មន្ត្រីតុលាការខេត្តសៀមរាប បានឲ្យដឹងថា គេបានចោទប្រកាន់បុរសជនជាតិអាមេរិកាំងម្នាក់ ពីបទទិញកុមារីខ្មែរជាអនីតិជន ដើម្បីធ្វើការរួមភេទ ដោយសម្រេចឃុំខ្លួនជននោះជាបណ្ដោះអាសន្នក្នុងពន្ធនាគារ រង់ចាំបន្តការស៊ើបអង្កេតឲ្យបានច្បាស់លាស់។
ព្រះរាជអាជ្ញាអមសាលាដំបូងខេត្តសៀមរាប លោក ទី សុវិនថាល់ បានមានប្រសាសន៍កាលពីព្រឹកថ្ងៃអាទិត្យទី១៣ ខែមិថុនាថា បុរសជនជាតិអាមេរិកាំងមួយរូប ឈ្មោះ Ronald Dean Birchfield អាយុ៤៣ឆ្នាំ ដែលឆ្លងដែនមកប្រទេសកម្ពុជា ក្នុងនាមជាទេសចរណ៍ ត្រូវបានតុលាការសម្រេចឃុំខ្លួនជាបណ្ដោះអាសន្ន កាលពី២ថ្ងៃមុន ពីបទចោទប្រកាន់ថា បានទិញកុមារីខ្មែរមិនទាន់គ្រប់អាយុ ដើម្បីរួមភេទដែលច្បាប់បានហាមឃាត់។
លោកមានប្រសាសន៍បន្ត ៖ «ឃុំខ្លួនបណ្ដោះអាសន្ន ២ថ្ងៃ ថ្ងៃនេះហើយ តាំងពីថ្ងៃសុក្រ។ ពីបទទិញក្នុងច្បាប់ស្ដីពីការបង្ក្រាបបទល្មើសជួញដូរស្ត្រី និងកុមារ។ អាហ្នឹងស្ថិតនៅក្នុងការស៊ើបអង្កេត ស៊ើបសួរនៅឡើយទេ មិនទាន់កំណត់ថា គាត់មានពិរុទ្ធភាពគ្រប់គ្រាន់សម្រាប់ផ្ដន្ទាទោសដាក់គុក។ ឥឡូវគ្រាន់តែជាការឃុំខ្លួនបណ្ដោះអាសន្ន»។
មន្ត្រីតុលាការដដែល បានឲ្យដឹងថា គេបានបញ្ជាឲ្យចាប់ខ្លួនស្ត្រីឈ្មោះ វង់ ឡាង អាយុ៤០ឆ្នាំ ដែលជាម្ដាយក្មេងស្រីផងដែរ នៅក្នុងរឿងពាក់ព័ន្ធជាមួយបុរសជនជាតិអាមេរិកាំងម្នាក់នោះ។
លោក ស៊ុន ប៊ុនថង ប្រធានការិយាល័យប្រឆាំងការជួញដូរ និងការពារអនីតិជនរបស់ស្នងការនគរបាលខេត្តសៀមរាប បានមានប្រសាសន៍ថា សមត្ថកិច្ចបានចាប់ខ្លួនបុរសជនជាតិអាមេរិកាំងឈ្មោះ Ronald កាលពីថ្ងៃទី១០ ខែមិថុនាកន្លងមក តាមការចោទប្រកាន់ពីបទទិញពេស្យាចារលើកុមារ។ មន្ត្រីប៉ូលិសដដែល បានឲ្យដឹងថា បុរសអាមេរិកាំងរូបនោះ គឺជាមុខសញ្ញាដែលប៉ូលិសធ្លាប់បានតាមដានម្ដងមកហើយ កាលពីឆ្នាំ២០០៩ នៅពេលដែលចូលមកធ្វើទេសចរណ៍នៅខេត្តសៀមរាប ហើយបានទំនាក់ទំនងជាមួយក្រុមកុមារីខ្មែរ ដែលលក់វត្ថុអនុស្សាវរីយ៍ នៅតំបន់មុខអង្គរវត្ត។
