កងទ័ពរដ្ឋាភិបាលខ្មែរបានថ្លែងថា ភាគីថៃនៅតែបន្តដាក់កងទ័ព និងមានការដាក់បន្ថែមគ្រឿងសព្វាវុធការពារនៅតាមខ្សែក្រវាត់ព្រំដែន ក្នុងខេត្តស្រះកែវ ប្រទេសថៃ ជាប់ខេត្តបន្ទាយមានជ័យ និងខេត្តបាត់ដំបង ប្រទេសកម្ពុជា បន្ទាប់ពីប្រទេសទាំងពីរ កម្ពុជា-ថៃ មានបញ្ហាប្រឈមមុខដាក់គ្នា ក្នុងរឿងទំនាស់ព្រំដែនសារជាថ្មី នៅតំបន់ប្រាសាទព្រះវិហារ។
កងការពារព្រំដែនរបស់រដ្ឋាភិបាលខ្មែរប្រចាំការជួរមុខក្នុងភូមិសាស្ត្រស្រុកសំពៅលូន ខេត្តបាត់ដំបង បានឲ្យដឹងនៅថ្ងៃទី៣ ខែកុម្ភៈ ឆ្នាំ២០១១ នេះថា ប្រទេសថៃបានដាក់ពង្រាយកងទ័ពជាច្រើននាក់ និងមានដាក់តាំងកាំភ្លើងតូចធំផង នៅតាមខ្សែត្រៀមជួរ ហើយបានធ្វើការបិទច្រករបៀងនានា មិនអនុញ្ញាតឲ្យមានអ្នកដំណើរឆ្លងកាត់ដូចសព្វដងឡើយ ៖ «ឃើញវាស្ដារលេណដ្ឋានរបស់វា រៀបចំដាក់ត្រង់សេ ដាក់តាមប៉ុស្តិ៍ វានៅតាមហ្នឹង ដាក់កាំភ្លើងយន្ត ១២ក្បៀស មួយដើម ហើយនិងដេកា៨៥ មួយដើម ដាក់កាំភ្លើងគាំទ្រវា ទាហានថៃដែលនៅតំបន់ចំណុចតេវេ ៨២ ៨៥ ៨៦ អត់មានឃើញចល័តទៅណា កម្លាំងវាឃើញនៅមានធម្មតា»។
ក្រុមប្រជាពលរដ្ឋខ្មែរ ដែលជាអ្នកចេញចូលទៅលក់ដូរនៅផ្សារខៅប៊ីន ក្នុងស្រុកខ្លងហាត ខេត្តស្រះកែវ ប្រទេសថៃជារៀងរាល់ថ្ងៃនោះ បានសង្កេតឃើញថា ភាគីទាហានថៃបានដាក់តាំងកាំភ្លើងតូចធំនៅតាមចំណុចយុទ្ធសាស្ត្រសំខាន់ៗ ហើយមានការជីកលេណដ្ឋានប្រយុទ្ធថ្មីជាច្រើនកន្លែងថែមទៀត ៖ «ខាងថៃគេដាក់ការពារបារ៉ែតរបស់គេនៅផ្សារខៅប៊ីន កាំភ្លើងហ្នឹងចំណុចនៅផ្សារហ្នឹង ជាប់និងផ្សារខៅប៊ីនហ្នឹង វាជីកអាចាស់ ឲ្យដាក់បាវថ្មីច្រកដីចូលក្នុងការុងហ្នឹងថ្មីទាំងអស់»។
ទោះយ៉ាងណាក្រុមនាយទាហានជាន់ខ្ពស់របស់រដ្ឋាភិបាលខ្មែរ ប្រចាំយោធភូមិភាគ៥ មិនបានធ្វើអត្ថាធិប្បាយបែបណាឡើយ ជុំវិញការដាក់ពង្រាយកងទ័ព និងអាវុធតូចធំ នៅតាមខ្សែបន្ទាត់ព្រំដែនថៃ ជាប់ព្រំដែនខ្មែរ គ្រាន់តែបញ្ជាក់ថា កងទ័ពរដ្ឋាភិបាលខ្មែរមានស្មារតីប្រុងជើងការខ្ពស់ការពារទឹកដីរបស់ខ្លួន។
