លោកបន្តថា បើទោះបីជាចំនួនទេសចរបានកើនឡើងបែបណាក៏ដោយ ក៏ប៉ុន្តែចំណូលមិនបានកើនឡើងទេ ដោយហេតុថា ចំនួនភ្ញៀវមកស្នាក់នៅកម្ពុជាមានរយៈពេលខ្លី និងការចាយវាយមានការត្បិតត្បៀត។
លោក ទិត្យ ចន្ថា បានបញ្ជាក់ថា ៖ «នៅក្នុងឆ្នាំ២០០៩ ១១ខែនេះ យើងឃើញថាបានភ្ញៀវជិត ២លាននាក់ គឺជាង ១,៩សែននាក់ កើនឡើង ១,៦% ធៀបនឹងរយៈពេលដូចគ្នា (ឆ្នាំ)២០០៨ ហើយយើងអាចប៉ាន់ស្មានថា ខែ១២នេះ យើងនឹងបានជាង ២លាននាក់នៅក្នុងឆ្នាំ២០០៩ទាំងមូលនេះ ហើយមានកំណើនប្រមាណជា ២% ធៀបទៅនឹងឆ្នាំ២០០៨»។
លោក ទិត្យ ចន្ថា មិនទាន់បញ្ជាក់តួលេខច្បាស់និងចំណូលទទួលបានពីវិស័យទេសចរណ៍ឆ្នាំ២០០៩ ថា មានចំនួនប៉ុន្មាននៅឡើយទេ ព្រោះរបាយការណ៍ផ្លូវការរបស់ក្រសួងទេសចរណ៍និងផ្សព្វផ្សាយឲ្យដឹងនៅបំណាច់ខែមករាឯណោះ។
លោក ហូរ វណ្ឌី សហប្រធានវិស័យទេសចរណ៍ផ្នែកឯកជន បានទទួលស្គាល់ថា ចំនួនភ្ញៀវទេសចរណ៍ពីបរទេសចូលមកទស្សនាកម្ពុជា ឆ្នាំ២០០៩ ឃើញមានកំណើនកើនពិតមែន ប៉ុន្តែកើនតែតួលេខនៃចំនួនភ្ញៀវ ឯការចំណាយនិងការស្នាក់នៅរបស់ភ្ញៀវទេសចណ៍គឺមានរយៈពេលខ្លីនិងពុំសូវមានលុយចាយ។
លោក ហូរ វណ្ឌី បន្តថា អ្វីដែលវិស័យឯកជនចង់បាន គឺចំនួនភ្ញៀវក៏កើន ការស្នាក់នៅមានរយៈពេលយូរ និងភ្ញៀវមានលុយច្រើនក្នុងការចាយវាយផងដែរ។
មន្ត្រីក្រសួងទេសចរណ៍ លោក ទិត្យ ចន្ថា បានប្រាប់ពីមូលហេតុនៃកំណើនទេសចរបរទេសនាឆ្នាំ២០០៩ គឺដោយសារតែកម្ពុជាធ្វើការផ្សព្វផ្សាយពីវិស័យទេសចរណ៍បានទូលំទូលាយទាំងក្នុងនិងក្រៅប្រទេស គួបផ្សំបរិស្ថាននៅតាមតំបន់ទេសចរណ៍និងសន្តិសុខ អាជ្ញាធររៀបចំកែលម្អបរិស្ថាននិងកន្លែងកម្សាន្តបានល្អ។
លោក ទិត្យ ចន្ថា បានឲ្យដឹងថា ៖ «ស្ថានការណ៍ជាក់ស្ដែងបច្ចុប្បន្នយើងឃើញថា មានការរីកចម្រើនច្រើនផ្នែកហេដ្ឋារចនាសម្ព័ន្ធ ហើយពិសេសកត្តាសន្តិសុខ សុវត្ថិភាព ស្ថិរភាពល្អនៅកម្ពុជា ដូចដែលយើងបានជ្រាបហើយ»។
មន្ត្រីក្រសួងទេសចរណ៍បានឲ្យដឹងក្រៅផ្លូវការថា វិស័យទេសចរណ៍នៅឆ្នាំ២០០៩ កម្ពុជាស្រូបយកភ្ញៀវទេសចរណ៍ពីបរទេសបានប្រមាណ ២,១៦លាននាក់៕