តំបន់រមណីយដ្ឋានទេសចរណ៍ធម្មជាតិតាតៃ ស្ថិតក្នុងឃុំតាតៃក្រោម ស្រុកកោះកុង ខេត្តកោះកុង កំពុងមានកេរ្តិ៍ឈ្មោះល្បីល្បាញ។ បច្ចុប្បន្នក្រុមហ៊ុនវិនិយោគទេសចរណ៍របស់ថៃ ឈ្មោះ ហែម រតនៈ កំពុងស្រូបយកភ្ញៀវទេសចរណ៍ដែលទៅលេងតំបន់នោះ។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី ដែលបានចុះទៅដល់តំបន់រមណីយដ្ឋានទេសចរណ៍ធម្មជាតិតាតៃ កាលពីថ្ងៃទី២២ មករា បានប្រតិកម្មទៅនឹងអ្នកបម្រើសេវាកម្មទេសចរណ៍របស់ក្រុមហ៊ុននាំភ្ញៀវទេសចរណ៍ថៃ ឈ្មោះ ហែម រតនៈ ចំកាត់ (Hem Rathakak L.T.D) ដែលស្វាគមន៍ភ្ញៀវដោយនិយាយភាសាថៃ នៅសហគមន៍តាតៃ។ បញ្ហានេះលោកថា នឹងជូនដំណឹងទៅរដ្ឋមន្ត្រីក្រសួងទេសចរណ៍ដើម្បីចាត់វិធានការជាបន្ទាន់ ហើយថា នេះជារឿងមិនប្រក្រតីមួយដែលធ្វើឲ្យប៉ះពាល់ដល់ផលប្រយោជន៍ពលរដ្ឋក្នុងសហគមន៍តាតៃ។
លោក ផៃ ស៊ីផាន៖ «ខ្ញុំគួរឲ្យសោកស្ដាយនៅពេលដែលខ្ញុំចុះទៅមើលកន្លែងហ្នឹង ស្រាប់តែអ្នកស្វាគមន៍ខ្ញុំនិយាយជាភាសាថៃ ហើយខ្ញុំសម្លឹងមើលព័ទ្ធជុំវិញហ្នឹងអត់ឃើញមានអាជ្ញាប័ណ្ណជាខ្មែរ មិនដឹងថា រដ្ឋអំណាចហ្នឹងគេចាត់ចែងការងារហ្នឹងយ៉ាងម៉េច។ ខ្ញុំយល់ឃើញថា តំបន់នេះជាតំបន់ផលប្រយោជន៍របស់សហគមន៍តាតៃនេះឯង។ ខ្ញុំមិនពេញចិត្តទេអានេះជាយោបល់ខ្ញុំផ្ទាល់។ សហគមន៍តាតៃដែលគ្នាមិនដឹងទៅធ្វើអីកើតរស់នឹងគេកើត រហូតមកដល់ពេលនេះ ហាក់បីដូចជាគេបំភ្លេចចោលរឿងសហគមន៍នេះ»។
ទាក់ទងបញ្ហានេះ ប្រធានសហគមន៍ទេសចរណ៍ធម្មជាតិតាតៃ លោក ទេព ម៉ាឡា បានថ្លែងថា ការចូលមកវិនិយោគនេះ សហគមន៍ពុំបានទទួលព័ត៌មានពីក្រុមហ៊ុន និងមន្ទីរទេសចរណ៍ខេត្តឡើយ។ តែលោកអះអាងថា អាជ្ញាធរជាអ្នកអនុញ្ញាតឲ្យក្រុមហ៊ុននេះ។
លោកបន្តថា អនាគតក្រុមហ៊ុននេះ នឹងពង្រីកវិសាលភាពសេវាកម្មទេសចរណ៍របស់ខ្លួនបន្ថែមទៀត ដើម្បីអូសទាញយកទេសចរណ៍អន្តរជាតិដែលចង់មកស្គាល់រមណីយដ្ឋានធម្មជាតិតាតៃ។ លោកសំណូមពរឲ្យមន្ទីរទេសចរណ៍ខេត្តកោះកុង ទាក់ទងក្រុមហ៊ុនទេសចរណ៍ថៃនេះ ពិភាក្សាបែងចែកផលប្រយោជន៍មួយភាគមកឲ្យសហគមន៍ដែលជាអ្នកថែទាំតំបន់ទេសចរណ៍ធម្មជាតិនេះដោយផ្ទាល់។
លោក ទេព ម៉ាឡា៖ «សហគមន៍ព្រួយបារម្ភខ្លាចអនាគតទៅ ក្រុមហ៊ុននីមួយៗគេដេញយកអស់អ៊ីចឹង ប្រជាពលរដ្ឋអត់មានការងារធ្វើនៅក្នុងភូមិ។ ខ្លាចយូរៗទៅសហគមន៍ពុំមានច្បាប់ទម្លាប់ណាទៅគ្រប់គ្រងតំបន់ទឹកធ្លាក់ណាមួយ យូរទៅគេនឹងអាចយកក៏ថាបាន។ ឥឡូវគេចាប់ផ្ដើមទទួលភ្ញៀវទេសចរគេមិនកក់មកសហគមន៍ទេ គេកក់មកចូលក្រុមហ៊ុនគេទៅ ពីព្រោះសហគមន៍ជាផ្នែកតូចមួយមិនមានអ្វីគួរធ្វើឲ្យអស្ចារ្យដូចគេទេ»។
ទាក់ទងការអនុញ្ញាតឲ្យក្រុមហ៊ុននេះ អភិបាលស្រុកកោះកុង លោក សោម សុធីរ បានបង្វែរសំណួរទៅឲ្យអាជ្ញាធរឃុំ។ ប៉ុន្តែវិទ្យុអាស៊ីសេរី មិនអាចទាក់ទងមេឃុំស្ដីទីតាតៃក្រោម លោក កយ ម៉ាន់ បានទេនៅថ្ងៃទី២៤ មករា ឆ្នាំ២០១២។
យ៉ាងណាក៏ដោយ អនុប្រធានមន្ទីរទេសចរណ៍ខេត្តកោះកុង លោក ឃឹម សុនិត អះអាងថា ដំណាក់កាលដំបូងក្រុមហ៊ុននេះបានសុំការអនុញ្ញាតពីអាជ្ញាធរ ហើយថាក្រុមហ៊ុននេះមានគម្រោងសាងសង់កញ្ចុះបណ្ដែតទឹក សម្រាប់ឲ្យអ្នកទេសចរណ៍អង្គុយកម្សាន្ត ដែលមន្ទីរពុំទាន់បានទទួលឯកសារអ្វីនៅឡើយ។
លោក ឃឹម សុនិត ៖ «ប្រហែលជាមានការឯកភាពជាដំបូងសិន វាស្ថិតនៅក្នុងដំណាក់កាលសាងសង់កញ្ចុះ បណ្ដែតទឹកមិនទាន់រួចរាល់ ឆ្លើយតបមកវិញ ថាគេបានរួចរាល់ហើយដំណើរការអាជីវកម្មសេវាបម្រើហ្នឹងហើយបានមកមន្ទីរទេសចរណ៍»។
តំបន់រមណីយដ្ឋានទេសចរណ៍ធម្មជាតិតាតៃនេះ ទើបអភិវឌ្ឍន៍ឡើងនៅឆ្នាំ២០០៩។ ក្នុងមួយឆ្នាំៗមានភ្ញៀវទេសចរទៅកម្សាន្តប្រមាណជាង ៣ពាន់ ទៅ ៤ពាន់នាក់៕