លោក ថាក់ស៊ីន ត្រូវបានកងយោធាថៃ ធ្វើរដ្ឋប្រហារទម្លាក់រូបលោកពីតំណែងកាលពីឆ្នាំ២០០៦ និងបន្ទាប់មកត្រូវបានតុលាការថៃ កាត់ទោសអោយជាប់ពន្ធនាគារចំនួន ២ឆ្នាំ ពីបទពុករលួយ។
ការស្រែកដង្ហោយហៅលោក ថាក់ស៊ីន ឱ្យវិលត្រឡប់វិលចូលប្រទេសថៃ វិញនោះ គឺបន្ទាប់ពីពួកគេបានជួបមុខលោក ថាក់ស៊ីន ចំនួន ២ថ្ងៃ ហើយជាពេលចុងក្រោយដែលត្រូវបែកគ្នាទៅវិញនោះ។
អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ កាលពីព្រឹកថ្ងៃអាទិត្យ ទី១៥ ខែមេសា បានចំណាយពេលវេលាចុងក្រោយរបស់លោក សម្រាប់ថ្ងៃបុណ្យចូលឆ្នាំថ្មី ដោយធ្វើពិធីរាប់បាត្រព្រះសង្ឃនៃព្រះពុទ្ធសាសនាចំនួន ២៦៥អង្គ និងបានប្រើទឹកបាញ់ស្រោចស្រពទៅលើជនជាតិថៃ រាប់ម៉ឺននាក់ ដែលខំស្កាត់មកជួបរូបលោក ដើម្បីជានិមិត្តរូបជូនពរសព្ទសាធុការដល់ពួកគេគ្រប់ៗគ្នាឱ្យមានសេចក្ដីសុខ នៅឯទីលានមុខប្រាសាទអង្គរវត្ត នៃខេត្តសៀមរាប ប្រទេសកម្ពុជា។
លោក ស៊ូ ភិរិន្ទ ជាអភិបាលខេត្តសៀមរាប។ លោកបានមានប្រសាសន៍កាលពីព្រឹកថ្ងៃអាទិត្យ ទី១៥ ខែមេសា ថា លោក ថាក់ស៊ីន បានធ្វើពិធីរាប់បាត្រព្រះសង្ឃចំនួន ២៦៥អង្គ ដើម្បីតំណាងឱ្យសមាជិកសភារបស់លោក កំពុងមានអាសនៈចំនួន ២៦៥ដែរ ឱ្យបានសេចក្ដីសុខ និងសុភមង្គល ហើយលោកក៏បានបន់ស្រន់បារមីអង្គរវត្ត សុំឱ្យជួយថែរក្សារូបលោកឱ្យមានសេចក្ដីសុខដែរ។
លោក ស៊ូ ភិរិន្ទ បានមានប្រសាសន៍ថា បន្ទាប់ពីធ្វើពិធីរាប់បាត្រនៅមុខអង្គរវត្តរួចរាល់ កាលពីព្រឹកថ្ងៃអាទិត្យ នោះ គឺជាពេលដែលលោក ថាក់ស៊ីន និងអ្នកដែលមានភក្ដីភាពចំពោះលោករាប់ម៉ឺននាក់ បានបែកគ្នារៀងៗខ្លួនវិញ៖ «រាប់បាត្រហើយ ឯកឧត្ដម ថាក់ស៊ីន លោកនឹងជូនពរជ័យដល់ប្រជាពលរដ្ឋ និងគាត់ទៅវិញទៅមកហ្នឹង គឺប្រជាពលរដ្ឋហ្នឹងចេះតែវិលត្រឡប់ទៅវិញជាបណ្ដើរៗ ទៅតាមច្រកជាំ ទៅតាមប៉ោយប៉ែត ទៅតាមប៉ៃលិនមួយចំនួនទៀត ហើយនិងអូរស្មាច់ច្រើនជាងគេ គឺគាត់ចេញទៅហើយ។ យើងកាន់សាសនាដូចគ្នា យើងមានទំនៀមទម្លាប់ដូចគ្នា ដូច្នេះការទំនាក់ទំនងឱ្យឃើញក្នុងផ្លូវចិត្តថា យើងទំនាក់ទំនងគ្នាល្អយូរអង្វែង យើងអត់ចង់មានសង្គ្រាមទេ ដើម្បីអភិវឌ្ឍន៍ប្រទេសរៀងៗខ្លួន»។
