លោក ថាក់ស៊ីន ស៊ីណាវ៉ាត់ អតីតនាយករដ្ឋមន្ត្រីថៃ បានមកដល់ខេត្តសៀមរាប នៃប្រទេសកម្ពុជាហើយ កាលពីព្រឹកថ្ងៃសៅរ៍ទី១៤ខែមេសា។ យន្តហោះពិសេសផ្ទាល់ខ្លួនរបស់លោកបានចុះចតនៅឯប្រលានយន្តហោះអន្តរជាតិខេត្តសៀមរាបកាលពីវេលាម៉ោងជិត១១ ថ្ងៃត្រង់ ថ្ងៃសៅរ៍។
ទោះយ៉ាងណា លោក ថាក់ស៊ីន មិនបានមានប្រសាសន៍ និងផ្ដល់បទសម្ភាសន៍ឱ្យក្រុមអ្នកកាសែតបានដឹងអំពីគោលបំណងរបស់លោក ដែលមកប្រទេសកម្ពុជាយ៉ាងណានៅឡើយទេ។
មេដឹកនាំក្រុមអាវក្រហមរបស់ថៃមួយរូប បាននិយាយថា ដំណើរមកកាន់កម្ពុជារបស់លោក ថាក់ស៊ីន ពេលនេះ គឺគ្មានបំណងអ្វីក្រៅតែពីការជួបជាមួយនឹងក្រុមអ្នកដែលមានភក្ដីជាមួយរូបលោកនោះទេ។
លោក គ្រើក មន្ទ្រី រូចស៊ូធីរ៉ា ផាត់ (Krirk montri Rujsootira path) ជាអគ្គលេខាធិការរបស់រណសិរ្សរួបរួមប្រឆាំងអំពើផ្ដាច់ការ ដែលហៅកាត់ថា យូ.ឌី.ឌី (UDD)។ លោកបានមានប្រសាសន៍ថា ក្រុមអាវក្រហមថៃរាប់ម៉ឺននាក់ ដែលសំរុកមកកាន់ខេត្តសៀមរាបពេលនេះ គឺបំណងជួបសួរសុខទុកលោក ថាក់ស៊ីន អតីតនាយករដ្ឋមន្ត្រី ដែលពួកគេស្រឡាញ់យ៉ាងខ្លាំង ៖ "ជាច្រើនឆ្នាំមកហើយ ក្រុមអ្នកគាំទ្រលោក ថាក់ស៊ីន មិនដែលបានជួបមុខលោកទេ ពួកគេបានឮតែសំឡេងដែលលោក ថាក់ស៊ីន និយាយតាមវីដេអូខនហ្វឺរ៉ិនតែប៉ុណ្ណោះ។ ប៉ុន្តែថ្ងៃនេះលោកបណ្ឌិត ថាក់ស៊ីន ចង់ជួបមុខពួកយើងទាំងអស់គ្នានៅទីនេះ។ ក្នុងឱកាសនេះផងដែរ ខ្ញុំសូមអរគុណដល់សម្ដេច ហ៊ុន សែន នាយករដ្ឋមន្ត្រីនៃរដ្ឋាភិបាលកម្ពុជា និងប្រជាពលរដ្ឋកម្ពុជា ដែលបានផ្ដល់ទីកន្លែងដ៏ល្អបំផុត ឱ្យពួកយើងបានជួបជាមួយលោក ថាក់ស៊ីន"។
ក្រុមអាវក្រហមថៃ បាននិយាយថា ពួកគេមកដល់ប្រទេសកម្ពុជា គឺមានអារម្មណ៍ថាដូចជានៅនឹងផ្ទះរបស់ពួកគេដែរ ដោយពួកគេមិនព្រួយបារម្ភដល់បញ្ហាអសន្តិសុខកើតមានចំពោះលោក ថាក់ស៊ីន ទេ។
លោកឧត្ដមសេនីយ៍ ហ៊ីង ប៊ុន ហៀង ជាអគ្គបញ្ជាការរងនៃកងយោធពលខេមរៈភូមិន្ទ បានមានប្រសាសន៍ថា នៅក្នុងអំឡុងពេលដែលលោក ថាក់ស៊ីន ស៊ីណាវ៉ាត់ និងក្រុមអាវក្រហមថៃរាប់ម៉ឺននាក់ស្នាក់នៅខេត្តសៀមរាបនេះ គឺអាជ្ញាធរកម្ពុជាមានការធានាសន្តិសុខ១០០ភាគរយដល់ពួកគេ ៖ "យោងតាមបទបញ្ជា និងប្រសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោនាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាឱ្យអគ្គបញ្ជាការកងយោធពលខេមរៈភូមិន្ទ ឱ្យមេបញ្ជាការយោធភូមិភាគ ឱ្យអភិបាលខេត្តក្នុងឋានៈជាមេបញ្ជាការកងឯកភាពខេត្ត រួមសហការជាមួយនឹងកម្លាំងអគ្គស្នងការនគរបាលជាតិ កងរាជអាវុធហត្ថលើផ្ទៃប្រទេស ហើយពិសេសទៀតគឺបញ្ជាការដ្ឋានអង្គរក្ស បានមករួមសហការលើកិច្ចការការពារ ធានាសន្តិសុខជូនឯកឧត្ដម ថាក់ស៊ីន និងសមាជិករបស់បក្សភឿថៃទាំងអស់ ដែលមកកម្សាន្តសប្បាយនៅខេត្តសៀមរាប ទឹកដីព្រះរាជាណាចក្រកម្ពុជានេះ គ្មានអ្វីគួរឱ្យកត់សំគាល់ទេ"។
រហូតមកដល់ថ្ងៃសៅរ៍ ទី១៤ ខែមេសា ក្រុមអាវក្រហមថៃ ដែលជាអ្នកគាំទ្រលោក ថាក់ស៊ីន នៅតែបន្តឆ្លងដែនឆ្ពោះមកកាន់ខេត្តសៀមរាបជាបន្តបន្ទាប់ នៅតាមច្រកព្រំដែនចំនួន៣ គឺច្រកប៉ោយប៉ែត ខេត្តបន្ទាយមានជ័យ ច្រកអូស្មាច់ និងច្រកជាំសាង៉ាំ ខេត្តឧត្តរមានជ័យ។
លោក ថាក់ស៊ីន អតីតនាយករដ្ឋមន្ត្រី ដែលកងយោធាថៃបានធ្វើរដ្ឋប្រហារទម្លាក់ពីតំណែង នឹងឡើងថ្លែងសារលើវេទិកាទៅកាន់ក្រុមអ្នកគាំទ្ររូបលោក នៅវេលាម៉ោងប្រមាណជា ៤រសៀល ថ្ងៃសៅរ៍៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។