កម្ពុជា​ផ្ដល់​មេដាយ​កិត្តិយស​ដល់​អតីត​ឥស្សរជន​នយោបាយ​មួយ​ចំនួន

អតីត​នាយករដ្ឋមន្ត្រី​ថៃ និង​ឥស្សរជន​នយោបាយ​ជាន់​ខ្ពស់​នៃ​ប្រទេស​កូរ៉េ​ខាង​ត្បូង ឥណ្ឌូណេស៊ី ហ្វីលីពីន និង​ថៃ បាន​ទទួល​គ្រឿង​ឥស្សរិយយស​ពី​មេដឹកនាំ​នៃ​ប្រទេស​កម្ពុជា ដោយសារ​តែ​បាន​កសាង​ស្នាដៃ​ឆ្នើម​កន្លង​មក​ក្នុង​ការ​ដឹកនាំ​ប្រទេស។

0:00 / 0:00

លោក​នាយករដ្ឋមន្ត្រី ហ៊ុន សែន នៅ​ថ្ងៃ​ទី​១៩ ខែ​កញ្ញា ឆ្នាំ​២០១១ បាន​បំពាក់ ឬ​ប្រគល់​គ្រឿង​ឥស្សរិយយស​ជូន​ឥស្សរជន​នយោបាយ​ជាន់​ខ្ពស់​ចំនួន ១០​នាក់​នៅ​តំបន់​អាស៊ី រាប់​ទាំង​អតីត​នាយករដ្ឋមន្ត្រី​ថៃ គឺ​លោក ថាក់ស៊ីន ស៊ីនណាវ៉ាត់ (Thaksin Shinawatra) ដោយសារ​តែ​បាន​កសាង​ស្នាដៃ​ឆ្នើម​កន្លង​មក​ក្នុង​ការ​អភិវឌ្ឍ​ប្រទេស​ជាតិ ផ្សះផ្សា​ជាតិ និង​ការ​បង្រួបបង្រួម​ជាតិ។

ពិធី​នេះ​បាន​ធ្វើ​ឡើង​នៅ​ឯ​វិមាន​សន្តិភាព ក្នុង​រាជធានី​ភ្នំពេញ ដោយ​មាន​ការ​ចូលរួម​ពី​លោក សុខ អាន រដ្ឋមន្ត្រី​ទទួល​បន្ទុក​ទីស្ដីការ​គណៈរដ្ឋមន្ត្រី និង​ជា​ឧបនាយករដ្ឋមន្ត្រី និង​លោក ហោ ណាំហុង រដ្ឋមន្ត្រី​ក្រសួង​ការបរទេស និង​ជា​ឧបនាយករដ្ឋមន្ត្រី ព្រមទាំង​មាន​មន្ត្រី​ជាន់​ខ្ពស់​មួយ​ចំនួន​ទៀត។

លោក​នាយករដ្ឋមន្ត្រី ហ៊ុន សែន បាន​មាន​ប្រសាសន៍​នៅ​ក្នុង​ពិធី​នោះ​ថា មាន​ស្នាដៃ​ជា​ច្រើន​កន្លង​មក​បាន​ញ៉ាំង​ឲ្យ​ក្រុមប្រឹក្សាភិបាល​នៃ​អង្គការ ខាបឌី ( CAPDI ) សម្រេច​ប្រគល់​គ្រឿង​ឥស្សរិយយស​ដល់​អ្នក​ទាំង​នោះ។

លោក​ថ្លែង​បន្ត​ដូច្នេះ ៖ «ការ​ប្ដេជ្ញា​ចិត្ត​ក្នុង​ការ​កសាង​សង្គម​មួយ​ដែល​នឹង​នាំ​មក​ជូន​ដល់​ប្រជាជន​នូវ​សុខ​សន្តិភាព ការ​អភិវឌ្ឍ និង​ជីវភាព​រស់​នៅ សម្បូរ​សប្បាយ ប្រកប​ដោយ​ភាព​សុខដុមរមនា​លើ​មូលដ្ឋាន​នៃ​ការ​យោគយល់​អធ្យាស្រ័យ​គ្នា។ ការ​មិន​រើស​អើង និង​ការ​ទទួល​ស្គាល់ និង​គោរព​ដល់​ពហុ​ជាតិ ខាង​កងទ័ព ទំនៀម​ទម្លាប់ ប្រពៃណី ជំនឿ​សាសនា និង​ទស្សនវិជ្ជា​របស់​ជាតិ​សាសន៍ និង​បុគ្គល​នីមួយៗ»

