លោក ចម ប្រសិទ្ធ ទេសរដ្ឋមន្រ្តីនិងជារដ្ឋមន្រ្តីក្រសួងពាណិជ្ជកម្មកម្ពុជា បានសម្ពោធដាក់ឲ្យដំណើរការកម្មវិធីតាំងពិព័រណ៍ពាណិជ្ជកម្មដែលបានធ្វើឡើងនៅមន្ទីរវប្បធម៌ ខេត្តរតនគិរី កាលពីព្រឹកថ្ងៃទី១៣ មីនានេះ ដើម្បីដាក់លក់មុខទំនិញផ្សេងៗរបស់ខេត្តចំនួន១៣ ក្នុងនោះមានផលិតផលកម្ពុជាភាគឦសានចំនួន៤ខេត្ត ផលិតផលពីប្រទេសលាវ៤ខេត្ត និងផលិតផលពីប្រទេសវៀតណាមចំនួន៥ខេត្ត។
លោក ចម ប្រសិទ្ធ បានថ្លែងឲ្យដឹងពីប្រយោជន៍នៃការដាក់តាំងពិព័រណ៍នេះថា ៖ «ជាលើកទី១ហើយដែលយើងធ្វើពិព័រណ៍ពាណិជ្ជកម្មនៅភូមិភាគឦសាន ការផ្សព្វផ្សាយផលិតផលនៃខេត្តទាំង៤ ហើយជាឱកាសដើម្បីយកផលិតផលនៃខេត្ត៤ទៀតរបស់ទេសលាវ និង៥ទៀតរបស់វៀតណាម យកមកតាំងពិព័រណ៍ជាមួយគ្នាដែរ។ ទី១ គាត់មករៀនសូត្រពីគេ ដីគេដូចយើង ក្បែរយើងដែរ ហេតុអីគេដាំនៅនេះបាន ហេតុអីគេអាចលក់នៅនេះបាន? វិធីគេលក់របៀបម៉េច? អ៊ីចឹងគាត់រៀនសូត្រទៅវិញទៅមក ហើយចំពោះអ្នកវិនិយោគក៏ដូចគ្នាអ៊ីចឹងដែរ ដើម្បីដឹងសក្ដានុពលសេដ្ឋកិច្ចនៃខេត្តនីមួយៗ តើមានអីដែលគេអាចធ្វើពាណិជ្ជកម្មវិនិយោគជាមួយយើងបាន?»។
ស្តង់លក់ទំនិញរបស់អាជីវករខេត្តរតនគិរីមួយក្នុងចំណោមស្តង់ជាច្រើនទៀត ឈ្មោះ តាណាំ មានលក់ផលិតផលជាច្រើនមុខ ប៉ុន្តែអ្វីដែលគេចាប់អារម្មណ៍បំផុតនោះ គឺកាហ្វេម្សៅនិងកាហ្វេគ្រាប់។ កាហ្វេរបស់អាជីវកររូបនេះត្រូវបាននាំចេញទៅកាន់បណ្តាប្រទេសជាច្រើននៅក្នុងតំបន់អាស៊ី។
អ្នកលក់បានរៀបរាប់បែបនេះថា ៖ «មានកាហ្វេ... មានផ្លែប៊ឺ មានកន្សែងជនជាតិ មានបំពង់ក្រដាសធ្វើអំពីឈើ។ រាល់ថ្ងៃលក់ដល់បាត់ដំបង សៀមរាប ភ្នំពេញនិងព្រៃវែង។ មាននាំចេញទៅប្រទេសថៃ វៀតណាម កូរ៉េ ចិននិងជប៉ុន»។
ក្នុងចំណោមស្តង់លក់ផលិតផលនានានោះ គេឃើញមានផលិតផលជាច្រើនមុខរបស់ខេត្តទាំង១៣ មានលក្ខណៈស្រដៀងគ្នា ពិសេសផលិតផលផ្នែកសិប្បកម្មនិងកសិកម្ម ប៉ុន្តែរបស់ទាំងនោះបានធ្វើឡើងតាមទម្រង់ប្រពៃណីរៀងៗខ្លួន។
លោក ចម ប្រសិទ្ធ បានថ្លែងថា កិច្ចពិភាក្សាថ្នាក់រដ្ឋមន្រ្តីនៃប្រទេសទាំងបី នឹងធ្វើឡើងនៅថ្ងៃទី១៨ មីនា ជាថ្ងៃក្រោយពីបានបញ្ចប់ការតាំងពិព័រណ៍លក់ទំនិញ។ កិច្ចប្រជុំនេះនឹងផោ្តតការយកចិត្តទុកដាក់អនុវត្តកម្មវិធីអភិវឌ្ឍន៍តំបន់ត្រីកោណតាមគម្រោងរបស់រដ្ឋាភិបាលប្រទេសទាំងបី។
ការតាំងពិព័រណ៍នេះធ្វើឡើងដើម្បីបង្ហាញពីផលិតផលនៃខេត្តទាំង១៣ ហើយជាការដកពិសោធន៍ពីគ្នាទៅវិញទៅមកអំពីលទ្ធភាពទំនាក់ទំនងធ្វើពាណិជ្ជកម្មជាមួយគ្នារវាងប្រទេសទាំងបី និងការធ្វើវិនិយោគមកលើតំបន់ឦសានរបស់កម្ពុជា។
គម្រោងវិនិយោគតំបន់ត្រីកោណត្រៀមអនុវត្តនៅក្នុងទឹកប្រាក់ជំនួយរបស់ជប៉ុនប្រមាណ២០លានដុល្លារ ប៉ុន្តែលោក ចម ប្រសិទ្ធិ ថ្លែងថា នឹងមានច្រើនជាងនោះ។
លោក ចម ប្រសិទ្ធ មានប្រសាសន៍ថា ៖ «មានតែយើងខិតខំរកជំនួយពីប្រទេសជប៉ុន មកជួយក្នុងតំបន់ត្រីកោណបានប្រហែលខ្ទង់២០លានដុល្លារ ប៉ុន្តែគម្រោងនេះគ្រាន់តែជាគម្រោងតូចៗនៅឡើយ ឯគម្រោងធំនោះគឺរាប់រយលានដុល្លារនឹងមកជាក្រោយទៀត។ មិនមែនយើងសំដៅតែប្រទេសជប៉ុនមួយទេ សំដៅប្រទេសដទៃទៀតដែលមានសក្ដានុពលជួយយើង ឧទាហរណ៍ចិនជាដើម កូរ៉េ ឬវៀតណាម»។
តំបន់ឦសាននៃប្រទេសកម្ពុជា ត្រូវបានគេសម្លឹងឃើញអំពីសក្តានុពលនៃដីធ្លីសម្រាប់វិនិយោគដំណាំកសិឧស្សាហកម្មជាច្រើនផ្នែក ព្រមទាំងធនធានធម្មជាតិក្រោមដី ដូចជារ៉ែដែក ត្បូង និងរ៉ែមាសជាដើម ជាផ្នែកនៃការទាក់ទាញវិនិយោគនិងលើកកម្ពស់សេដ្ឋកិច្ចកម្ពុជា៕