លោកនាយករដ្ឋមន្ត្រីថៃសង្កត់ធ្ងន់ថា ចាប់តាំងពីប្រាសាទព្រះវិហារត្រូវបានប្រកាសជាបេតិកភណ្ឌពិភពលោកកាលពីខែកក្កដា ឆ្នាំ២០០៨មក វាបានជំរុញឲ្យមានបញ្ហាជាច្រើនរវាងកម្ពុជានិងថៃ ហើយថា រដ្ឋាភិបាលថៃនៅតែប្រឆាំងជានិច្ចចំពោះការដាក់បញ្ចូលប្រាសាទព្រះវិហារជាសម្បត្តិពិភពលោកនេះ។
លោកនាយករដ្ឋមន្ត្រីថៃ ថ្លែងយ៉ាងដូច្នេះថា ៖ «យូណេស្កូ គឺជាអង្គការមួយដែលបង្កើតឡើងដើម្បីជំរុញឲ្យមានសន្តិភាព។ យើងឃើញថា មុនពេលដែលមានគំនិតចង់ដាក់បញ្ចូលប្រាសាទព្រះវិហារជាបេតិកភណ្ឌពិភពលោក បញ្ហាតូចតាចតែងតែកើតមានឡើងនៅតំបន់ប្រាសាទព្រះវិហារ ប៉ុន្តែពុំធ្ងន់ធ្ងរឡើយ។ ផ្ទុយទៅវិញ ឥឡូវនេះគំនិតប្រហាក់ប្រហែលគ្នានោះ បែរជានាំមកឲ្យយើងនូវការបាត់បង់និងខូចខាត។ ដូច្នេះហើយ យើងចង់ស្នើសុំឲ្យអង្គការ យូណេស្កូ ពិនិត្យឡើងវិញនូវគោលការណ៍ស្ថាបនារបស់ខ្លួន ព្រមទាំងវាយតម្លៃថាតើជម្លោះដែលកើតឡើងជុំវិញប្រាសាទព្រះវិហារនេះវាផ្ទុយនឹងគោលការណ៍នេះដែរឬទេ?»។
នាយករដ្ឋមន្ត្រីថៃ លោក អាក់ភិស៊ិត វេតឆាឈីវ៉ាក់ ថ្លែងបន្តថា លោកពុំបានលើកយកករណីជម្លោះប្រាសាទព្រះវិហារមកជជែកពិភាក្សាជាមួយលោកនាយករដ្ឋមន្ត្រី ហ៊ុន សែន នៅពេលដែលលោកធ្វើទស្សនកិច្ចនៅទីក្រុងភ្នំពេញ កាលពីសប្តាហ៍មុននោះទេ ប៉ុន្តែលោកសង្ឃឹមថា រាជរដ្ឋាភិបាលខ្មែរនឹងយោគយល់អំពីគោលជំហររបស់រាជរដ្ឋាភិបាលថៃ។
សូមរំឭកជូនថា កាលពីឆ្នាំ១៩៦២ ក្នុងជម្លោះស្តីពីប្រាសាទព្រះវិហារនេះដែរ តុលាការអន្តរជាតិក្រុងឡាអេបានសម្រេចថា ប្រាសាទព្រះវិហារជាសម្បត្តិរបស់ខ្មែរពិតមែន ក៏ប៉ុន្តែប្រទេសកម្ពុជានិងថៃនៅតែឈ្លោះប្រកែកគ្នាអំពីកម្មសិទ្ធិលើតំបន់ជុំវិញប្រាសាទព្រះវិហារនៅឡើយទេ ដែលជាហេតុនាំឲ្យមានការយឺតយ៉ាវក្នុងការបោះបង្គោលព្រំសីមារហូតមកដល់ពេលនេះ៕