លោក ស៊ុន ប៊ុនថង មានប្រសាសន៍បន្តថា ៖ «យប់ថ្ងៃទី៨ ខ្ញុំបានសហការជាមួយអង្គការក្រៅរដ្ឋាភិបាលមួយ ហើយយើងបានធ្វើការឃ្លាំមើលប្រហែលជាម៉ោង១០យប់ យើងឃើញក្មេងស្រីចេញពីបន្ទប់សណ្ឋាគារ ដែលខ្លួនស្នាក់នៅ ឆ្លងមកបន្ទប់ជនសង្ស័យ អស់រយៈពេលជាង ១ម៉ោង បានចេញទៅវិញ ហើយនៅថ្ងៃទី៩នោះ យើងបានដំណើរការឃ្លាំមើលម្តងទៀត ដែលលទ្ធផលយើងអត់បានទទួលអ្វីទេ។ អ៊ីចឹង នៅថ្ងៃទី១០ព្រឹក យើងសម្រេចអញ្ជើញគាត់ទៅស្ថានីយប៉ូលិស ដើម្បីសាកសួរ។ នៅពេលដែលយើងបានធ្វើការសាកសួរ ហើយធ្វើការត្រួតពិនិត្យចុងក្រោយ យើងជីកសួរថា ម្ដាយរបស់ក្មេងស្រីទទួលបានលុយ ៤០០ដុល្លារ»។
សេចក្ដីប្រកាសព័ត៌មានមួយ ដែលធ្វើឡើងដោយអង្គការសកម្មភាពដើម្បីកុមារ បន្ទាប់ពីការចាប់ខ្លួនបុរសជនជាតិអាមេរិកាំងម្នាក់នោះ បានអះអាងថា នៅអំឡុងខែមិថុនា ឆ្នាំ២០០៩ បុរសជនជាតិអាមេរិកាំងរូបនោះ បានចូលមកប្រទេសកម្ពុជា ដើម្បីធ្វើទេសចរណ៍នៅប្រាសាទអង្គរវត្ត ដែលជាកន្លែងចាប់ផ្ដើមទំនាក់ទំនងជាមួយកុមារីខ្មែរចំនួន ៣-៤នាក់ អាយុប្រហែលពី ១៤ទៅ១៦ឆ្នាំ ជាអ្នកលក់វត្ថុអនុស្សាវរីយ៍នៅតំបន់អង្គរ។ ជនសង្ស័យបានបបួលកុមារីខ្មែរទាំងនោះ ឲ្យនាំគេដើរកម្សាន្តក្នុងទីក្រុង និងប្រាសាទនានាក្នុងខេត្តសៀមរាប ដោយសន្យាថានឹងឲ្យប្រាក់ទៅកុមារីទាំងនោះ ១០០ដុល្លារក្នុងម្នាក់ៗ។
តាមការស៊ើបអង្កេត ក្នុងចំណោមកុមារីខ្មែរ ដែលដើរជាមួយបុរសជនជាតិអាមេរិកាំងនោះ បានឲ្យដឹងថា ជនសង្ស័យបានជួលផ្ទះមួយកន្លែងដើម្បីស្នាក់នៅក្នុងខេត្តសៀមរាប ហើយតែងនាំកុមារីខ្មែរទៅលេងផ្ទះនោះជារឿយៗ។ ក្នុងចំណោមកុមារីដែលទៅលេងនៅផ្ទះនោះ ខ្លះបានអះអាងថា បុរសជនជាតិអាមេរិកាំងរូបនោះ បានចូលទៅក្នុងបន្ទប់ ដែលពួកគេស្នាក់នៅ ដោយចាប់អោបនិងថើបពួកគេ និងនិយាយសុំរៀបការផង៕