អតីតនាយករដ្ឋមន្ត្រីថៃ ដែលត្រូវបានបណ្ដេញចេញពីតំណែងដោយរដ្ឋប្រហារ គឺលោក ថាក់ស៊ីន ស៊ីណាវ៉ាត្រ (Thaksin Shinawatra) នឹងជួបមេដឹកនាំកម្ពុជា និងអ្នកវិនិយោគទុនដើម្បីជជែកពិភាក្សាអំពីលទ្ធភាពធ្វើវិនិយោគលើសម្បទានប្រេង និងឧស្ម័នធម្មជាតិក្នុងឈូងសមុទ្រថៃ ដែលប្រទេសទាំងពីរទាមទារសិទ្ធិកាន់កាប់នៅក្នុងដំណើរទស្សនកិច្ចមកកម្ពុជា រយៈពេលពីរថ្ងៃនៅចុងសប្ដាហ៍នេះ។
លោក ថាក់ស៊ីន ក៏បានស្នើសុំឲ្យរដ្ឋមន្ត្រីថាមពលថៃ សហការជាមួយកម្ពុជា ទាក់ទងនឹងការធ្វើជំនួញលើផ្នែកថាមពលផងដែរ។
យោងតាមកាសែត ឌឹ ណេហ្សិន (The Nation) របស់ថៃ ចេញផ្សាយថ្ងៃទី១៦ ខែសីហា នេះ ក្នុងដំណើរទស្សនកិច្ចមកដល់កម្ពុជា នៅថ្ងៃសុក្រ ទី១៩ ខែសីហា លោកថាកស៊ីន នឹងនាំអ្នកវិនិយោគទុនបរទេសមួយចំនួនមកជួប និងលេងកូនគោលជាមួយលោកនាយករដ្ឋមន្ត្រី ហ៊ុន សែន ដែលមានរដ្ឋមន្ត្រីការពារជាតិកម្ពុជា លោក ទៀ បាញ់ ចូលរួមផងដែរ។
ទោះបីជាយ៉ាងណាក៏ដោយ គេនៅមិនទាន់ដឹងច្បាស់នៅឡើយទេអំពីដំណោះស្រាយព្រំដែនសមុទ្ររវាងប្រទេសថៃ និងកម្ពុជា ដោយសារតែអតីតនាយករដ្ឋមន្ត្រីថៃ លោក អាភីស៊ិត បានលប់ចោលអនុស្សរណៈយោគយល់គ្នាឆ្នាំ២០០១ ដែលថៃ បានចុះហត្ថលេខាជាមួយកម្ពុជា។
ថ្មីៗនេះគេសង្កេតឃើញ លោក ថាក់ស៊ីន អតីតនាយករដ្ឋមន្ត្រីថៃ ដែលកំពុងនិរទេសខ្លួននៅក្រៅប្រទេសថៃ បន្ទាប់ពីបានព្យាយាមរត់គេចពីការតាមចាប់របស់តុលាការពីបទពុករលួយ បានព្យាយាមបង្ហាញមុខសាជាថ្មីនៅលើឆាកអន្តរជាតិ បន្ទាប់ពីប្អូនស្រីរបស់លោក គឺអ្នកស្រី យីងឡាក់ ស៊ីណាវ៉ាត្រ (Yingluck Shinawatra) ជាប់ឆ្នោតជានាយករដ្ឋមន្ត្រី៕