អនុរដ្ឋលេខាធិការក្រសួងការបរទេសកម្ពុជា គឺលោក កុយ គួង ដែលជាអ្នកនាំពាក្យក្រសួងផងនោះ បានថ្លែងបន្តថា កម្ពុជាក៏នៅមិនទាន់ចាត់នីតិវិធីបន្តទៀតនៅឡើយទេជុំវិញទង្វើរបស់អាជ្ញាធរកំពង់ផែក្រុងបាងកកនៃប្រទេសថៃនោះ។
លោក កុយ គួង មានប្រសាសន៍ដូច្នេះថា ៖ «មកដល់ពេលនេះ អត់ទាន់ឃើញឆ្លើយអីផង ហើយឥឡូវនេះ យើងកំពុងតែរង់ចាំចម្លើយគេសិនដើម្បីឲ្យគេឆ្លើយតបនឹងកំណត់ក្រសួងដែលយើងបានផ្ញើទៅតាមរយៈទូតថៃ។ អ៊ីចឹង យើងមិនទាន់ធ្វើអីលើសពីហ្នឹងនៅឡើយទេ»។
សូមជម្រាបថា កាលពីថ្ងៃទី២៥ ខែធ្នូ ឆ្នាំ២០០៨ មានអ្នកដំណើរខ្មែរចំនួន ២៦៩នាក់ បានធ្វើដំណើរកម្សាន្តរួមជាមួយអ្នកទេសចរបរទេសដទៃតាមនាវាទេសចរមួយ ឈ្មោះ Jupiter Cruise ផ្ទុកអ្នកដំណើរសរុប ៤៥០នាក់ ក្នុងបំណងចូលកម្សាន្តបុណ្យណូអែលក្នុងក្រុងបាងកក ប៉ាតាយ៉ា និងភូកេត នៃប្រទេសថៃ។
នៅគ្រានោះ អាជ្ញាធរថៃបានអនុញ្ញាតឲ្យចូលតែភ្ញៀវវៀតណាម និងភ្ញៀវបរទេសដទៃទៀតប៉ុណ្ណោះ ក៏ប៉ុន្តែភ្ញៀវខ្មែរទាំងឡាយ គឺអាជ្ញាធរថៃមិនអនុញ្ញាតឲ្យចូលឡើយ ដោយថៃបានដាក់លក្ខខណ្ឌថា ដរាបណាភ្ញៀវទេសចរខ្មែរបង់ប្រាក់កក់ផ្នែកធានាសន្តិសុខចំនួន ១.៥០០ដុល្លារ ទើបគេអនុញ្ញាត ហើយប្រាក់នោះអាចទទួលវិញបាននៅ ៣ខែក្រោយ។
លោក កុយ គួង ចាត់ទុកវិធានការរបស់ថៃ គឺជាទង្វើខុសនឹងច្បាប់ស្តីអំពីកិច្ចព្រមព្រៀងទិដ្ឋាការនិងច្បាប់សមុទ្រអន្តរជាតិ៕