សិស្ស​វិទ្យាល័យ​ថ្មពួក​ខេត្ត​បន្ទាយមានជ័យ​តវ៉ា​សុំ​ប្ដូរ​គ្រូ​បង្រៀន

សិស្ស​វិទ្យាល័យ​ថ្មពួក ខេត្ត​បន្ទាយមានជ័យ ជាច្រើន​នាក់​បាន​ប្រតិកម្ម​តវ៉ា​ប្រឆាំង​នឹង​អ្នក​គ្រប់គ្រង​សាលា ដែល​ប្ដូរ​គ្រូ​បង្រៀន​មុខ​វិជ្ជា​រូបវិទ្យា​នៅ​ថ្នាក់​ទី១២ ដែល​កំពុង​បង្រៀន​ពួក​គេ​សព្វថ្ងៃ។
ដោយ សួន សុផលមុន្នី
2012-11-09
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ប្រតិកម្ម​នេះ ធ្វើ​ឡើង​តាម​រយៈ​ការ​ប្រមូល​ផ្ដុំ​គ្នា​នៅ​ខាង​មុខ​អគារ​ទីចាត់ការ​សាលា កាល​ពី​ថ្ងៃ​ទី៨ ខែ​វិច្ឆិកា ដើម្បី​ទាម​ទារ​ឲ្យ​អ្នក​គ្រប់គ្រង​សាលា​ទទួល​យក​សំណើ​របស់​ពួក​គេ​ចំនួន​ពីរ​ចំណុច។

ចំណុច​ទី១ ពួក​គេ​សុំ​ប្ដូរ​គ្រូ​បង្រៀន​មុខ​វិជ្ជា​រូបវិទ្យា​នៅ​ថ្នាក់​ទី១២​អា (12A) និង​ទី១២​បេ (12B) ម្នាក់​ចេញ ជំនួស​ដោយ​គ្រូ​បង្រៀន​ចាស់ និង​ចំណុច​ទី២ ពួក​គេ​បដិសេធ​មិន​ព្រម​ដើរ​រើស​សំរាម​ដើម្បី​ទុក​ពេល​វេលា​ឲ្យ​បាន​គ្រប់គ្រាន់​សម្រាប់​រៀន​សូត្រ។

សិស្ស​សាលា​ឈ្មោះ រ៉ា មា រៀន​នៅ​ថ្នាក់​ទី​១២​អា នៃ​វិទ្យាល័យ​ថ្មពួក បាន​ថ្លែង​ថា សិស្ស​ថ្នាក់​ទី១២ ទាំង​អស់ មាន​ការ​ខក​ចិត្ត​យ៉ាង​ខ្លាំង​ចំពោះ​ករណី​ទាំង​ពីរ​ចំណុច ដូច្នេះ​ហើយ​ពួក​គេ​សុំ​ឲ្យ​សាលា​កែ​សម្រួល​ឡើង​វិញ។ គ្រូ​បង្រៀន​ឈ្មោះ កែវ សារឿន ធ្លាប់​តែ​បង្រៀន​ថ្នាក់​ទី១០ និង​ទី១១ មិន​អាច​ទៅ​បង្រៀន​នៅ​ថ្នាក់​ទី១២ បាន​ទេ៖ «ទាម​ទារ​កុំ​ឲ្យ​ថ្នាក់​ទី១២ ធ្វើ​ពលកម្ម និង​ទាម​ទារ​ឲ្យ​គ្រូ​ចាស់​ចូល​បង្រៀន​វិញ។ ហ្នឹង​ហើយ គាត់​បង្រៀន​រូប​មន្ត​ថ្នាក់​ទី១១ ពេល​គាត់​ចូល​បង្រៀន អ៊ីចឹង​ដាក់​ម៉ោង​ខ្លះ​ជាន់​គ្នា​ជាមួយ​ថ្នាក់​ទី១១ ជាមួយ​១២ ម៉ោង​ប៉ះ​ថ្នាក់​១២​បេ គាត់​ត្រូវ​ជាន់​ម៉ោង​ជាមួយ​១១​បេ។ អ៊ីចឹង​ហើយ គាត់​ទៅ​បង្រៀន​តែ​១១។ ១២​អត់​បាន​បង្រៀន ពី​មុន​មក​គាត់​បង្រៀន​តែ​ថ្នាក់​ទី១១»

