អតីតសង្ឃខ្មែរក្រោម ទឹម សាខន បានសិទ្ធិរស់នៅប្រទេសស៊ុយអែត
ដោយ សុខ សេរី
2009-09-21
អតីតព្រះសង្ឃដើមកំណើតខែ្មរកម្ពុជាក្រោម លោក ទឹម សាខន ដែលបានរងការធ្វើទុក្ខបុកម្នេញផ្នែកនយោបាយកន្លងមកនោះ ប្រភពបានអះអាងថា លោកបានទទួលសិទ្ធិជ្រកកោនផ្នែកនយោបាយរស់នៅក្នុងប្រទេសស៊ុយអែត នាពេលបច្ចុប្បន្ននេះ។
អតីតចៅអធិការវត្តភ្នំដិនខាងជើង លោក ទឹម សាខន។
លោក ថាច់ សេដ្ឋា ប្រធានសហគមន៍ខែ្មរកម្ពុជាក្រោម ដែលបានដឹងរឿងនេះ បានមានប្រសាសន៍ប្រាប់វិទ្យុអាស៊ីសេរីថា លោកបានទទួលទូរស័ព្ទពីលោក ទឹម សាខន ពីប្រទេសស៊ុយអែតថ្មីៗនេះ។
លោកបានបន្តថា ៖ «ទៅប្រហែលជា ៣ខែមុននេះ បានសិទ្ធិជ្រកកោនរបស់អង្គការសហប្រជាជាតិផ្ដល់ឋានៈជនភៀសខ្លួនឲ្យគាត់រស់នៅប្រទេសស៊ុយអែត។ ដំបូងហ្នឹង តែគាត់ម្នាក់ឯងទេ។ ខ្ញុំយល់ថា វាជាការមួយល្អ ដែលអង្គការសហប្រជាជាតិលោកយល់ដល់ទុក្ខលំបាករបស់អ្នកតស៊ូក្នុងការផ្ដល់សិទ្ធិជាជនភៀសខ្លួន នេះជាការមួយល្អ»។
មិនអាចទាក់ទងក្រុមគ្រួសាររបស់លោក ទឹម សាខន នៅក្នុងប្រទេសកម្ពុជាបាននៅទ្បើយទេ ជុំវិញស្ថានការណ៍រស់នៅរបស់លោក ទឹម សាខន រស់នៅក្នុងប្រទេសទីបីគឺប្រទេសស៊ុយអែតនោះ ប៉ុន្តែព្រះសង្ឃ យឿង ស៊ិន ជាប្រធានសមាគមព្រះសង្ឃខែ្មរកម្ពុជាក្រោម នៅក្នុងប្រទេសកម្ពុជា បានមានថេរដីកាថា ៖ «អាត្មាបានទទួលព័ត៌មាននេះតាំងពីលោកនិមន្តទៅម្ល៉េះ។ យើងក៏មានការសោកស្ដាយដែរ ដែលថាអ្នកតស៊ូ សកម្មជនតស៊ូហើយរងទារុណកម្ម រងទុក្ខ។ បើបានចេញទៅក្រៅទៅ វាជាគំរូ ហើយអ្នកខាងក្រោយខំធ្វើអ៊ីចឹងទៀតទៅ យូរទៅអស់មាននរណានៅទីនេះហើយ»។
ប្រភពដដែល បានឲ្យដឹងថា លោក ទឹម សាខន បានចាកចេញពីប្រទេសថៃទៅរស់នៅក្នុងប្រទេសស៊ុយអែត កាលពីចុងខែមិថុនាកន្លងទៅថ្មីៗនេះ ក្រោយពីលោកបានមានសេរីភាពចេញពីគុកនៅក្នុងប្រទេសវៀតណាម វិលមកប្រទេសកម្ពុជាវិញ កាលពីដើមឆ្នាំ២០០៩កន្លងទៅ ដើម្បីមកលាបំណន់ ហើយក៏បានរត់គេចខ្លួនទៅកាន់ប្រទេសថៃ ដើម្បីសុំសិទ្ធិជ្រកកោនផែ្នកនយោបាយពីការិយាល័យឧត្តមស្នងការអង្គការសហប្រជាជាតិទទួលបន្ទុកផ្នែកជនភៀសខ្លួននៅក្នុងប្រទេសថៃនោះ។
