ឧបនាយករដ្ឋមន្រ្តីនិងជារដ្ឋមន្រ្តីក្រសួងការពារជាតិគឺលោកនាយឧត្តមសេនីយ៍ ទៀ បាញ់ បានមានប្រសាសន៍បដិសេធខ្លីទៅកាន់វិទ្យុអាស៊ីសេរីកាលពីរសៀលនេះថា ពុំមានព្រឹត្តិការណ៍ដូចពាក្យលេចឮនោះឡើយ ៖ «ទៅជឿចចាមអារ៉ាមហ្នឹង... ថាគ្មានគេចាប់ គេចោទអីឯណា! អត់មានទេ...»។
ពាក្យចចាមអារ៉ាមអំពីការនាំខ្លួនលោកនាយឧត្តមសេនីយ៍ កែ គឹមយ៉ាន និងលោកឧត្តមសេនីយ៍ ឈិន ចាន់ពណ៌ អតីតមេបញ្ជាការរងកងរាជអាវុធហត្ថជាតិ និងឃាត់ខ្លួនមន្រ្តីយោធាជាន់ខ្ពស់ទាំងពីររូបនេះបានលេចឮនៅក្នុងមជ្ឈដ្ឋានមន្រ្តីជាន់ខ្ពស់និងអ្នកនយោបាយមួយចំនួន។
លោករដ្ឋលេខាធិការ ផៃ ស៊ីផាន នៃទីស្តីការគណៈរដ្ឋមន្រ្តីដែលបានស្តីបន្ទោសចំពោះអ្នកដែលបានធ្វើឲ្យលេចឮនូវសេចក្តីរាយការណ៍សម្ងាត់ដែលជាកម្មសិទ្ធិផ្តាច់មុខរបស់រដ្ឋាភិបាលស្តីពីអង្គប្រជុំរបស់គណៈរដ្ឋមន្រ្តីចុះថ្ងៃទី២៩ ខែមករា ទាក់ទងនឹងការសម្រេចចាត់វិធានការផ្លូវច្បាប់កាលពីពេលថ្មីៗនេះបានមានប្រសាសន៍ថា លោកមិនទាន់អាចបញ្ជាក់ជាផ្លូវការអំពីដំណឹងឃាត់ខ្លួននេះបានឡើយ។
លោក ផៃ ស៊ីផាន បានមានប្រសាសន៍ថា ៖ «ចំពោះម៉ោងនេះផ្អើលពេញស្រុកថាគេឃាត់ឯកឧត្ដម កែ គឹមយ៉ាន អញ្ជើញគាត់ទៅនៅក្នុងកន្លែងកងរាជអាវុធហត្ថការពារផ្ទៃប្រទេស អាហ្នឹងវាជា Rumor (ពាក្យចចាមអារ៉ាម)។ ខ្ញុំអត់ដឹងសាច់រឿងទេ ខ្ញុំឆ្លើយតបមិនបានទេពីព្រោះវាថ្មីពេក ហើយព័ត៌មាននេះជាព័ត៌មានឮតាមគេ ឮតាមថា ដឹងតាមគេ គេហ្នឹងដឹងតគ្នា មិនទាន់ថាព័ត៌មានហ្នឹងជាព័ត៌មានពិតប្រាកដដែលអាចផ្សព្វផ្សាយជាសាធារណៈបានទេ លើកលែងតែអ្នកធ្វើព័ត៌មានហ្នឹងស៊ើបសួរបញ្ជាក់ច្បាស់ពីអាជ្ញាធរឬមន្ត្រីដែលពាក់ព័ន្ធទទួលការខុសត្រូវក្នុងហ្នឹង»។
