លោក វ៉ាត ហាន មេឃុំបន្ទាយឆ្មារ ក្នុងស្រុកថ្មពួក ខេត្តបន្ទាយមានជ័យ បានស្រងសេចក្ដីរាយការណ៍ពីកងទាហានការពារព្រំដែនខ្មែរឲ្យដឹងថា ទាហានថៃ បានធ្វើការបាញ់ប្រហារទៅលើពលរដ្ឋខ្មែរកាលពីព្រឹកថ្ងៃទី៧ ខែមករានេះ។
លោក វ៉ាត ហាន បន្តថា ៖ «តាមព័ត៌មានដែលថាស្លាប់ហ្នឹង ស្លាប់តែម្នាក់ទេ ហើយប្រជាពលរដ្ឋដែលទៅនោះទាំងអស់ ១១នាក់ នៅក្នុងភូមិខ្ញុំមាន ៧នាក់។ វាឡើងចេញពីភូមិយើង គឺភូមិដងរែក ឡើងឆ្ពោះទៅឡាក់លេខ ២៧ ឆ្លងឡាក់ ២៧ ចូលទៅដល់ដីថៃ។ តាមព័ត៌មានថា ទៅកាប់ឈើនៅប្រទេសគេ ហើយថៃហ៊ុមបាញ់តែម្ដង»។
ប្រភពពីអាជ្ញាធរមូលដ្ឋានក្នុងស្រុកថ្មពួក ខេត្តបន្ទាយមានជ័យ បានឲ្យដឹងថា ពលរដ្ឋខ្មែរដែលរងការបាញ់ប្រហារពីសំណាក់ទាហានថៃទាំងនោះ មានចំនួន ១១នាក់ អ្នកទាំងនោះរស់នៅក្នុងឃុំបន្ទាយឆ្មារ និងឃុំគោករមៀត ស្រុកថ្មពួក ខេត្តបន្ទាយមានជ័យ ៖ «ខាងព្រំដែនគេរាយការណ៍មកថា នៅម្ដុំថ្មស ក្បែរឡាក់ ២៨។ បានដឹងហ្នឹង ឃើញដឹងតែម្នាក់ហ្នឹងស្លាប់ ម្នាក់ទៀតរបួស ថៃបាញ់នៅទឹកដីថៃ ក្នុងស្រុកតាប់ព្រះយ៉ា។ អត់ដឹងត្រកូលទេ ឈ្មោះ សម្បត្តិ ស្លាប់ អាយុខ្ទង់ ៣៣-៣៥ ហើយម្នាក់ទៀតឈ្មោះ សឺត របួស តែមិនដឹងថា ស្រាលប៉ុណ្ណា ធ្ងន់ប៉ុណ្ណា»។
លោក ចាន់ កុសល ស្នងការនគរបាលខេត្តបន្ទាយមានជ័យ មានប្រសាសន៍ថា សាកសពជនជាតិខ្មែរដែលត្រូវទាហានថៃ បាញ់សម្លាប់នោះ កំពុងស្ថិតនៅក្នុងទឹកដីថៃនៅឡើយ ហើយខាងអាជ្ញាធរខ្មែរកំពុងស្នើទៅភាគីថៃ ដើម្បីយកសាកសពមកធ្វើបុណ្យនៅស្រុកកំណើតវិញ៕