សូមជម្រាបថា ព្រះសង្ឃ ទឹម សាខន ជាព្រះចៅអធិការនៃវត្តភ្នំដិនខាងជើងនៅក្នុងស្រុកគិរីវង់ខេត្តតាកែវ ត្រូវរងការចាប់ផ្សឹកយ៉ាងតក់ក្រហល់ កាលពីចុងខែមិថុនា ឆ្នាំ២០០៧ កន្លងទៅ ហើយត្រូវបានចាប់ខ្លួនដោយអាជ្ញាធរកម្ពុជាប្រគល់ឲ្យអាជ្ញាធរវៀតណាមភ្លាមៗនាថ្ងៃនោះ ហើយត្រូវបានកាត់ទោសឲ្យជាប់គុកអស់រយៈពេល១ឆ្នាំ ក្រោមបទចោទថា លោកបានធ្វើឲ្យមានការបែកបាក់ចំណងមិត្តភាពរវាងកម្ពុជានិងប្រទេសវៀតណាម ក្រោយពីព្រះអង្គតែងតែផ្តល់ទីជម្រក ចំណី អាហារ និងការស្នាក់អាស្រ័យដល់ពលរដ្ឋខ្មែរក្រោមទាំងឡាយដែលភៀសខ្លួនពីអតីតទឹកដីខ្មែរក្រោមកំពុងកាន់កាប់ដោយវៀតណាមបច្ចុប្បន្ន។
របាយការណ៍សិទ្ធិមនុស្សរបស់ក្រសួងការបរទេសសហរដ្ឋអាមេរិកប្រចាំឆ្នាំ២០០៧ បានហៅការចាប់ខ្លួននិងផ្តន្ទាទោសនោះថាជាការយាយី ឬព្យាបាទផែ្នកនយោបាយ៕
អត្ថបទដែលទាក់ទង
អាជ្ញាធរវៀតណាមគំរាមឲ្យខ្មែរក្រោមដកពាក្យបណ្ដឹងស្ដីពីបញ្ហាដីធ្លី
ក្រុមខ្មែរក្រោមនៅកម្ពុជាទាមទារឲ្យវៀតណាមផ្ដល់សំណងដល់ខ្មែរក្រោមដែលបាត់បង់ដីស្រែ
វៀតណាមដកកម្លាំងចេញពីកន្លែងមានបញ្ហាដីធ្លីជាមួយពលរដ្ឋខ្មែរក្រោម
អាជ្ញាធរវៀតណាមបន្ថែមកម្លាំងបង្ក្រាបអ្នកតវ៉ាខ្មែរក្រោម
អាជ្ញាធរវៀតណាមពង្រាយកម្លាំងត្រៀមបង្ក្រាបការតវ៉ារបស់កសិករខ្មែរក្រោម
មេដឹកនាំសហព័ន្ធខ្មែរក្រោមសរសើរយុទ្ធសាស្ត្ររដ្ឋាភិបាលខ្មែរចំពោះខ្មែរក្រោម
ខ្មែរក្រោមជាង៦០គ្រួសាររារាំងអាជ្ញាធរវៀតណាមមិនឲ្យជីកព្រែកលើដីស្រែ
ខ្មែរក្រោមជាង៤០០គ្រួសារគ្រោងធ្វើបាតុកម្មប្រឆាំងនឹងផែនការជីកព្រែក
មន្ត្រីខ្មែរក្រោមនិយាយអំពីអត្តសញ្ញាណប័ណ្ណសញ្ជាតិខ្មែរសម្រាប់ខ្មែរក្រោម
