម្ពុជា ជាប់ខេត្តស្រះកែវ ប្រទេសថៃ ដើម្បីបង្កើនទំនាក់ទំនងកម្ពុជានិងថៃ។
តំបន់សេដ្ឋកិច្ចពិសេសរួមមាន សេវាកម្មនាំចេញ-នាំចូល មជ្ឈមណ្ឌលចែកចាយកសិកម្ម និងវិស័យអចលនវត្ថុជាដើម។
មន្ត្រីក្រុមប្រឹក្សាពាណិជ្ជកម្មថៃនៅកម្ពុជា លោកស្រី អាំម៉ារ៉ា ផន (Amara Porn) នៅថ្ងៃច័ន្ទមានប្រសាសន៍ដែរថា ទំនាក់ទំនងការទូតល្អរវាងថៃ និងកម្ពុជា បានជំរុញឲ្យពាណិជ្ជករថៃ មានការទុកចិត្តមកវិនិយោគទុននៅកម្ពុជាឡើងវិញ។
ទំនាក់ទំនងការទូត និងយោធារវាងកម្ពុជា-ថៃ ត្រូវបានធ្វើឲ្យមានភាពប្រសើរឡើងវិញ ក្រោយពេលដែលអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ (Thaksin Shinawatra) បានលាលែងពីតំណែងទីប្រឹក្សាសេដ្ឋកិច្ចរដ្ឋាភិបាលកម្ពុជា។ បន្ទាប់ពីការលាលែងរបស់លោក ថាក់ស៊ីន ស៊ីណាវ៉ាត្រ រដ្ឋាភិបាលថៃ បានចាប់ផ្ដើមបញ្ជូនមន្ត្រីរបស់ខ្លួនមកកម្ពុជា ដើម្បីពង្រឹងវិស័យការទូត សេដ្ឋកិច្ច និងយោធា។
លោក កុយ គួង អ្នកនាំពាក្យក្រសួងការបរទេសកម្ពុជា មានប្រសាសន៍នៅថ្ងៃច័ន្ទដែរថា រដ្ឋាភិបាលកម្ពុជាស្វាគមន៍ចំពោះការវិនិយោគទុនរបស់ថៃនៅកម្ពុជា ហើយជម្លោះព្រំដែនថៃ និងកម្ពុជា វានឹងមិនប៉ះពាល់ដល់វិស័យពាណិជ្ជកម្មរបស់ប្រទេសទាំងពីរនោះទេ។
លោក យឹម សុវណ្ណ អ្នកនាំពាក្យរបស់គណបក្សប្រឆាំង មានប្រសាសន៍នៅថ្ងៃច័ន្ទថា លោកស្វាគមន៍ការដាក់វិនិយោគទុនរបស់ថៃនៅកម្ពុជា ប៉ុន្តែរដ្ឋាភិបាលកម្ពុជា មិនត្រូវពន្យារពេលកិច្ចចរចាជម្លោះព្រំដែន ដោយសារការសន្យារបស់ថៃ ក្នុងការវិនិយោគទុននៅកម្ពុជានោះទេ។ លោកបន្ថែមថា កន្លងមកកម្ពុជាបានជួបប្រទះនឹងឱនភាពផ្នែកពាណិជ្ជកម្ម ដោយសារតែថៃ នាំទំនិញចូលមកកម្ពុជា ច្រើនជាងកម្ពុជា នាំទៅថៃ។
លោក កឹម ស៊ីថន បានបដិសេធថា ឱនភាពផ្នែកពាណិជ្ជកម្មវាងថៃ និងកម្ពុជា វាមិនប៉ះពាល់កម្ពុជានោះទេ ពីព្រោះប្រជាពលរដ្ឋកម្ពុជា មានចំនួនតិចជាងថៃ៕