ឥស្សរជន​នយោបាយ​ជាន់​ខ្ពស់​ទាំង​នោះ គឺ​ជា​សមាជិក និង​ថ្នាក់ដឹកនាំ​នៃ​អង្គការ​ខាបឌី ដែល​មាន​ន័យ​ថា អ្នក​ប្រជាធិបតេយ្យ​និយម​កណ្ដាល​អាស៊ី​ប៉ាស៊ីហ្វិក អន្តរជាតិ (Centrist Asia Pacific Democrat International )។

ឥស្សរជន​ទាំង ១០​នាក់​នោះ មាន ទី​១ អតីត​នាយករដ្ឋមន្ត្រី​ថៃ លោក ថាក់ស៊ីន ស៊ីនណាវ៉ាត់ ទី​២ អតីត​ប្រធាន​តុលាការ​កំពូល​នៃ​ប្រទេស​ហ្វីលីពីន គឺ​លោក រីណាតូ ពូណូ ( Reynato Puno) ទី​៣ អតីត​រដ្ឋមន្ត្រី​ការបរទេស​ថៃ លោក ណុបប៉ាដុន ប៉ាតាម៉ា ( Noppadon Pattama) ទី​៤ អនុ​រដ្ឋមន្ត្រី​ក្រសួង​ការបរទេស​ឡាវ គឺ​លោក ថងឡូន ស៊ីស៊ូលីត (Thongloun Sisoulith) ទី​៥ អតីត​សមាជិក​សភា​នៃ​ប្រទេស​ឥណ្ឌូណេស៊ី លោក អ៊ីស្កានដា ម៉ាន់ជី (Iskandar Mandji) ទី​៦ អតីត​សមាជិក​សភា​នៃ​ប្រទេស​ឥណ្ឌូណេស៊ី គឺ​លោក យ៉ាស៊្រីល អាណាន់តា ( Yasril Ananta ) ទី​៧ អតីត​ឯកអគ្គរដ្ឋទូត​នៃ​ប្រទេស​កូរ៉េ​ខាង​ត្បូង ប្រចាំ​នៅ​អង្គការ​សហប្រជាជាតិ លោក ជុង អ៊ូយ៉ុង (Chung Eui-yong) ទី​៨ អតីត​ប្រធាន​ប្រតិភូ​នៃ​ប្រទេស​ប៉ាគីស្ថាន ប្រចាំ​នៅ​គណៈកម្មាធិការ​សិទ្ធិ​មនុស្ស​របស់​អង្គការ​សហប្រជាជាតិ​ក្រុង​ហ្សឺណែវ (Geneva) ទី​៩ គឺ​ប្រធាន​នៃ​អង្គការ ខាបឌី និង​ជា​ប្រធាន​នៃ​អាយខាប ( ICAPP ) លោក ចូសេ ដេ វីនីហ្សៀ (Jose De Venacia) និង​ទី​១០ គឺ​អតីត​អនុ​ប្រធានាធិបតី​នៃ​ប្រទេស​ឥណ្ឌូណេស៊ី លោក មហាម៉ាត់ ជូស៊ូ កាឡា (Muhammad Jusukala)។

ឥស្សរជន​ទាំង​នោះ កំពុង​តែ​បំពេញ​ទស្សនកិច្ច​នៅ​ប្រទេស​កម្ពុជា ដែល​បាន​ចូលរួម​បើក​វេទិកា​អន្តរជាតិ​ស្ដីពី​ការ​ប្រកួតប្រជែង និង​ការ​រីក​ចម្រើន​នៃ​សតវត្ស​អាស៊ី៕