វិទ្យុអាស៊ីសេរីបានព្យាយាមធ្វើការទាក់ទងមន្រ្តីផ្លូវការនៃបញ្ជាការដ្ឋានកងរាជអាវុធហត្ថការពារលើផ្ទៃប្រទេសដើម្បីសុំសេចក្តីបញ្ជាក់អំពីវត្តមានរបស់លោកនាយឧត្តមសេនីយ៍ កែ គឹមយ៉ាន នៅទីនោះ ប៉ុន្តែសេចក្តីព្យាយាមនោះពុំបានសម្រេចនៅឡើយទេ។
ទោះបីយ៉ាងណាក្តីប្រភពជិតស្និទ្ធនឹងទីបញ្ជាការដ្ឋាននៃកងរាជអាវុធហត្ថការពារលើផ្ទៃប្រទេសដែលបានមានប្រសាសន៍ក្នុងលក្ខខណ្ឌមិនឲ្យបញ្ចេញឈ្មោះបានឲ្យដឹងថា ព័ត៌មានលេចឮនោះជារឿងពិត។
សុន ឆ័យ ប្រតិកម្មចំពោះការចាត់វិធានការរបស់រដ្ឋាភិបាលទៅលើ នាយឧត្តមសេនីយ៍ កែ គឹមយ៉ាន
ក្នុងចម្លើយទៅនឹងវិធានការថ្មីៗដែលរដ្ឋាភិបាលកម្ពុជាអាចនឹងចាត់ទៅលើការជាប់ពាក់ព័ន្ធនៃលោកនាយឧត្តមសេនីយ៍ កែ គឹមយ៉ាន ទៅនឹងការរកស៊ីនិងមានកម្មសិទ្ធិដីធ្លីនោះ លោក សុន ឆ័យ ប្រធានក្រុមអ្នកតំណាងរាស្ត្រគណបក្សសមរង្ស៊ីមានប្រសាសន៍ថា គេគប្បីចាត់ការរឿងនេះជាបែបប្រព័ន្ធច្បាប់ មិនមែនតាមរបៀបមេដឹកនាំកំពូលបែបនេះទេ។
លោក សុន ឆ័យ បានបញ្ជាក់ថា ៖ «យើងមិនដែលឃើញក្នុងប្រទេសណាមួយការចាត់វិធានការបែបនេះគឺត្រូវតែចេញពីថ្នាក់ដឹកនាំកំពូលរបស់ជាតិ អត់ទេ គឺចេញពីយន្តការរបស់ជាតិគេ មានស្ថាប័នគេស៊ើបអង្កេតហើយគេតម្រូវឲ្យធ្វើជាបណ្ដឹងទៅតុលាការជាដើមដែលគេធ្វើ។ កាលណាមានការបញ្ជាចុចចំឈ្មោះជាបុគ្គល ចង់មិនចង់វាអាចក្លាយទៅជាការលូកដៃដោយប្រការណាមួយទៅក្នុងប្រព័ន្ធយុត្តិធម៌របស់ជាតិ ដូច្នេះបានជាប្រទេសយើងជាទូទៅមានការរិះគន់ថា វាហាក់ដូចជាចង្អុលចំតែបុគ្គលម្នាក់ ប៉ុន្តែវាមានការពាក់ព័ន្ធមនុស្សជាច្រើនប្រើប្រាស់បែបហ្នឹងដូចៗគ្នា ដូច្នេះវាត្រូវតែមានយន្តការមួយរៀបរយទាំងអស់ ចៀសវាងកុំឲ្យមានការចោទប្រកាន់ថា ដោយសារតែមានទំនាស់ផ្ទាល់ខ្លួនហ្នឹងបានជារដ្ឋាភិបាលចាត់វិធានការទៅលើបុគ្គលណាមួយ ឯការប្រព្រឹត្តល្មើសដូចគ្នាឬក៏អាក្រក់ជាងសម្រាប់អ្នកដទៃដែលមិនមានទំនាស់ជាបុគ្គលជាមួយថ្នាក់ដឹកនាំនោះ គឺគាត់រួចខ្លួន»៕