ប៉ុន្តែវិស័យឯកជនបានលើកឡើងថា ចំនួនភ្ញៀវទេសចរណ៍បានកើនឡើងមែនពិត ប៉ុន្តែការចំណាយក្នុងការស្នាក់នៅនិងចាយវាយរបស់ភ្ញៀវទេសចរណ៍ទាំងនោះមានការត្បិតត្បៀត។
លោក ទិត្យ ចន្ថា អគ្គនាយកក្រសួងទេសចរណ៍ មានប្រសាសន៍ឲ្យវិទ្យុអាស៊ីសេរីដឹងនៅព្រឹកថ្ងៃទី២៩ ខែវិច្ឆិកា ថា បើគិតរយៈពេល១០ខែដូចគ្នាចំនួនភ្ញៀវទេសចរណ៍មកពីបរទេសដែលបានធ្វើដំណើរមកទស្សនាប្រទេសកម្ពុជាក្នុងឆ្នាំ២០០៩ គឺមានចំនួនកើនជាងឆ្នាំ២០០៨កន្លងទៅ។
លោក ទិត្យ ចន្ថា បានបញ្ជាក់ថា ៖ «កើនឡើងជាង១លានកន្លះភ្ញៀវអន្តរជាតិ ១,៦% អាហ្នឹងយើងនិយាយចំនួនខែ ឥឡូវយើងមានតួលេខ១០ខែទៀតហើយ»។
លោក ហូរ វណ្ឌី សហប្រធានក្រុមការងារទេសចរណ៍ផ្នែកឯកជន មានប្រសាសន៍ទទួលស្គាល់ថា ចំនួនភ្ញៀវទេសចរណ៍ពីបរទេសដែលបានមកទស្សនាប្រទេសកម្ពុជាក្នុងរយៈពេល១០ខែ ឆ្នាំ២០០៩ ពិតជាមានចំនួនកើនជាងឆ្នាំ២០០៨មែន ដែលភាគច្រើនជាភ្ញៀវមកពីប្រទេសជិតខាងកម្ពុជា ដែលមិនសូវមានលុយកាក់ចាយច្រើន។ មានន័យថា ការចំណាយក៏ដូចជាការស្នាក់របស់ភ្ញៀវនៅក្នុងប្រទេសកម្ពុជាមានរយៈពេលខ្លីនិងចំណាយមានការត្បិតត្បៀត។
លោក ហូរ វណ្ឌី បានមានប្រសាសន៍ថា ៖ «ចំពោះផ្នែកឯកជនវិញយើងចង់បានគុណភាពខ្ពស់ មានន័យថា ភ្ញៀវទេសចរណ៍ចូលមកច្រើន ក៏ប៉ុន្តែគុណភាពនៃការចំណាយសម្រាប់ភ្ញៀវទេសចរណ៍ឲ្យមាន ក៏វាជាការល្អផងដែរសម្រាប់ពួកយើងទាំងអស់គ្នា»។
តាមការព្យាករណ៍របស់មន្ត្រីក្រសួងទេសចរណ៍បានឲ្យដឹងថា នៅបំណាច់ឆ្នាំ២០០៩នេះចំនួនភ្ញៀវទេសចរណ៍មកពីបរទេសដែលបានចូលមកទស្សនាប្រទេសកម្ពុជានឹងមានចំនួនកើនឡើងចំនួន៣% បើប្រៀបធៀបឆ្នាំ២០០៨ ចំនួននេះគឺកើនទាំងភ្ញៀវទេសចរណ៍មកពីប្រទេសអឺរ៉ុបនិងភ្ញៀវមកពីតំបន់អាស៊ី៕