វិទ្យុ​អាស៊ី​សេរី មិន​អាច​ទាក់​ទង​លោកគ្រូ កែវ សារឿន ដើម្បី​សុំ​ប្រតិកម្ម​តប​ជុំវិញ​ករណី​នេះ​បាន​ទេ​នៅ​ថ្ងៃ​សុក្រ ទី៩ ខែ​វិច្ឆិកា។ លោក សៅ នី ជា​គ្រូ​បង្រៀន​មុខ​វិជ្ជា​រូបវិទ្យា នៅ​ថ្នាក់​ទី​១២​សេ និង​ដេ បាន​ថ្លែង​ថា លោក​ធ្លាប់​បង្រៀន​មុខ​វិជ្ជា​រូបវិទ្យា នៅ​ថ្នាក់​ទី១២ គ្រប់​ថ្នាក់ នៅ​វិទ្យាល័យ​ថ្មពួក តាំង​ពី​ឆ្នាំ​១៩៩៣។ ប៉ុន្តែ នៅ​ខែ​តុលា ឆ្នាំ​២០១២ ស្រាប់​តែ​អ្នក​គ្រប់គ្រង​សាលា និង​ការិយាល័យ​អប់រំ​ស្រុក មន្ទីរ​អប់រំ​ខេត្ត បាន​បន្ថែម​លោកគ្រូ កែវ សារឿន ទៅ​ឲ្យ​បង្រៀន​នៅ​ថ្នាក់​ទី១២​អា និង​១២​បេ នោះ។

បុគ្គលិក​ទីចាត់ការ​នៃ​អនុវិទ្យាល័យ​ថ្មពួក ឈ្មោះ ជិន ពិន បាន​ថ្លែង​ថា ករណី​តវ៉ា​របស់​សិស្ស គឺ​ដោយ​សារ​កំហុស​បច្ចេកទេស​យក​គ្រូ​ថ្នាក់​ទី១០ ទី១១ ទៅ​បង្រៀន​ថ្នាក់​ទី១២៖ «អា​ហ្នឹង ការ​មិន​ពេញ​ចិត្ត​របស់​ក្មេង វា​ខ្លាច​ប្រឡង​ទៅ​វា​ធ្លាក់។ ការ​បង្រៀន​អត់​សូវ​យល់​អត់​សូវ​អី​ទៅ វា​ចេះ​តែ​ទាម​ទារ​រក​គ្រូ​ជើង​ចាស់​ទៅ​វិញ។ គ្រូ​នោះ​គាត់​ធ្លាប់​បង្រៀន​តែ​ថ្នាក់​ទី១០ ទី១១ ទេ មិន​ដែល​បង្រៀន​ថ្នាក់​ទី១២ ទេ។ អា​ហ្នឹង​សរុប​មក​ខុស​បច្ចេកទេស អត់​មាន​ពាក់ព័ន្ធ​នយោបាយ​ទេ»

ការ​តវ៉ា​របស់​សិស្ស​ថ្នាក់​ទី១២ នៅ​វិទ្យាល័យ​ថ្មពួក រហូត​មក​ដល់​ពេល​នេះ មិន​ទាន់​មាន​ការ​ដោះស្រាយ​ទេ ដោយ​សារ​លោក ស្រឿង សឿង ជា​នាយក​ក្ដាប់​រួម​នៃ​វិទ្យាល័យ​ថ្មពួក ជាប់​រវល់​ជូន​គ្រួសារ​ទៅ​ព្យាបាល​ជំងឺ​នៅ​ប្រទេស​ថៃ។ លោក ចន សុភា ជា​គ្រូ​បង្រៀន​នៅ​វិទ្យាល័យ​ថ្មពួក ដែរ​នោះ បាន​គាំទ្រ​ចំពោះ​ការ​តវ៉ា​របស់​សិស្ស​ថ្នាក់​ទី១២។

ការងារ​អនាម័យ ជា​ធម្មតា​សាលា​បាន​ដាក់​ចូល​ក្នុង​អង្គ​ប្រជុំ​កាល​ពី​ឆ្នាំ​មុន សម្រាប់​ថ្នាក់​ដែល​ប្រឡង​ថ្នាក់​ជាតិ។ ដូច្នេះ សិស្ស​ថ្នាក់​ទី៩ និង​ថ្នាក់​ទី១២ សាលា​ពុំ​ដែល​បាន​ប្រើ​នោះ​ទេ។ សាលា​ប្រើ​បាន លុះ​ត្រា​មាន​នាយក​រដ្ឋមន្ត្រី អ្នក​ធំ​ណា​ទៅ​ធ្វើ​ទស្សនកិច្ច​វិទ្យាល័យ​ថ្មពួក ឬ​ស្រុក​ថ្មពួក បាន​សាលា​អញ្ជើញ​ឲ្យ​សិស្ស​គ្រប់​ថ្នាក់​ទាំង​អស់​ជួយ​ធ្វើ​ពលកម្ម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល