«មិនដឹងធ្វើម៉េច បើនិយាយអ្នកដាក់ ជួនកាលគេមកពីណាពីណីមកទៅ គេជួល គេយកមកចាក់អាហ្នឹងដែរ ដល់យើងប្រាប់គេទៅ គេសុទ្ធតែគំហកថាអ៊ីចេះអ៊ីចុះ ។ ចោលហ្នឹងគួរតែក្រុមហ៊ុនស៊ីនទ្រីកើបឲ្យស្អាត ដើម្បីចៀសវាងការប៉ះពាល់សុខភាពដល់ប្រជាជននៅទីនេះ» ៖ នេះគឺជាការបញ្ជាក់ប្រាប់របស់ប្រជាពលរដ្ឋអ្នកនៅទីក្រុងភ្នំពេញមួយចំនួន អំពីបញ្ហាការបោះចោលកាកសំណល់សំរាមផ្សេងៗ ហើយនិងការប្រមូលទុកដាក់សំរាមរបស់ក្រុមហ៊ុនស៊ីនទ្រី ដែលគេសង្កេតឃើញថា នៅមិនទាន់មានអនាម័យស្អាតល្អឡើយសព្វថ្ងៃនេះ ដែលជាហេតុបង្កឲ្យបរិស្ថានអាប់អួរនិងធ្វើឲ្យមានផលប៉ះពាល់ដល់សុខភាពរបស់ពលរដ្ឋដែលកំពុងរស់នៅក្នុងទីក្រុងនេះ ជាពិសេសអ្នកដែលរស់នៅក្បែរគំនរសំរាមដែលគេយកមកបោះចោលទុកយូរថ្ងៃ ។
ប្រជាពលរដ្ឋទាំងនោះបានបន្តថា ការគ្រប់គ្រងកាកសំណល់សំរាមនៅទីក្រុងភ្នំពេញរហូតមកដល់ពេលនេះ គេឃើញថានៅតែមិនទាន់ត្រូវបានយកចិត្តទុកដាក់ពីសំណាក់ក្រុមហ៊ុនស៊ីនទ្រីអ្នកប្រមូលសំរាម និងអាជ្ញាធរក្រុងភ្នំពេញនោះទេ ពីព្រោះសព្វថ្ងៃនេះសំរាមមួយចំនួននោះត្រូវបានគេបោះចោលឲ្យនៅរាយប៉ាយគ្មានសណ្ដាប់ធ្នាប់ ដែលមាននៅតាមដងផ្លូវសាធារណៈ នៅក្បែររបងសាលារៀន របងវត្តអារាម ដែលកន្លែងខ្លះឡើងគំនរគរទុកដូចជាភ្នំ និងមានជះក្លិនស្អុយរលួយថែមទៀត ។
ប្រជាពលរដ្ឋមួយរូបឈ្មោះ សុភ័ក្រ្ដ នៅក្នុងសង្កាត់ផ្សារដើមគរ ក្រុងភ្នំពេញ ដែលនៅចំពីមុខផ្ទះរបស់គាត់ពោរពេញទៅដោយគំនរកាកសំណល់សំរាមមួយពំនូកធំនោះ បានបញ្ជាក់ប្រាប់អ្នកយកព័ត៌មានវិទ្យុអាស៊ីសេរីថា រូបគាត់មានការធុញថប់នឹងគំនរសំរាមនេះខ្លាំងណាស់ ពីព្រោះមួយថ្ងៃៗដែលផ្ទះរបស់គាត់ត្រូវរកស៊ីលក់ដូររបស់របរ ហើយភ្ញៀវចេញចូលទិញអីវ៉ាន់នោះ គេតែងតែរអ៊ូរទាំថាមានក្លិនស្អុយពិបាកទ្រាំ ។ ចំណែកឯគ្រួសារគាត់ដែលរស់នៅទីនេះក៏ត្រូវរងនូវផលប៉ះពាល់សុខភាពពីក្លិនសំរាមនោះជារៀងរាល់ថ្ងៃ ។
អ្នកស្រី សុភ័ក្រ្ដ បានឲ្យដឹងថា ៖ «រស់បែបហ្នឹងវាខូចសុខភាពយើង និយាយទៅសំរាមហ្នឹងយើងហាមដែរ ប៉ុន្តែគេដូចអត់ស្ដាប់យើងទេ ដូចថាគំនរសំរាមធ្លាប់ចាក់អ៊ីចឹង គេនៅតែចាក់អ៊ីចឹង យើងប្រាប់យ៉ាងណាក៏គេមិនស្ដាប់យើងដែរ» ។
