បុរសឈ្មោះ គឹម សរឿន អាយុ៥៤ឆ្នាំ នៅភូមិអភិវឌ្ឍន៍ សង្កាត់អូរស្មាច់ នៅជាប់ព្រំដែនខ្មែរ-ថៃ បានមានប្រសាសន៍កាលពីព្រឹកថ្ងៃសៅរ៍ ទី២៨ ខែវិច្ឆិកា ថា កូនប្រុសរបស់លោកឈ្មោះ សុខ សំណាង អាយុ១៩ឆ្នាំ ត្រូវទាហានថៃបាញ់សម្លាប់កាលពីរសៀលថ្ងៃសុក្រ បន្ទាប់ពីបានឆ្លងដែនជាមួយអ្នកភូមិ៦នាក់ផ្សេងទៀត។ បុរសដដែលបានមានប្រសាសន៍ថា បើតាមអ្នកភូមិប្រាប់ថា កូនប្រុសរបស់គាត់បានឆ្លងព្រំដែនថៃដើម្បីដើររកដកផ្សិតនៅក្នុងព្រៃ។
លោក គឹម សារឿន មានប្រសាសន៍ថា ៖ «កូននោះវាទៅព្រៃដែរវាទៅរកផ្សិតទៅរកអ្វីដែរ ដល់នេះទៅក៏ឮគេថាបាញ់ងាប់កូនខ្ញុំនេះឯង ម៉ោង៣និង៤០នាទី។ វាទៅត្រឹមអាងអីទៅរកត្រី រកអ្វីមាន អាង១៥ហ្នឹងណា!»។
អាជ្ញាធរខេត្តឧត្តរមានជ័យបានឲ្យដឹងថា គេបានទទួលព័ត៌មាននេះហើយ ក៏ប៉ុន្តែគេមិនទាន់ដឹងអំពីមូលហេតុដែលប្រជាពលរដ្ឋខ្មែរនាំគ្នាឆ្លងដែននោះដើម្បីធ្វើអ្វីឲ្យប្រាកដនៅឡើយ។
លោក ឈឹម ស៊ីវុធ ជំនួយការអភិបាលខេត្តឧត្តរមានជ័យ បានមានប្រសាសន៍ថា ប្រជាពលរដ្ឋខ្មែរចំនួន៧នាក់បាននាំគ្នាឆ្លងដែនចូលទៅក្នុងទឹកដីស្រុកកាប់ជើង ខេត្តសុរិន្ទរបស់ថៃ ហើយក៏ត្រូវទាហានថៃបាញ់បណ្តាលឲ្យស្លាប់ម្នាក់ ប៉ុន្តែ៦នាក់ក្នុងចំណោមនោះបានវិលត្រឡប់មកដល់ផ្ទះវិញហើយ ត្រូវប៉ូលិសកំពុងសាកសួររកមូលហេតុនៃការឆ្លងដែននោះ។
លោក ឈឹម ស៊ីវុធ ថ្លែងថា ៖ «ខ្ញុំបានព័ត៌មានថាក្មេងប្រុស(ស្លាប់) គាត់នាំគ្នាលួចឆ្លងដែនទៅខាងកើតឈៀងខាងជើងបង្គោលឡាក់លេខ១៤ មានគ្នីគ្នាគេហ្នឹងប្រមាណ៦-៧នាក់ទាំងខ្លួនគាត់ហ្នឹងណា! មិនថាទៅធ្វើអ្វីៗទេ ចាំមើលប៉ូលិសគេធ្វើការសិន គ្រាន់ថា ៦នាក់ទៀតនោះបានរត់រួចមកវិញហើយសាកសពហ្នឹងក៏បានយកមកដល់ផ្ទះហើយ»។
លោក ស្រី ណារ៉េន អ្នកស៊ើបអង្កេតរបស់សមាគមការពារសិទ្ធិមនុស្ស អាដហុក ប្រចាំខេត្តឧត្តរមានជ័យ បានមានប្រសាសន៍ថ្កោលទោសទាហានថៃថា មិនគួរប្រើកម្លាំងយោធាយកអាវុធមកបាញ់សម្លាប់ប្រជាពលរដ្ឋស្លូតត្រង់ខ្មែរដូច្នេះទេ បើទោះបីជាប្រជាពលរដ្ឋខ្មែរទាំងនោះបានឆ្លងដែនឬក៏លួចកាប់ឈើខុសច្បាប់ក៏ដោយគឺថៃគួរតែចាប់ខ្លួនទៅផ្តន្ទាទោសតាមច្បាប់រដ្ឋ។
លោក ស្រី ណារ៉េន បញ្ជាក់ថា ៖ «គាត់ប្រឹងទៅរករស់ ហើយបើទាហានថៃប្រើអំណាចគឺថាជាការរំលោភសិទ្ធិមនុស្សយ៉ាងធ្ងន់ធ្ងរ ហើយសុំឲ្យរាជរដ្ឋាភិបាលកម្ពុជាជួយយកចិត្តទុកដាក់ប្រជាពលរដ្ឋនៅតាមព្រំដែនហ្នឹងដែលគាត់មានជីវភាពខ្វះខាតតែងតែចូលទៅតាមព្រំដែនទៅរកមុខរបរផ្សេងៗហើយធ្វើឲ្យថៃបាញ់ស្លាប់ជាញឹកញាប់»។
ចាប់តាំងពីខែកញ្ញា ឆ្នាំនេះ ទាហានថៃស្រុកកាប់ជើង ខេត្តសុរិន្ទ បានបាញ់សម្លាប់ប្រជាពលរដ្ឋខ្មែរចំនួន៣នាក់ហើយ។ ក្រសួងការបរទេសខ្មែរធ្លាប់បានចេញកំណត់ហេតុការទូតតវ៉ាប្រឆាំងអំពើនេះឲ្យរដ្ឋាភិបាលថៃធ្វើការស៊ើបអង្កេតនិងតាមរកចាប់ខ្លួនជនដៃដល់មកផ្តន្ទាទោស ប៉ុន្តែរហូតមកដល់ពេលនេះរដ្ឋាភិបាលថៃមិនបានបង្ហាញនូវកិច្ចសហការប្រសើរទេ៕