ចូលទឹកដីខ្មែរដាំដំឡូងមី
អាជ្ញាធរខ្មែរបានបណ្ដេញប្រជាពលរដ្ឋថៃមួយគ្រួសារឲ្យវិលត្រឡប់ចូលទៅទឹកដីរបស់ខ្លួនវិញ បន្ទាប់ពីគ្រួសារថៃនោះ បានឈ្លានពានចូលមកលើដីខ្មែរ កាប់ឆ្ការព្រៃវាតទីយកដីទំហំជាង២ហិកតារ ភ្ជួរដាំដំឡូងមី នៅចំណុចមួយ ជិតព្រំដែនខ្មែរ-ថៃ ក្នុងភូមិចំការគ ឃុំស្វាយចេក ស្រុកស្វាយចេក ខេត្តបន្ទាយមានជ័យ។
អភិបាលខេត្តបន្ទាយមានជ័យ លោក អ៊ុង អឿន បានមានប្រសាសន៍កាលពីថ្ងៃអាទិត្យ ទី១ ខែសីហាថា អាជ្ញាធរខ្មែរ បានបណ្ដេញឲ្យគ្រួសារជនជាតិថៃនោះ បញ្ឈប់ការបំពារបំពានមកលើដីខ្មែរទៀត បន្ទាប់ពីបានទទួលដំណឹងថា គ្រួសារថៃនោះ នាំគ្នាចូលមកដាំដំឡូងមីលើទឹកដីខ្មែរ ៖ «ខ្ញុំបានបញ្ជាឲ្យគាត់ផ្អាក ហើយគាត់បានវិលត្រឡប់ទៅវិញ អត់មានឲ្យមកប៉ះពាល់អី អារឿងដាំដំឡូងដាំអីហ្នឹងទេ គាត់វិលទៅវិញអស់ហើយ»។
អាជ្ញាធរមូលដ្ឋានខ្មែរបានឲ្យដឹងថា គ្រួសារថៃនោះ កាលពីថ្ងៃទី២២ ខែកក្កដា ឆ្នាំ២០១០ បានឆ្លងដែនពីខេត្តស្រះកែវ ថៃ នាំគ្នាមកកាប់ឆ្ការព្រៃក្នុងទឹកដីខ្មែរ ស្ថិតនៅភូមិចម្ការ ឃុំស្វាយចេក ស្រុកស្វាយចេក ខេត្តបន្ទាយមានជ័យ ដោយពួកគេបានប្រើម៉ាស៊ីនគោយន្តភ្ជួរដីនោះដាំដំឡូងមី។
មេបញ្ជាការនៃវរសេនាតូចការពារព្រំដែន៩១១ បានមានប្រសាសន៍ថា ក្រោយពីទទួលបានដំណឹងថា មានជនជាតិថៃចូលរំលោភបំពានយកដីខ្មែរដាំដំឡូងមីរួចមក កងការពារព្រំដែននៃវីរសេនាតូច៩១១ ជាង១០នាក់ បានចុះទៅដល់ទីតាំងនោះ ហើយបានបញ្ជាឲ្យដកដើមដំឡូងដែលគ្រួសារថៃទើបដាំថ្មីៗចោលទាំងអស់ ៖ «យើងប្រាប់ទៅខាងគេហើយ យើងដកចោលបណ្ដោយ វាកាប់រាន្តធ្វើថ្មី បណ្ដោយប្រហែលជាង២ហិកតារបន្តិច ដាំបានពាក់កណ្ដាល ទ័ពវាប្រាប់ ប្រជាជនវាចេះតែលួចមក វាដឹងថាវាធ្វើខុសវាមិនមាត់អីទេ ធ្វើកិច្ចសន្យាថា មិនឲ្យមកធ្វើថែមទៀតអីអ៊ីចឹង កិច្ចសន្យាធ្វើខាងគេ គេថាកុំឲ្យចូលមកធ្វើលើដីព្រំដែន អីអ៊ីចឹងទៀត គេពិបាកដែរ គេតាំងទ័ព គេនិយាយអ៊ីចឹង ព្រោះបង្គោលព្រំដែនលេខ៤១ ជាបង្គោលឯកភាព គណៈកម្មការព្រំដែនបានត្រូវពិនិត្យរួចហើយកន្លែងហ្នឹង»។
យើងប្រាប់ទៅខាងគេហើយ យើងដកចោលបណ្ដោយ វាកាប់រានធ្វើថ្មី បណ្ដោយប្រហែលជាង២ហិកតារបន្តិច ដាំបានពាក់កណ្ដាល ទ័ពវាប្រាប់ ប្រជាជនវាចេះតែលួចមក វាដឹងថាវាធ្វើខុសវាមិនមាត់អីទេ ។មេបញ្ជាការនៃវរសេនាតូចការពារព្រំដែន៩១១
ជាការយល់ច្រឡំ?