បញ្ចាក់ប្រាប់ស្រដៀងគ្នានេះដែរប្រជាពលរដ្ឋមួយរូបទៀតឈ្មោះ សុភា ដែលកំពុងលក់ទឹកអំពៅនៅទល់មុខគំនរសំរាមមួយជិតហាងលក់សាំងក្បែរផ្សារដើមគ បានបញ្ជាក់ថារូបគាត់អង្គុយលក់ទឹកអំពៅនៅទីនេះ ពិបាកទ្រាំទ្រនិងក្លិនស្អុយរបស់សំរាមដែលជះក្លិនមកមិនដាច់ ប៉ុន្តែគាត់មិនដឹងជាធ្វើដូចម្ដេចទេ ពីព្រោះមិនអាចទៅរកទីកន្លែងណាផ្សេងលក់បានទេ ។
ប្រជាពលរដ្ឋរូបនោះបានបន្តថា ចំពោះគំនរសំរាមនេះបើតាមការសង្កេតឃើញរបស់គាត់គឺទាំងអ្នកយកសំរាមមកបោះចោល ហើយនិងក្រុមហ៊ុនស៊ីនទ្រីដែលប្រមូលសំរាមនោះ គឺហាក់មិនសូវយកចិត្តទុកដាក់ប្រហាក់ប្រហែលគ្នាអំពីការរក្សាអនាម័យដើម្បីសុខភាពឡើយ ពីព្រោះអ្នកបង្កើតសំរាមចេះតែយកកាកសំណល់សំរាមរបស់គេមកគ្រវែងចោលនៅទីនេះ ដោយមិនដឹងម៉ោងពេលគេមកដឹកសំរាម ។ ឯចំណែកក្រុមហ៊ុនស៊ីនទ្រីប្រមូលសំរាមវិញក៏មិនឃើញមានការណែនាំដល់អ្នកបោះសំរាមទាំងនោះដែរ ។
ប្រជាពលរដ្ឋដដែលបានមានប្រសាសន៍ថា ៖ «ខ្ញុំចង់សំណូមពរឲ្យឡានហ្នឹងមកយកតាមផ្ទះទៅ ដល់ពេលហើយស៊ីប្លេឲ្យគេយកមកចាក់ខ្លួនគេ កុំឲ្យធ្វើអ៊ីចឹង អត់ចង់ឲ្យគេដាក់អ៊ីចឹងទេ ។ រាល់សំរាមទាំងអស់ដែលប្រជាជនយកមកបោះចោលហ្នឹង គួរតែស៊ីនទ្រីព្យាយាមកើបឲ្យអស់ ព្រោះក្នុងវិក្កយបត្រភ្លើង ស៊ីនទ្រីបានដាក់ទឹកប្រាក់បង់ក្នុងហ្នឹងហើយ ។ ផ្ទះល្វែងទូទៅ មួយល្វែង១ដុល្លារអីរួចហើយ» ។
ទាក់ទងនឹងបញ្ហាសំរាមនៅទីក្រុងភ្នំពេញដែលមិនបានប្រមូលទុកដាក់ឲ្យបានត្រឹមត្រូវ ហើយរងការរិះគន់ពីប្រជាពលរដ្ឋដូចបានបញ្ជាក់មកនេះ ចំណែកឯអភិបាលក្រុង លោក កែប ជុតិមា ក៏ធ្លាប់បានលើកឡើងផងដែរកាលពីក្នុងអំឡុងពេលប្រារព្ធពិធីនៅថ្ងៃ ១៧ មេសាកន្លងទៅ នៅវត្តជើងឯកនោះ ដោយមានប្រសាសន៍ថាបញ្ហានេះគឺជារឿងរបស់ក្រុមហ៊ុនស៊ីនទ្រី ដែលជាអ្នកប្រមូលសំរាម ពីព្រោះក្រុមហ៊ុននោះបានយកថ្លៃប្រមូលសំរាមពីប្រជាពលរដ្ឋនៅរៀងរាល់ខែ ។
លោក កែប ជុតិមា បានមានប្រសាសន៍ថា ៖ «គាត់យកលុយគេ គាត់ត្រូវតែប្រមូល ។ ខ្ញុំគិតថាប្រជាពលរដ្ឋយើងត្រូវតែមានប្រតិកម្ម ពីព្រោះគាត់យកលុយគាត់ យកលុយរាល់ខែ គាត់ប្រមូលមិនស្អាត រឿងរបស់គាត់» ។
ចំពោះការលើកឡើងរបស់លោកអភិបាលក្រុងនិងប្រជាពលរដ្ឋអំពីការប្រមូលសំរាមមិនស្អាតនេះ វិទ្យុអាស៊ីសេរីបានព្យាយាមសាកសួរទៅនាយកក្រុមហ៊ុនស៊ីនទ្រី គឺលោក សាវី ផងដែរ ប៉ុន្តែលោកបានប្រាប់ថា ឲ្យសួរទៅលោកនាយករង សេង ចំរើន វិញ ដោយហេតុលោកមិនស្រួលខ្លួននៅក្នុងថ្ងៃនេះ ។
