ប៉ុន្តែលោកបានទទួលស្គាល់ថា នាយទាហានជាន់ខ្ពស់មួយចំនួននៃក្រសួងការពារជាតិ បានត្រូវសហរដ្ឋអាមេរិកបដិសេធមិនផ្ដល់ទិដ្ឋាការ ឬវីសា ឲ្យចូលប្រទេសអាមេរិកឡើយ ដោយសារករណីរំលោភសិទ្ធិមនុស្សនេះ។
សេចក្ដីបដិសេធនិងការទទួលស្គាល់របស់លោករដ្ឋមន្រ្តី ទៀ បាញ់ នេះ បានធ្វើឡើងក្នុងពេលឆ្លើយតបទៅនឹងសំណួររបស់អ្នកផ្សាយសំឡេងវិទ្យុអាស៊ីសេរី និងវិទ្យុសំឡេងសហរដ្ឋអាមេរិក វីអូអេ កាលពីព្រលឹមថ្ងៃអង្គារ ទី២២ ខែកញ្ញានេះ បន្ទាប់ពីលោកបានបញ្ចប់ជំនួបផ្លូវការជាមួយនឹងសមភាគីរបស់លោក គឺលោក រ៉ូប៊ើត ហ្កេតស៍ (Robert Gates) រដ្ឋមន្រ្តីក្រសួងការពារជាតិប្រទេសអាមេរិកនៅរសៀលថ្ងៃច័ន្ទ ដែលត្រូវនឹងពេលរំលងអធ្រាត្រម៉ោងនៅកម្ពុជា រួចមកនេះ។
ឆ្លើយនឹងសំណួររបស់វិទ្យុអាស៊ីសេរីស្ដីពីសំណួររបស់អ្នកតំណាងរាស្រ្ដអាមេរិក ៨នាក់ ដែលតម្រូវឲ្យលោករដ្ឋមន្រ្តីការពារជាតិ រ៉ូប៊ើត ហ្កេតស៍ ឆ្លើយតបអំពីការជាប់ទាក់ទងរបស់កងយោធពលខេមរភូមិន្ទក្នុងកងពលមួយចំនួន ក្នុងការរំលោភសិទ្ធិមនុស្សនៅកម្ពុជា លោករដ្ឋមន្រ្តីការពារជាតិ ទៀ បាញ់ បានបដិសេធថា ព័ត៌មានទាំងអស់នោះ គឺជាព័ត៌មានមិនពិត។
លោក ទៀ បាញ់ ថ្លែងយ៉ាងដូច្នេះ ៖ «កងពលដូចជា ៣១, ៦១១, ៧០ រហូតដល់អង្គរក្សរបស់សម្ដេចនាយករដ្ឋមន្រ្តី ដែលគេបានលើកឡើងក្នុងសំបុត្រនោះ ខ្ញុំបានដឹង បានឮដែរហើយ។ នោះហើយដែលខ្ញុំបានចាត់ទុកថា ក្នុងសំបុត្រនោះ គឺព័ត៌មានខុសទាំងអស់។ ហេតុអីបានខ្ញុំថាព័ត៌មានហ្នឹងខុស? រឿងមួយចំនួន គេបានធ្វើជាក់ស្ដែង ដូចជាបញ្ហាពាក់ព័ន្ធជាមួយនឹងការគប់គ្រាប់បែកនៅ... នៅក្នុងខែ៣ ឆ្នាំ៩៧នោះ រឿងនោះគឺគេធ្វើការងារយ៉ាងសកម្មណាស់កន្លងមក រហូតដល់សហរដ្ឋអាមេរិកនេះ បានបញ្ជូន FBI ចូលធ្វើការងារហ្នឹងទៀត មិនអស់ចិត្តមកចោទថា... នេះគឺបានន័យថា នោះឯងជារឿងមួយមិនមែនជាការពិត។ រឿង ៩១១ ពុំមានស្អីសោះ គឺជាអង្គភាពមួយមានប្រតិបត្តិការយ៉ាងល្អប្រសើរ»។
ទោះជាយ៉ាងនេះក្ដី លោកឧបនាយករដ្ឋមន្រ្តី ទៀ បាញ់ ក៏បានឆ្លើយតបទៅកាន់លោក តាំង សារ៉ាដា នៃវិទ្យុ វីអូអេ ថា ដោយសារតែហេតុផលរំលោភសិទ្ធិមនុស្សនេះ មានមន្រ្តីយោធាខ្លះ ដែលលោកមិនបានប្រាប់ចំនួននិងឈ្មោះនោះ ពុំបានទទួលការអនុញ្ញាតឲ្យចូលប្រទេសអាមេរិកទេ។
តាំង សារ៉ាដា ៖ ឯកឧត្ដមមានយន្តការអីក្នុងការធានាកុំឲ្យក្រុមយោធាខ្មែរដែលធ្លាប់រំលោភសិទ្ធិមនុស្សផ្សេងៗហ្នឹង បានទទួលផលប្រយោជន៍ពីសហរដ្ឋអាមេរិកដែរ?
ទៀ បាញ់ ៖ សូមជម្រាបខ្លីទៅចុះ សហរដ្ឋអាមេរិកសម្រេចលើកិច្ចការអ្វីមួយ មិនមែនជារឿងធម្មតាទេ សុទ្ធសឹងតែបានធ្វើការយ៉ាងល្អិតណាស់។ ខ្ញុំចង់និយាយថា បើមានស្អីលេចមួយមិនសមរម្យ ហើយនាំទៅប៉ះពាល់ដល់នយោបាយរបស់សហរដ្ឋអាមេរិក សហរដ្ឋអាមេរិកគឺជូនដំណឹងឲ្យភ្លាម។ និយាយឲ្យចំ ឥឡូវគឺមានទាហានមួយចំនួន មិនបានអនុញ្ញាតឲ្យចូលសហរដ្ឋអាមេរិកទេ។ មានមួយចំនួន ខ្ញុំមិនចង់និយាយក្នុងពេលនេះ ព្រោះខ្ញុំក៏ចង់បន្តដើម្បីអប់រំអ្នកទាំងនោះ ឲ្យមានការកែប្រែឡើងវិញ មិនមានអីធំដុំទេ។ មានមួយចំនួន មិនច្រើនទេ៕