លោក សួស សែន មេឃុំសន្តិភាព ស្រុកសំពៅលូន ខេត្តបាត់ដំបងបានមានប្រសាសន៍ថា ការដឹកទំនិញចេញចូល ដឹកកសិផលខ្មែរចូលទៅលក់ក្នុងប្រទេសថៃ មានជាធម្មតា ក៏ប៉ុន្តែប្រជាពលរដ្ឋខ្មែរ ដែលមានលំនៅឋាន និងជាអ្នករស់នៅតាមតំបន់ព្រំដែន មានការព្រួយបារម្ភថា បន្ទាប់ពីបានឃើញភាគីថៃដាក់បន្ថែមកងទ័ព និងគ្រឿងសព្វាវុធនៅតាមតំបន់ព្រំដែន ៖ «គេដាក់តាមច្រងរបៀងព្រំដែន យើងចូលមិនបានទេ ឥឡូវចូលបានតាមច្រកតំបន់ យើងចូលបាន បើតាមច្រកតូចតាច យើងធ្លាប់ចេញចូលលើកមុន ចូលលែងបាន ព្រោះទាហានថៃគេដាក់រាយខ្សែត្រៀមគេ អត់ទាន់មានអីទេ គ្រាន់តែការចេញចូលយើងធ្វើដំណើរទៅស្ដាប់បញ្ជាវាបន្តិច យើងទៅវាថាឲ្យដើរឆ្វេង យើងដើរឆ្វេង ព្រោះស្រុកវាជិះឆ្វេង អារម្មណ៍ចេះតែមានបន្តិចបន្តួច ព្រោះផ្ទះគាត់នៅជាប់ព្រំដែន ចេះតែមាន»។
ចំណែកឯកងការពារព្រំដែនរដ្ឋាភិបាលខ្មែរវិញ បានអះអាងថា ថ្វីត្បិតស្ថានភាពទូទៅនៅតាមតំបន់ព្រំដែនខ្មែរ-ថៃ ក្នុងខេត្តបាត់ដំបង និងខេត្តស្រះកែវថៃ មិនទាន់មានកើតហេតុការណ៍អ្វីធំដុំក៏ដោយ ក៏ប៉ុន្តែកងទាហានជួរមុខការពារព្រំដែនរបស់រដ្ឋាភិបាលខ្មែរ មានស្មារតីខ្ពស់ក្នុងការការពារ និងបានត្រៀមលក្ខណៈប្រយុទ្ធជាប្រចាំ ៖ «ខាងការពារព្រំដែន នេះយើងការពារបានស្រួលបួល ធម្មតា គ្រាន់តែថា កម្លាំងដាក់ការពារនៅតាមព្រំដែនហ្នឹង អត់មានដកកងទ័ពទៅណាទេ នៅតាមដានការពារមើលសភាពការហ្នឹង»។
នាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់ (Abhisit Vejjajiva) កាលពីថ្ងៃច័ន្ទ ទី៣១ ខែមករា ឆ្នាំ២០១១ បានគំរាមធ្វើសង្គ្រាមជាមួយកម្ពុជា ជាជម្រើសចុងក្រោយបង្អស់ ប្រសិនបើកម្ពុជា-ថៃ មិនមានលទ្ធភាពដោះស្រាយជម្លោះព្រំដែនរ៉ាំរ៉ៃដោយសន្តិវិធីបាន។
ចំណែកឯរដ្ឋាភិបាលកម្ពុជា បានចេញសេចក្ដីថ្លែងការណ៍ថា កម្ពុជារក្សាសិទ្ធិការពារអធិបតេយ្យភាព និងបូរណភាពដែនដីរបស់ខ្លួន ក្នុងពេលដែលនាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់ (Abhisit Vejjajiva) បានគំរាមធ្វើសង្គ្រាមប្រឆាំងនឹងកម្ពុជា។
វិវាទព្រំដែនរវាងប្រទេសកម្ពុជា និងប្រទេសថៃ បានកើតឡើងជាបន្តបន្ទាប់ ពីប្រាសាទព្រះវិហាររបស់ខ្មែរ ត្រូវបានអង្គការយូនីស្កូសម្រេចដាក់បញ្ចូលជាសម្បត្តិបេតិកភណ្ឌពិភពលោក កាលពីថ្ងៃទី៧ ខែកក្កដា ឆ្នាំ២០០៨ រួចមក៕