វិទ្យុយើងក៏បានទូរស័ព្ទសួរទៅលោកនាយករង សេង ចំរើន ជាច្រើនដង តែទូរស័ព្ទរបស់លោកគ្រាន់តែមានសំឡេងរោទ៍ចោលមិនមានអ្នកលើក ក៏ប៉ុន្តែទោះជាយ៉ាងនេះក្តី នាយករងក្រុមហ៊ុនប្រមូលសំរាមស៊ីនទ្រី លោក សេង ចំរើន ធ្លាប់បានបញ្ជាក់ប្រាប់អ្នកយកព័ត៌មានកាលពីប៉ុន្មានខែមុននេះដែរថា លោកក៏ទទួលស្គាល់ផងដែរចំពោះភាពយឺតយ៉ាវរបស់ក្រុមហ៊ុនក្នុងការទុកដាក់សំរាមនោះ ។
ក៏ប៉ុន្តែលោកបានបន្តទៀតថា បញ្ហានេះក៏បណ្ដាលមកពីសាលាក្រុងភ្នំពេញដែលមានការយឺតយ៉ាវក្នុងការធ្វើផ្លូវចូលទៅកាន់ទីលានចោលសំរាមស្ទឹងមានជ័យ ដែលជាហេតុនាំឲ្យក្រុមហ៊ុនដឹកសំរាមមានការពិបាកនាំយកសំរាមទៅចាក់ចោលឲ្យបានទាន់ពេលវេលា ពីព្រោះឡានត្រូវលិចទឹកហើយជាប់ផុងយ៉ាងញឹកញាប់ ។
លោក សេង ចំរើន បានបញ្ជាក់ថា ៖ «វាមានពីរបញ្ហាធំ គឺផ្លូវចូលទីលាន ហើយផ្លូវនៅលើទីលាន ដោយសារខាងក្រុងហ្នឹង គាត់ឈូសឆាយ គាត់ធ្វើខ្វះបច្ចេកទេស ។ គាត់ក្រាលដែក ជួនកាលរអិល ជួនកាលបះដែកហ្នឹង ក៏បាក់បុកបែកកាទែរថយន្ត ម៉ាស៊ីនអី ឬជួនកាលទេ បែកកង់ ពិបាកដែរ» ។
ចំពោះការលើកឡើងរបស់ក្រុមហ៊ុនស៊ីនទ្រីនេះ អភិបាលក្រុងភ្នំពេញ លោក កែប ជុតិមា បានមានប្រសាសន៏ដែរថាអាជ្ញាធរក្រុងកំពុងតែធ្វើចលនាជួសជុលផ្លូវនោះហើយ ដោយមានការចូលរួមជួយពីប្រជាពលរដ្ឋដែលរស់នៅតាមដងផ្លូវនោះ ។ ប៉ុន្តែលោកបានឲ្យដឹងផងដែរថា នៅឆ្នាំ២០០៩ខាងមុខនេះ សាលាក្រុងនឹងបញ្ឈប់លែងឲ្យយកសំរាមទៅចាក់ចោលនៅទីលានស្ទឹងមានជ័យនោះទៀតហើយ ពីព្រោះពេញហៀរហូរមិនអាចផ្ទុកសំរាមបានតទៅទៀតទេ ។
ប្រជាពលរដ្ឋអ្នកទីក្រុងភ្នំពេញមួយចំនួន ជាពិសេសអ្នកដែលកំពុងតែរស់នៅក្បែរគំនរសំរាមដែលគេគរទុកចោលយូរថ្ងៃ ដូចជានៅសង្កាត់ផ្សារដើមគជាដើមនោះ បានប្រាប់ឲ្យដឹងដែរថាទោះជាមានការផ្លាស់ប្តូរទីតាំងចាក់សំរាម ឬមិនទាន់រើរុះក៏ដោយ គឺពេលនេះគេសំណូមពរដល់សាលាក្រុងភ្នំពេញធ្វើយ៉ាងណាជំរុញឲ្យក្រុមហ៊ុនស៊ីនទ្រីដែលយកថ្លៃសំរាមពីប្រជាពលរដ្ឋ សូមជួយធ្វើយ៉ាងណាឲ្យលុបបំបាត់គំនរសំរាមព្រមទាំងកាកសំណល់ផ្សេងៗឲ្យបានស្អាតចេញពីតំបន់ដែលគេរស់នៅ ពីព្រោះគំនរសំរាមស្អុយរលួយនោះបាននិងកំពុងតែធ្វើឲ្យមានផលប៉ះពាល់ដល់សុខភាពប្រជាពលរដ្ឋអ្នកដែលរស់នៅទីនោះយ៉ាងខ្លាំងក្លាបំផុត ៕