អ្នកដើរកម្សាន្តក្នុងពិធីបុណ្យអុំទូកធ្លាក់ចុះ
ដោយ គឹម ពៅ
2009-11-04
មន្ត្រីសិទ្ធិមនុស្សដែលបានធ្វើការសង្កេតនៅក្នុងរយៈពេលបីថ្ងៃនៃពិធីបុណ្យអុំទូកបានអះអាងថា ពិធីបុណ្យអុំទូកនាឆ្នាំនេះមានភាពសោះកក្រោះ ដោយសារតែចំនួនពលរដ្ឋមកកម្សាន្តមានការធ្លាក់ចុះ បើប្រៀបធៀបទៅនឹងពិធីបុណ្យអុំទូករៀងរាល់ឆ្នាំ។
ទិដ្ឋភាពនៅក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុក នាថ្ងៃ១ វិច្ឆិកា ២០០៩។
លោក ចាន់ សុវ៉េត មន្ត្រីសិទ្ធិមនុស្សអាដហុក បានសន្និដ្ឋានថា ការថមថយនៃអ្នកដើរកម្សាន្តឆ្នាំនេះទំនងបណ្តាលមកពីបញ្ហាសេដ្ឋកិច្ចធ្លាក់ចុះ អ្នកស្រុកស្រែចម្ការដែលមានជីវភាពយ៉ាប់យ៉ឺនស្រាប់ ពុំសូវមានលុយកាក់ក្នុងការធ្វើសោហ៊ុយមកកម្សាន្ត និងប្រហែលបណ្តាលមកអំពីការខ្លាចរអារនៃជំងឺគ្រុនផ្តាសាយថ្មី A(H1N1) ដែលកំពុងតែឆ្លងរីករាលដាល។
លោក ចាន់ សុវ៉េត បានបញ្ជាក់ថា ៖ «បញ្ហាសំខាន់គឺមកពីជីវភាព សំខាន់មួយទៀតគឺបញ្ហការលក់ដូរ តម្លៃទំនិញនៅក្នុងផ្សារ នៅក្នុងកន្លែងហ្នឹង វាមានតម្លៃថ្លៃខ្ពស់ ហើយមួយទៀតគឺយើងពីស្ថានភាពនៃជំងឺ ឧទាហរណ៍ដូចជាគ្រុនផ្តាសាយបក្សី និងគ្រុនផ្តាសាយជ្រូកអីអ៊ីចឹងជាដើម»។
តាមការប៉ាន់ប្រមាណជាទូទៅ អ្នកចូលរួមកម្សាន្តក្នុងពិធីបុណ្យអុំទូកនាឆ្នាំនេះមានមិនដល់១លាននាក់ទេ។ ក្រុមអាជីវករជាច្រើននាក់បានរអ៊ូត្អូញត្អែរអំពីការខាតបង់ដោយសារតែគេរំពឹងទុកថា នឹងមានអ្នកមកកម្សាន្តក្នុងពិធីបុណ្យនេះច្រើន ហើយមុខទំនិញច្បាស់ជានឹងត្រូវលក់ដាច់។
ស្រ្តីអ្នកលក់នំចំណីបាននិយាយនៅថ្ងៃបង្ហើយនៃពិធីបុណ្យអុំទូកនេះថា ចំនួនអ្នកដើរកម្សាន្តបានថយចុះ រីឯអ្នកដើរកម្សាន្តខ្លះទៀតមិនបានទិញអ្វីឡើយ ៖ «ខាតចូលជិត២០០(ដុល្លារ)ហើយ ខ្ញុំខ្ចីលុយគេមក។ អត់មានអ្នកហូប អ្នកទិញ!»។
យុវជន វុទ្ធី អាយុ១៩ឆ្នាំ អ្នកដើរកម្សាន្ត បានសង្កេតឃើញថា អ្នកចូលរួមកម្សាន្តនៅឆ្នាំនេះមានការថយចុះ។ វុទ្ធី ឲ្យយោបល់ថា ប្រហែលមកពីការភ័យខ្លាចនៃជំងឺគ្រុនផ្តាសាយ ៖ «ខ្ញុំគិតថា គ្រុនផ្តាសាយច្រើន អ៊ីចឹងគេអត់សូវដើរ ណាមួយធ្លាប់ដើររាល់ឆ្នាំហើយ វាដដែលៗ»។
