លោក ឈឹម ស៊ីវុធ ជំនួយការរបស់អភិបាលខេត្តឧត្តរមានជ័យ បានមានប្រសាសន៍កាលពីព្រឹកថ្ងៃច័ន្ទ ទី១៤ ខែកញ្ញា ថា ក្រុមអ្នកភូមិខ្មែររួមទាំងអ្នករងរបួសនិងសាកសពដែលទាហានថៃបាញ់ស្លាប់ ដោយសារឆ្លងដែនទៅកាប់ឈើគ្រញូងកាលពីថ្ងៃទី១១ ខែកញ្ញា បានវិលមកដល់ផ្ទះសម្បែងពួកគេវិញអស់ហើយ។
មន្ត្រីដដែលបានមានប្រសាសន៍ទៀតថា តាំងតែពីដើមខែសីហា អាជ្ញាធរខេត្តឧត្តរមានជ័យបានចេញសេចក្តីជូនដំណឹងឲ្យស្រុកនិងឃុំទាំងអស់ ទប់ស្កាត់ប្រជាពលរដ្ឋខ្មែរកុំឲ្យឆ្លងដែនចូលទៅព្រំដែនថៃ បន្ទាប់ពីថៃបានប្រកាសតឹងរ៉ឹងជំរុញការការពារព្រៃឈើនៅតាមព្រំដែននោះ ៖ «យើងក៏បានចេញសេចក្ដីជូនដំណឹងឲ្យស្រុកពង្រឹងតាមឃុំ តាមភូមិឲ្យបានដាច់ខាត មិនឲ្យប្រជាពលរដ្ឋឆ្លងទៅផ្ដេសផ្ដាសទេ»។
បុរសម្នាក់ឈ្មោះ ប៉ិល ហាន នៅភូមិក្រូចសាខន សង្កាត់កូនក្រៀល ក្រុងសំរោង ដែលជាអ្នកភូមិម្នាក់ក្នុងចំណោម១១នាក់ទៀតដែលបានឆ្លងដែនចូលទៅកាប់ឈើគ្រញូងក្នុងព្រំដែនថៃ ហើយបានគេចរួចពីការបាញ់រះរបស់ទាហានថៃ បានមានប្រសាសន៍កាលពីព្រឹកថ្ងៃច័ន្ទថា អ្នកភូមិខ្មែរទាំងអស់បានចូលមកដល់ផ្ទះសម្បែងពួកគេគ្រប់គ្នាហើយ។
ចំណែកឯសាកសពរបស់យុវជនខ្មែរម្នាក់ឈ្មោះ ប៉ិល សារិទ្ធ អាយុ១៦ឆ្នាំ មានលំនៅនៅភូមិក្រូចសាខន ក៏ត្រូវបានឪពុកប្តូរជីវិតលូនទៅយកបានមកដែរ បើទោះបីជាទាហានថៃបានប្រើឧទ្ធម្ភាគចក្រនៅតែហោះល្បាតក្បែរៗសាកសពនោះក៏ដោយ។
លោក ប៉ិល ហាន ថ្លែងយ៉ាងដូច្នេះ ៖ «ម្សិលមិញឪពុកសាកសពគាត់លូនចូលយកសាកសពហ្នឹង មិនបានពេញលេញទេ បានត្រឹមដៃជើងបន្តិចៗ សួត និងក្បាលតែប៉ុណ្ណោះឯង។ ឆេះអស់ហើយ គេឃើញចំណងនៅនឹងដៃ ចងដៃមកក្រោយ។ យកសាកសពមកដល់ផ្ទះហើយ»។
មន្ត្រីខេត្តឧត្តរមានជ័យ បានមានប្រសាសន៍ថា ក្នុងការជួបប្រជុំសម្រាប់ខេត្តខ្មែរ-ថៃដែលមានព្រំដែនជាប់គ្នាដើម្បីកិច្ចសហការនៅតាមព្រំដែនជាញឹកញាប់ មន្ត្រីខ្មែរតែងស្នើសុំទៅភាគីថៃកុំឲ្យបាញ់សម្លាប់ទៅលើជនស៊ីវិលខ្មែរដែលបានឆ្លងដែនខុសច្បាប់ទាំងនោះ ក៏ប៉ុន្តែគេឃើញថា មន្ត្រីថៃពុំដែលឆ្លើយតបការស្នើសុំរបស់មន្ត្រីខ្មែរទេ។
មន្ត្រីខេត្តឧត្តរមានជ័យដដែល បានមានប្រសាសន៍ទៀតថា ភាគីខ្មែរតែងតែគោរពមនុស្សធម៌ដែលកន្លងមក ក៏ធ្លាប់ចាប់បានប្រជាពលរដ្ឋថៃដែលតែងលួចឆ្លងចូលដីខ្មែរដើរបាញ់សត្វព្រៃដែរ ប៉ុន្តែកងទាហានខ្មែរមិនដែលបាញ់សម្លាប់ជនស៊ីវិលថៃទាំងនោះទេ មានតែចាប់ខ្លួននិងផ្តល់ចំណីអាហាររង់ចាំមន្ត្រីថៃមកទទួលយកទៅវិញប៉ុណ្ណោះ។
ចៅសង្កាត់កូនក្រៀល លោក ឈុំ ធឿន បានមានប្រសាសន៍ថា សង្កាត់បានទទួលបញ្ជាក់ពីក្រុងឲ្យមេភូមិទាំងអស់ធ្វើការហាមឃាត់ប្រជាពលរដ្ឋយ៉ាងតឹងរ៉ឹងកុំឲ្យឆ្លងដែនចូលដីថៃ ក៏ប៉ុន្តែវិធានការនោះមិនសូវមានប្រសិទ្ធភាពទេដោយសារប្រជាពលរដ្ឋខ្លះគ្មានអាហារគ្រប់គ្រាន់ក៏ចេះតែលបលួចឆ្លងដែនដដែល៕