កាសែតថៃ Bangkok Post បានស្រង់សំដីលោក Abhisit Vejjajiva ថា កម្ពុជាត្រូវតែដកកងទ័ពខ្លួនចេញពីតំបន់ក្បែរប្រាសាទព្រះវិហារជាមុនសិន ទើបថៃអនុញ្ញាតឲ្យមានអ្នកសង្កេតការណ៍។
លោកបន្តថា ជំហររបស់កម្ពុជា និងថៃ មានភាពផ្ទុយគ្នាទាក់ទងទៅនឹងការដកកងទ័ពចេញពីតំបន់គ្មានយោធា ដែលបានកំណត់ដោយតុលាការយុត្តិធម៌អន្តរជាតិ ដូច្នោះហើយប្រទេសទាំងពីរត្រូវមានកិច្ចចរចាគ្នាជាមុន។
រដ្ឋាភិបាលកម្ពុជាកាលពីថ្ងៃពុធ បានស្នើសុំឲ្យអ្នកសង្កេតការណ៍ឥណ្ឌូណេស៊ី មកត្រួតពិនិត្យតំបន់ជម្លោះព្រំដែនក្បែរប្រាសាទព្រះវិហារជាបន្ទាន់ មុនពេលដែលកម្ពុជាគោរពសេចក្ដីសម្រេចចិត្តរបស់តុលាការយុត្តិធម៌អន្តរជាតិ។ លោក ហោ ណាំហុង រដ្ឋមន្ត្រីការបរទេសបញ្ជាក់ថា សម្រាប់កម្ពុជា អ្នកសង្កេតការណ៍ឥណ្ឌូណេស៊ីត្រូវមកកាន់តំបន់ជម្លោះជាមុនសិន ទើបកម្ពុជាដកកងទ័ពខ្លួនចេញ៕