ចំណែកក្រុមអ្នកស្មោះស្ម័គ្រជាមួយលោក ថាក់ស៊ីន ប្រមាណជាង ៣ម៉ឺននាក់ បានស្រែកហៅឈ្មោះលោកឱ្យវិលត្រឡប់ចូលប្រទេសថៃ វិញ នៅមុនពេលដែលពួកគេរៀបនឹងបែកពីលោក ថាក់ស៊ីន ហើយចាកចេញពីខេត្តសៀមរាប វិលទៅស្រុកថៃ រៀងៗខ្លួនវិញនោះ។
កាលពីរាត្រីថ្ងៃសៅរ៍ ទី១៤ ខែមេសា លោក ថាក់ស៊ីន បានចំណាយពេលវេលាជិត ៣០នាទី ថ្លែងផ្ទាល់មាត់ទៅកាន់អ្នកស្មោះត្រង់ជាមួយរូបលោក ព្រមទាំងចំណាយពេលជាច្រើនម៉ោងទៀតច្រៀង និងរាំកម្សាន្តជាមួយពួកគេ ដើម្បីអបអរឆ្នាំថ្មីនៅក្នុងប្រទេសកម្ពុជា។
លោក ថាក់ស៊ីន បានមានប្រសាសន៍ថា ក្នុងរយៈពេល ៦ឆ្នាំ ដែលលោកបានធ្វើការបំរើរដ្ឋាភិបាល គឺលោកបានលះបង់អ្វីៗគ្រប់យ៉ាងឱ្យទៅប្រជាពលរដ្ឋថៃ ទាំងអស់គ្នា ដោយសារតែលោកស្រឡាញ់ និងចង់ឱ្យប្រជាពលរដ្ឋថៃ គ្រប់រូប មានសេចក្ដីសុខ។
លោក ថាក់ស៊ីន បានបង្ហាញអារម្មណ៍ក្ដុកក្ដួលចង់យំនៅពេលដែលលោកបានជួបជាមួយអ្នកគាំទ្ររូបលោកជាច្រើន។ លោកបានមានប្រសាសន៍ថា ក្នុងរយៈពេល ៦ឆ្នាំមកនេះ លោកបានដើរគ្រប់ប្រទេសទាំងអស់នៅក្នុងពិភពលោក លើកលែងតែប្រទេសកំណើតរបស់លោក ដែលលោកមិនចូលបាន៖ «បងប្អូនជាទីស្រឡាញ់! សព្វថ្ងៃនេះមិនថា ខ្ញុំដើរទៅដល់ទីណា និងឃើញអ្វីនោះទេ គឺខ្ញុំតែងតែចំណាយពេលគិតគូរ ដើម្បីផលប្រយោជន៍ប្រជាជនថៃគ្រប់គ្នាឱ្យបានរស់នៅដោយសេចក្ដីសុខ។ បងប្អូនជាទីគោរព! ចាប់តាំងពីរូបខ្ញុំត្រូវបានគេធ្វើរដ្ឋប្រហារមក ថ្វីត្បិតតែខ្ញុំមិននៅជាមួយអ្នកគ្រប់គ្នា ក៏ប៉ុន្តែខ្ញុំតែងគិតដល់អ្នកគ្រប់គ្នាជានិច្ច ហើយបងប្អូនតែងជួយលើកទឹកចិត្តដល់ខ្ញុំ។ ចាប់តាំងពីរដ្ឋប្រហារទម្លាក់រូបខ្ញុំ គឺបងប្អូនបានខំប្រឹងតស៊ូ និងលះបង់យ៉ាងខ្លាំងក្លា ដើម្បីយកឈ្នះលើពួកផ្ដាច់ការដែលរហូតមកដល់ថ្ងៃសៅរ៍ នេះ មានរយៈពេល ៦ឆ្នាំហើយ»។
អាជ្ញាធរខេត្តសៀមរាប បានឱ្យដឹងថា រដ្ឋាភិបាលបានរាយបណ្ដាក់កម្លាំងសន្តិសុខប្រមាណ ៦ពាន់នាក់ រួមនិងកម្លាំងសន្តិសុខមកពីក្រុមអាវក្រហមរបស់ថៃផង គឺចំនួនប្រហែល ៧ពាន់ ត្រូវបានគេរាយបណ្ដាក់ការពារសន្តិសុខ នៅក្នុងអំឡុងពេលដែលក្រុមថៃ អាវក្រហមប្រមាណជាង ៣ម៉ឺននាក់លើកគ្នាមកជួបលោក ថាក់ស៊ីន ជាមួយនឹងការចូលរួមពិធីថ្ងៃបុណ្យចូលឆ្នាំថ្មីផង រយៈពេល ៣ថ្ងៃកន្លងទៅនេះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។