តាមមគ្គុទ្ទេសក៍ទេសចរណ៍មួយរូបរបស់ក្រុមហ៊ុនអេស៊ានត្រាលនៅឯខេត្តសៀមរាប បានឲ្យដឹងពីថ្ងៃព្រហស្បតិ៍ ថា ក្រុមហ៊ុនកំពុងរៀបចំចាត់ចែងភ្ញៀវទេសចរណ៍របស់ពួកគេខ្លះឲ្យធ្វើដំណើរចេញទៅតាមរថយន្តសំដៅទៅច្រកប៉ោយប៉ែតចូលទៅប្រទេសថៃវិញ និងខ្លះបានទិញសំបុត្រធ្វើដំណើរចេញទៅតាមជើងយន្តហោះថ្មីទៅកាន់ប្រទេសសិង្ហបុរី ប្រទេសលាវ វៀតណាម ឬក៏កូរ៉េ ក៏ប៉ុន្តែវាមានការពិបាកខ្លាំងណាស់។
មគ្គុទ្ទេសក៍ទេសចរណ៍ដដែលបានឲ្យដឹងថា ៖ «មានច្រើនក្រុមណាស់ថ្ងៃនេះម្សិលមិញអីហ្នឹង។ ភាគច្រើនទៅបញ្ជូនទៅតាមច្រកប៉ោយប៉ែតវិញ។ ៣៦នាក់ទៅភ្នំពេញ ចេញពីភ្នំពេញទៅសិង្ហបុរី អ្នកខ្លះត្រូវដូរហោះទៅលាវ វៀតណាម វាខុសទិសដៅវា ពិបាកណាស់ វេទនាណាស់។ អ៊ីចឹងកម្មវិធីដែលកក់ហើយ ទាំងពីហាងអាហារអីសព្វបែបយ៉ាងហ្នឹងត្រូវដោះដូរ មិនមែនស្រួលទេពិបាកណាស់»។
ក្រុមអ្នកដំណើរជនជាតិបរទេសជាច្រើនរូបបាននិយាយថា គេពុំបានដឹងអំពីការហោះហើររបស់គេ តើនឹងមានសង្ឃឹមឬយ៉ាងណាទេ?។
អ្នកស្រី អានេ និស្សែន ជាជនជាតិដាណាម៉ាក ដែលបានទៅចុះបញ្ជីរង់ចាំជើងហោះហើរនៅឯក្រុមហ៊ុន Bangkok Airways ក្នុងខេត្តសៀមរាប បានមានប្រសាសន៍ថា ក៏បានបន្តដេកនៅខេត្តសៀមរាបតទៅទៀត ប្រសិនបើទិសដៅទីក្រុងបាងកកដែលគាត់ត្រូវទៅបែរជាខកខាន។ ក៏ប៉ុន្តែទោះយ៉ាងណាប្រហែលជាគាត់ត្រូវគិតប្ដូរជើងហោះហើរទៅកាន់ប្រទេសកូរ៉េឬវៀតណាមដើម្បីបន្តដំណើរទៅកាន់អឺរ៉ុប ៖ "ខ្ញុំគិតថា ប្រហែលជាប្ដូរការហោះហើរតាមជើងយន្តហោះ កូរ៉េ ឬវៀតណាម ពីព្រោះខ្ញុំត្រូវទៅអឺរ៉ុប"។
រហូតមកដល់ថ្ងៃព្រហស្បតិ៍នេះ ពុំមានការហោះហើរណាមួយបានធ្វើដំណើរចាកចេញពីខេត្តសៀមរាបទៅកាន់ទីក្រុងបាងកក ឬពីទីក្រុងបាងកក មកកាន់ខេត្តសៀមរាបនៅឡើយទេ។
នាយកអាកាសយានដ្ឋានអន្តរជាតិខេត្តសៀមរាប លោក សៅ វឌ្ឍនា បានមានប្រសាសន៍ថា ជើងហោះហើរពីទីក្រុងបាងកក ប្រទេសថៃ នៅតែពន្យារពេលតទៅទៀត មិនអាចហោះហើរបានទេ រហូតដល់ម៉ោង៦យប់ថ្ងៃព្រហស្បតិ៍នេះ។
មន្រ្តីដដែលបានឲ្យដឹងថា មានជើងហោះហើរចំនួន៥ត្រូវពន្យារនៅក្នុងថ្ងៃនេះ ៖ «ខាងព្រលានសុវណ្ណភូមិនៅស្រុកថៃហ្នឹង គឺគេចេញប្រកាសមួយ បិទព្រលានតាំងពីម្សិលមិញពីម៉ោង៦ល្ងាចម្សិលមិញដល់ម៉ោង៦ល្ងាចថ្ងៃនេះ។ ម្សិលមិញគឺ៥៧០នាក់។ ម្សិលមិញ Cancel ៥ជើង ដូច្នេះថ្ងៃនេះ ៥ជើងដូចគ្នា»។
បើតាមមន្រ្តីអាកាសចរណ៍ស៊ីវិលប្រចាំខេត្តសៀមរាបបានឲ្យដឹងថា កាលពីថ្ងៃពុធម្សិលមិញបន្ទាប់ពីជើងហោះហើរទៅកាន់ទីក្រុងបាងកកចំនួន៥ត្រូវបានពន្យារធ្វើឲ្យអ្នកដំណើរប្រមាណ៥៧០នាក់ត្រូវខកខានដំណើរទៅកាន់ប្រទេសជាច្រើនដែលជាគោលដៅបន្តរបស់ពួកគេ៕