ដោយមើលឃើញថា កិច្ចព្រមព្រៀងនេះមិនសូវមាននរណាយកចិត្តទុកដាក់ចាត់ទុកជាឯកសារប្រវត្តិសាស្រ្តដ៏សំខាន់សម្រាប់ដោះស្រាយរឿងជាប្រយោជន៍ជាតិធំៗនោះ សហគមន៍ខ្មែរពីរដ្ឋនានា បានផ្តោតលើកិច្ចប្រឹងប្រែងរកស្នាមមេដៃពលរដ្ឋខ្មែរ ឲ្យបាន១លាននាក់។
តើគេយកស្នាមមេដៃទាំងនោះទៅធ្វើអ្វី? ខាងក្រោមនេះជាការសន្ទនារវាងលោក ហាស់ សាន នៃវិទ្យុអាស៊ីសេរី និងលោក សួន សេរីរដ្ឋា បេសកជននៃគណៈកម្មការប្រព្រឹត្តិកម្មដើម្បីយុត្តិធម៌និងសមធម៌ នៅសហរដ្ឋអាមេរិក ដែលជាវាគ្មិនក្នុងពេលជួបជុំគ្នានោះអំពីការប្រមូលស្នាមមេដៃ ១លាននាក់នោះ។
ហាស់ សាន ៖ ការប្រមូលស្នាមមេដៃប្រជាពលរដ្ឋខ្មែរមួយលាននាក់ តើលោកយកទៅធ្វើអ្វី ហើយមានប្រសិទ្ធភាពប៉ុណ្ណា ហើយខ្មែរនៅឯណាខ្លះ?
សួន សេរីរដ្ឋា ៖ ស្នាមមេដៃមួយលាននាក់ គឺយើងប្រមូលពីប្រជាពលរដ្ឋខ្មែរនៅក្នុងប្រទេស ហើយនិងនៅក្រៅប្រទេស គឺយើងមានបំណងនឹងដាក់ប្ដឹងទៅក្រុមប្រឹក្សាសន្តិសុខអង្គការសហប្រជាជាតិ និងទៅប្រទេសជាហត្ថលេខីនៃកិច្ចព្រមព្រៀងទីក្រុងប៉ារីសទាំងអស់ ដើម្បីឲ្យគាត់ទទួលយកដំណោះស្រាយកម្ពុជា តាមរយៈកិច្ចព្រមព្រៀងក្រុងប៉ារីសឡើងវិញ។
យើងអត់មានសង្ឃឹមថា រដ្ឋាភិបាលក្រុងភ្នំពេញបច្ចុប្បន្ន នឹងធ្វើការប្ដឹងទៅអង្គការសហប្រជាជាតិទេ ហើយក៏យើងអត់មានសង្ឃឹមថា អតីតក្រុមប្រឹក្សាជាតិជាន់ខ្ពស់កម្ពុជា (SNC) ដែលមានភារកិច្ចជាអ្នកតាមដាននិងឃ្លាំមើលការអនុវត្តកិច្ចព្រមព្រៀងក្រុងប៉ារីសនោះ នឹងហ៊ានប្ដឹងទៅអង្គការសហប្រជាជាតិដែរ។
ដូច្នេះជម្រើសចុងក្រោយរបស់យើង គឺមានតែពលរដ្ឋខ្មែរត្រូវធ្វើការប្ដឹងទៅអង្គការសហប្រជាជាតិ (អ.ស.ប.) ដោយខ្លួនឯង។ ចំពោះប្រសិទ្ធភាព គឺយើងសង្ឃឹមថា មានប្រសិទ្ធភាព ព្រោះប្រជាពលរដ្ឋមួយលាននាក់ គឺ ១០% នៃប្រជាពលរដ្ឋខ្មែរទូទាំងប្រទេស ដូច្នេះអង្គការសហប្រជាជាតិត្រូវតែទទួលយក។
ហាស់ សាន ៖ តើមកទល់ពេលនេះ លោកប្រមូលបានស្នាមមេដៃចំនួនប៉ុន្មានហើយ?
សួន សេរីរដ្ឋា ៖ ដូចខ្ញុំបានជម្រាបជាមួយនឹងសហគមន៍ខ្មែរនៅក្នុងទីក្រុងវ៉ាស៊ីនតុន ឌីស៊ី កាលពីថ្ងៃម្សិលមិញ គឺថា នៅក្នុងប្រទេស យើងទទួលបានស្នាមមេដៃចំនួន ៤២.០៧៦នាក់រួចមកហើយ ដូច្នេះយើងត្រូវការការគាំទ្ររបស់ប្រជាពលរដ្ឋខ្មែរនៅក្រៅប្រទេស។
ហាស់ សាន ៖ ប្រហែលជាប៉ុន្មានខែទៀត ដែលលោកសង្ឃឹមថា នឹងបានចំនួន ១លាននាក់នោះ? ហើយរយៈពេលដែលធ្វើការហ្នឹងប៉ុន្មានខែមកហើយ?
សួន សេរីរដ្ឋា ៖ តាមពិតទៅ យុទ្ធនាការប្រមូលស្នាមមេដៃមួយលាននាក់នេះ គឺយើងទើបតែបានធ្វើក្នុងរយៈពេល ២សប្ដាហ៍កន្លងមកនេះទេ យើងគិតថា ក្នុងរយៈពេល ៣០សប្ដាហ៍ ឬក៏ ២៥សប្ដាហ៍ យើងនឹងទទួលបានតាមការកំណត់មួយលាននាក់ ដើម្បីនឹងដាក់បណ្ដឹងទៅអង្គការសហប្រជាជាតិដូចយើងត្រៀមទុកអ៊ីចឹង។
ហាស់ សាន ៖ តើមានក្រុមណាដែលជួយគាំទ្រសកម្មភាពរបស់លោក? អង្គការ ឬក៏ប្រភពណា?
សួន សេរីរដ្ឋា ៖ តាមដែលយើងរៀបចំធ្វើកន្លងមកនៅក្នុងនិងក្រៅប្រទេស គឺយើងមានគណៈកម្មការប្រព្រឹត្តិកម្មខ្មែរដើម្បីយុត្តិធម៌និងសមធម៌ គឺជាអ្នកឈានមុខ អ្នកដឹកនាំ ហើយមានសម្ព័ន្ធកម្ពុជាដើម្បីសេរីភាពនៅក្រៅប្រទេស រួមជាមួយនឹងក្លឹបនិស្សិតបញ្ញវន្តខ្មែរ នៅក្រៅប្រទេស ជាមួយនឹងសហគមន៍ខ្មែរនៅក្នុងរដ្ឋមីនីសូតា រដ្ឋកាលីហ្វ័រញ៉ា និងសហគមន៍ខ្មែរក្នុងទីក្រុងវ៉ាស៊ីនតុន ឌីស៊ី។ ចំណែកនៅក្នុងប្រទេស គឺយើងមានក្រុមការងារនិងសកម្មជនជាបណ្ដាញ NGO Network ហើយនិងក្រុមការងារសកម្មថ្នាក់មូលដ្ឋានមួយចំនួនទៀត ដើម្បីតស៊ូមតិនិងដើម្បីសេរីភាពនៅកម្ពុជា៕