អភិបាលស្រុកស្វាយចេក លោក ឃូ ពៅ បានមានប្រសាសន៍ថា ប្រជាពលរដ្ឋថៃ ដែលបានចូលមកយកដីខ្មែរដាំដំឡូងម៉ីខាងលើ បានឆ្លើយនៅពេលអាជ្ញាធរខ្មែរធ្វើការសាកសួរថា ពួកគេមានការយល់ច្រឡំទើបបានជានាំគ្នាកាប់រុករាន្តទន្ទ្រានចូលដល់ដីខ្មែរដូច្នេះ ៖ «គាត់ជាប្រជាពលរដ្ឋសាមញ្ញ គាត់អត់បាននិយាយអីទេ គាត់ទៅវិញទៅ គាត់ថា គាត់យល់ច្រឡំ អត់មានការប្រឈមអីទាំងអស់មួយគ្រួសារគាត់ គាត់មានកូនចៅគាត់ ដាំបានដីបន្តិច គាត់ភ្ជួរនឹងគោយន្ត»។
នៅក្នុងខេត្តបន្ទាយមានជ័យ ស្រុកដដែល មានព្រំដែនជាប់ខេត្តស្រះកែវ ថៃ មានស្រុកម៉ាឡៃ ស្រុកអូរជ្រៅ ក្រុងប៉ោយប៉ែត ស្រុកថ្មពួក និងស្រុកស្វាយចេក ដែលមានសរុបប្រវែង ១៨០.៦៣០ម៉ែត្រ។ ក្នុងរយៈពេលជាបន្តបន្ទាប់មកនេះ តែងតែលេចឮថា ប្រជាពលរដ្ឋថៃធ្វើការរំលោភបំពាន ចូលមកដណ្ដើមដីខ្មែរថាជាដីរបស់ខ្លួន និងការយកសត្វគោមកឲ្យស៊ីស្មៅលើដីខ្មែរជាដើម។
គ្មានចំណាត់ការផ្លូវច្បាប់
កាលពីពេលកន្លងទៅថ្មីនេះ ប្រជាពលរដ្ឋថៃជាច្រើននាក់ រស់នៅតាមតំបន់ព្រំដែន ក្នុងខេត្តស្រះកែវ ប្រទេសថៃ ក៏ធ្លាប់បានលើកគ្នាមកឈ្លានពានដណ្ដើមយកដីខ្មែរ ជាច្រើនហិកតារ នៅតំបន់ព្រំដែនជិតច្រកបឹងត្រកួន ក្នុងស្រុកថ្មពួក ខេត្តបន្ទាយមានជ័យ ប៉ុន្តែជនជាតិថៃទាំងនោះមិនត្រូវបានអាជ្ញាធរខ្មែរធ្វើការចាប់ខ្លួនទេ គឺគ្រាន់តែបានធ្វើការបណ្ដេញឲ្យដកថយចេញទៅក្នុងទឹកដីរបស់ពួកគេវិញប៉ុណ្ណោះ។
ទោះជាយ៉ាងនេះក្ដី ការឈ្លានពានរបស់ពលរដ្ឋថៃ មកលើបូរណភាពកម្ពុជានារយៈពេលជាបន្តបន្ទាប់ នៅតាមបណ្ដោយព្រំដែនខ្មែរថៃ ក្នុងខេត្តបន្ទាយមានជ័យនេះ ខាងភាគីរដ្ឋាភិបាលខ្មែរ គេសង្កេតឃើញថា មិនទាន់ឃើញមានចំណាត់ការផ្លូវច្បាប់ណាមួយឡើយ ដើម្បីចោទប្រកាន់ ឬនាំខ្លួនពលរដ្ឋថៃឈ្លានពានទាំងនោះ ទៅដាក់ទោសទណ្ឌទេ ខណៈពលរដ្ឋរាប់ពាន់នាក់ ដែលគ្រាន់តែមានកំហុសឆ្លងដែនខុសច្បាប់ ចូលទឹកដីថៃ ត្រូវបានអាជ្ញាធរថៃបាញ់សម្លាប់ វាយដំធ្វើទារុណកម្មដូចសត្វធាតុ និងការចាប់ដាក់ខ្នោះ ច្រវាក់ បញ្ជូនដាក់ពន្ធនាគាររង់ចាំតុលាការថៃកាត់ទោសទើបដោះលែងបាន៕