លោក សុខ អាន បានមានប្រសាសន៍នៅក្នុងសន្និសីទសារព័ត៌មាននៅឯព្រលានយន្តហោះអន្តរជាតិភ្នំពេញ ក្រោយពេលដែលលោកទៅចូលរួមប្រជុំគណៈកម្មាធិការបេតិកភណ្ឌពិភពលោកលើកទី៣៣ នៅឯទីក្រុងសេវីលនៃប្រទេសអេស៉្បាញវិញថា គណៈប្រតិភូខ្មែរបានបញ្ចាំងភាពយន្តឯកសារស្តីពីការខូចខាតប្រាសាទនិងផ្សារដែលនៅក្បែរប្រាសាទក្រោមគ្រាប់កាំភ្លើងរបស់ទាហានថៃ ដែលជាការឆ្លុះបញ្ចាំងថា កងទ័ពថៃបានចូលទន្ទ្រានទឹកដីកម្ពុជា។
លោក សុខ អាន បានមានប្រសាសន៍ថា ៖ «យើងបញ្ចាំងឲ្យមើលពីផ្សារ ជើងប្រាសាទ ដែលត្រូវថៃបាញ់មកឆេះខ្ទេចខ្ទីនេះ ថតពេលមុនឆេះ ពេលក្រោយឆេះ បង្ហាញឲ្យគេមើល។ គណៈប្រតិភូខ្លះដែលគេជាថ្នាក់ដឹកនាំធំរបស់ស្រុកគេដែរ ហើយគេជាគណៈប្រតិភូចូលរួមនៅក្នុងការប្រជុំលើកទី៣៣ហ្នឹង គេបាននិយាយថា "ខ្ញុំក្នុងនាមជាអ្នកវប្បធម៌ ខ្ញុំអង្គុយស្ដាប់ឯកឧត្ដមដោយបេះដូងខ្ញុំស្រក់ឈាម ហើយខ្ញុំចាត់ទុកថា នេះគឺជាអំពើឧក្រិដ្ឋកម្មយ៉ាងពិតប្រាកដ។ ខ្ញុំសូមលើកទឹកចិត្តឯកឧត្ដមគឺផ្សព្វផ្សាយរឿងនេះជូនពិភពលោកទាំងមូល"»។
កងទាហានកម្ពុជានិងថៃបានប៉ះទង្គិចគ្នាដោយអាវុធបីលើកមកហើយក្រោយពេលដែលប្រាសាទព្រះវិហារខ្មែរត្រូវបានដាក់ចូលក្នុងបញ្ជីបេតិកភណ្ឌពិភពលោករបស់អង្គការ UNESCO ក្នុងខែកក្កដា ឆ្នាំ២០០៨កន្លងមកនេះ។
ការប៉ះប្រយុទ្ធគ្នារវាងទាហានខ្មែរថៃនៅជិតប្រាសាទព្រះវិហារដោយសារជម្លោះព្រំដែនកាលពីដើមខែតុលា ឆ្នាំ២០០៨កន្លងមកនេះ ទាហានថៃបានបាញ់ឆេះផ្ទះប្រជាពលរដ្ឋខ្មែរជាង២៥០ខ្នងនិងគ្រាប់កាំភ្លើងថៃបានបាញ់ត្រូវប្រាសាទជាង៦០កន្លែង៕