បើទោះបីជាក្រុមអ្នកដើរកម្សាន្តនិងក្រុមអាជីវករបានអះអាងដូចគ្នាថា ចំនួនអ្នកដើរកម្សាន្តពេលបុណ្យអុំទូកបានថយចុះ ប៉ុន្តែរដ្ឋមន្ត្រីក្រសួងទេសចរណ៍ លោក ថោង ខុន វិញ បដិសេធថា វាមិនដូច្នេះទេ។
លោកទទួលស្គាល់ថា ជីវភាពប្រជាជនមានការធ្លាក់ចុះ ក៏ប៉ុន្តែចំនួនអ្នកមកកម្សាន្តពេលបុណ្យអុំទូកមានចំនួនប្រហាក់ប្រហែលនឹងរាល់ឆ្នាំ គឺមិនតិចជាង២លាននាក់ឡើយ។
លោក ថោង ខុន បានមានប្រសាសន៍ថា ៖ «ធម្មតាទេដូចខ្ញុំនិយាយអ៊ីចឹង សេដ្ឋកិច្ចធ្លាក់វាប៉ះពាល់ខ្លះហើយ នៅប្រទេសណាក៏ប៉ះដែរ ប៉ុន្តែប្រជាជនយើងគាត់នៅតែត្រូវការដើរកម្សាន្តអ៊ីចឹង អ៊ីចឹងទេសចរក្នុងស្រុកហ្នឹងអត់មានថយទេ គ្រាន់តែចំណាយវាតិចជាងមុន ចំណាយគាត់មានរបៀបរបបសន្សំសំចៃ។ មនុស្សច្រើនណាស់ មិនតិចទេ!»។
ពិធីបុណ្យអុំទូកនាឆ្នាំនេះត្រូវបានគេសម្គាល់ថា ចំនួនទូករបស់មហាជនបានថយចុះ ក៏ប៉ុន្តែទូករបស់មន្ត្រីជាន់ខ្ពស់និងទូកដែលឧបត្ថម្ភដោយប្រមុខរបស់រដ្ឋាភិបាលមានច្រើនទៅវិញ។ គេឃើញទូកមួយចំនួនបានដាក់ឈ្មោះចំៗ ដូចជាឈ្មោះ កំពូលតេជោសែនជ័យ, ជាមយៀបសជ័យ, ចក់ឡេងមុន្នីឧត្តមសែនជ័យ, សំហេងសែនជ័យបារមីចាក់អង្រែលើ, ញឹកប៊ុនឆៃបារមីឃ្លាំងមឿង ជាដើម៕
អត្ថបទដែលទាក់ទង
ព្រះមហាក្សត្រយាងពន្លត់ភ្លើងជ័យនៃបុណ្យឯករាជ្យជាតិទី៥៦
កម្ពុជាប្រារព្ធខួបទី៥៦នៃបុណ្យឯករាជ្យជាតិ ៩ វិច្ឆិកា
បញ្ហាការថែរក្សាអនាម័យក្នុងអំឡុងពេលបុណ្យអុំទូក
សរុបតួលេខនៃអំពើចោរកម្មនិងគ្រោះថ្នាក់ផ្សេងៗក្នុងពេលបុណ្យអុំទូក
ស្ថានភាពសន្តិសុខក្នុងឱកាសព្រះរាជពិធីបុណ្យអុំទូក
ទិដ្ឋភាពថ្ងៃទី៣នៃព្រះរាជពិធីបុណ្យអុំទូក
ខ្មែរកម្ពុជាក្រោមប្រារព្ធពិធីបុណ្យអុំទូក
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
Yes, the people are visited water fasival is goin drown..
2009-11-06 03:18
the name of the boat should be general not individualistic.
2009-11-05 23:01
មើលមតិទាំងអស់.