ជនជាប់ចោទ ចំនួន៣នាក់នោះ មានឈ្មោះ មាស ចាន់ធឿន អាយុ ៥៣ឆ្នាំ លោក គឺ សែ អាយុ ៤៩ឆ្នាំ និងលោកស្រី ចាន់ ពៅ អាយុ ៣២ឆ្នាំ ជាជនសមគំនិត។ ប៉ុន្តែតុលាការបានសម្រេចឲ្យពូកគេទាំង ៣នាក់ អនុវត្តន៍ទោសនៅក្នុងពន្ធនាគារ ក្នុងម្នាក់ៗ ៨ខែ ១៥ថ្ងៃ ក្រៅពីនេះ ទោសនោះត្រូវព្យួរ។
ចៅក្រមជម្រះក្ដី លោក កែ សាខន នៅក្នុងចំណោមចៅក្រមប្រឹក្សាចំនួន ២នាក់ទៀត នៃតុលាការក្រុងភ្នំពេញ បានប្រកាសសាលក្រមបន្តថា តុលាការក្រុងភ្នំពេញ បើកផ្លូវឲ្យអ្នកទាំង ៣នាក់នេះ ប្ដឹងទាស់ទៅសាលាឧទ្ធរណ៍ក្នុងរយៈពេល ១ខែ ចាប់ពីថ្ងៃប្រកាសសាលក្រមនេះ។
លោក មាស ចាន់ធឿន អាយុ ៥៣ឆ្នាំ ដែលរងការកាត់ទោសខាងលើនេះ បានមានប្រសាសន៍ថា លោកមិនទទួលយកសាលក្រមនេះទេ។ លោកនឹងពិគ្រោះជាមួយមេធាវីរបស់លោក ដើម្បីប្ដឹងទាស់ទៅសាលាឧទ្ធរណ៍ទៀត។
តុលាការបានផ្ដន្ទាទោសជនជាប់ចោទទាំង ៣នាក់ខាងលើនេះ តាមមាត្រា ទី១០៧ និង ១០៨ នៃច្បាប់ព្រហ្មទណ្ឌ ស្ដីពីការបង្ក្រាបការជួញដូរកុមារ និងជួញដូរផ្លូវភេទ។
លោក ទេព មុនីជាតិ ជាមេធាវីរបស់លោក មាស ចាន់ធឿន លោក គឺ សែ និងលោកស្រី ចាន់ ពៅ បានមានប្រសាសន៍ថា ៖ «ពុំផ្ដល់ភាពយុត្តិធម៌ដល់កូនក្តីខ្ញុំនៅឡើយទេ ព្រោះភាគីខាងស្រីជានីតិជន អាយុ១៩ឆ្នាំ ហើយយើងគិតថា អាយុ១៩ឆ្នាំ មានសិទ្ធិស្រឡាញ់គ្នា ដោយមានការព្រមព្រៀងគ្នាទៅវិញទៅមក។ ហើយច្បាប់អត់មានចែងទេ បើសិនជាចាប់ពីអាយុ ១៩ឆ្នាំឡើងទៅ គឺមានសិទ្ធិប្រើមនោសញ្ចេតនាស្រឡាញ់គ្នា ទៅវិញទៅមក ដោយអត់មានច្បាប់ដាក់ទោសទណ្ឌទេ។ បើគិតពីច្បាប់ជួញដូរផ្លូវភេទ ទាល់តែមនុស្សហ្នឹង គឺអនីតិជន។ អ៊ីចឹងការកាត់ក្តីឲ្យកូនក្តីរបស់ខ្ញុំជាប់ទោស ៣ឆ្នាំ ហើយមានព្យួរទោសខ្លះ និងអនុវត្តទោសខ្លះ ក៏មិនទាន់ផ្ដល់ភាពយុត្តិធម៌ដល់កូនក្តីខ្ញុំបាទដែរ»។
មេធាវីរបស់កុមារីរងគ្រោះ លោកស្រី ប៉េង ម៉ាណែត នៃអង្គការសកម្មភាពដើម្បីកុមារ (Action Pour Les Enfants) នៅក្នុងប្រទេសកម្ពុជា បានមានប្រសាសន៍ថា លោកស្រីសុំមិនធ្វើអត្ថាធិប្បាយទេ ដោយសារមូលហេតុសុវត្ថិភាពផ្ទាល់ខ្លួន។
បញ្ហាចម្រូងចម្រាសគ្នាខ្លាំង រវាងភាគីដើមចោទ និងចុងចោទនៅក្នុងសវនាការកន្លងមក គឺអាយុរបស់កុមារីរងគ្រោះ ដោយសារតែមានឯកសារមួយ បានបញ្ជាក់ថា កុមារីរងគ្រោះ អាយុ ១៦ឆ្នាំ និងមានឯកសារមួយផ្សេងទៀត បញ្ជាក់ថា កុមារីរងគ្រោះ មានអាយុ ១៩ឆ្នាំ។
លោក មាស ចាន់ធឿន អាយុ ៥៣ឆ្នាំ បានរងការចាប់ខ្លួន កាលពីខែកញ្ញា ឆ្នាំ២០០៩ កន្លងទៅ ដោយសារតែលោកបានស្រឡាញ់លួចលាក់ជាមួយកុមារីរងគ្រោះ ជាកម្មករកាត់ដេរ។ លោកបាននាំនាងទៅសណ្ឋាគារមួយ នៅក្នុងទីក្រុងភ្នំពេញ ហើយបានឲ្យលុយទៅកុមារីរងគ្រោះចំនួន ២០០ដុល្លារអាមេរិក ដើម្បីជួយដល់គ្រួសារនាងក្រីក្រ។
លោក គឺ សែ និងលោកស្រី ចាន់ ពៅ ដែលជាអ្នកទាក់ទងកុមារីរងគ្រោះ ឲ្យលោក មាស ចាន់ធឿន ត្រូវបានអាជ្ញាធរចាប់ខ្លួនផងដែរ កាលពីខែកញ្ញា ឆ្នាំ២០០៩ ក្រោមបទសមគំនិត។
កុមារីរងគ្រោះត្រូវបានគេអះអាងថា កំពុងតែស្ថិតក្រោមកិច្ចគាំពាររបស់អង្គការសកម្មភាពដើម្បីកុមារនោះ នៅក្នុងទីក្រុងភ្នំពេញ៕