លោក អាង ចាន់រិទ្ធិ នាយកប្រតិបត្តិនៃអង្គការនេះ មានប្រសាសន៍ថា នោះមិនមែនជាការដោះលែងឲ្យមានសេរីភាពទេ ពីព្រោះគេពុំបានឃើញមានលិខិតលាយលក្ខណ៍អក្សរណាមួយ ស្តីអំពីការដោះលែង ឬការប្រកាសសាលក្រមឡើយ ប៉ុន្តែ គេគ្រាន់តែបានឲ្យ ទឹម សាខន មករស់នៅក្នុងភូមិ ដោយមានប៉ូលិសយាមកាម។
លោក អាង ចាន់រិទ្ធិ មានប្រសាសន៍ដូច្នេះថា ៖ «អាចជាការដោះលែងក្រៅផ្លូវការ ឬបើជាការបំភ័ន្តភ្នែកសាធារណជនជាតិ ឬអន្តរជាតិ ដើម្បីឲ្យដឹងថា វៀតណាមហ្នឹង បានដោះលែងព្រះអង្គហើយ។ តាមពិតទៅជាការឃុំខ្លួនដដែល នៅក្នុងពន្ធនាគារ ឬក៏ក្នុងផ្ទះហ្នឹង យើងមិនអាចគិតថា ជាការដោះលែងឲ្យមានសិទ្ធិសេរីភាព ឬបញ្ជូនព្រះអង្គ ត្រឡប់មកវិញទេ គ្រាន់តែជាលេសមួយដើម្បីបំភ័ន្តភ្នែក ហើយឲ្យគេបន្ធូរបន្ថយលើការចាប់អារម្មណ៍ ប្រទេសវៀតណាមប៉ុណ្ណឹង បើតាមការគិតរបស់ពួកក្រុមសិទ្ធិមនុស្ស»។
ប្រភពដដែលនេះ និយាយថា ពេលនេះ ទឹម សាខន កំពុងរស់នៅក្នុងភូមិអណ្ដូង ស្រុកស្វាយទង ខេត្តមាត់ជ្រូក ជាមួយនឹងម្ដាយមីង ដោយហាមប្រាមមិនឲ្យមករស់នៅកម្ពុជាវិញឡើយ ដែលជាទីលំនៅបច្ចុប្បន្ន។
ប្អូនប្រុសរបស់ ទឹម សាខន ឈ្មោះ ចៅ បាន និយាយថា សុខភាពរបស់ ទឹម សាខន ទ្រុឌទ្រោម ហើមខ្លួន និងកម្រើកដៃឆ្វេងលែងកើត។ គាត់ទៅណាមកណា ឬប្រាស្រ័យទាក់ទងជាមួយអ្នកភូមិ ត្រូវបានហាមឃាត់ ៖ «ឡើងមកស្រុកខ្មែរ អត់បាន ហើយដើរលេងនៅហ្នុង កាលណាយើងចង់ដើរទៅហូបបបរ ឬក៏ទៅដើរលេងផ្ទះបងប្អូន មានគេតាមឆ្គកយើងទៅ អត់មានសេរីភាពទេ។ គាត់ថាអាហ្នឹង ជាបញ្ជារបស់ថ្នាក់លើ ខ្ញុំមិនអាចគេចបានទេ រឿងឆ្គកហ្នឹង»។
អតីតព្រះសង្ឃដើមកំណើតខ្មែរក្រោម ទឹម សាខន សង្រ្គាជវត្តភ្នំដិន ខេត្តតាកែវ ត្រូវបានអាជ្ញាធរខ្មែរចាប់ផ្សឹកយ៉ាងទាន់ហន់កាលពីឆ្នាំមុន រួចបញ្ជូនទៅដាក់គុកនៅប្រទេសវៀតណាម ដោយចោទប្រកាន់ថា ព្រះអង្គបានបង្កឲ្យមានការបែកបាក់ចំណងមិត្តភាព កម្ពុជា-វៀតណាម ក្រោយពីព្រះសង្ឃអង្គនេះ ឧស្សាហ៍ទំនុកបម្រុងពលរដ្ឋខ្មែរក្រោម ដែលភៀសខ្លួនចេញពីកម្ពុជាក្រោម មកដល់កម្ពុជា ហើយសុំស្នាក់អាស្រ័យនៅក្នុងទីអារាម។
ការចាប់បញ្ជូន ទឹម សាខន នាំឲ្យមានការភ្ញាក់ផ្អើលនិងថ្កោលទោសទៅដល់អាជ្ញាធរខ្មែរនិងវៀតណាម ពីសំណាក់សហគមន៍អន្តរជាតិនិងអង្គការសហប្រជាជាតិទទួលបន្ទុកផ្នែកសាសនាថា ជាអំពើរំលោភសិទ្ធិមនុស្សនិងផ្នែកសាសនាយ៉ាងកម្រោល។ ក្រោយមកទៀត ទឹម សាខន ក៏ត្រូវបានអាជ្ញាធរវៀតណាម កាត់ទោសឲ្យជាប់ពន្ធនាគារ១ឆ្នាំ ដែលត្រូវផុតកំណត់នៅឆ្នាំនេះ។
ស្ថានទូតវៀតណាមនៅកម្ពុជា នៅថ្ងៃដដែលនេះ មិនធ្វើអត្ថាធិប្បាយណាមួយនៅឡើយទេ។ សហព័ន្ធខ្មែរក្រោមនិងក្រុមសិទ្ធិមនុស្សខ្មែរក្រោម នឹងតវ៉ាតទៅទៀតដើម្បីទាមទារឲ្យ ទឹម សាខន មានសេរីភាពមករស់នៅកម្ពុជាវិញ៕