លោក សំ សុគង់ ជាមេធាវីការពារក្តីឲ្យលោក មឿង សុន បានមានប្រសាសន៍ប្រាប់វិទ្យុអាស៊ីសេរីនៅថៃ្ងពុធ ទី១៨ ខែវិច្ឆិកានេះថា ការកាត់ទោសកន្លងមកបានធ្វើទ្បើងដោយកំបាំងមុខ ដោយមិនបានអនុញ្ញាតឲ្យជនជាប់ចោទនោះបានមកតទល់ក្ដីនៅក្នុងសវនាការនោះទេ។
លោក សំ សុគង់ មានប្រសាសន៍ដូច្នេះ ៖ «កំបាំងមុខនេះហើយបានជាធ្វើឲ្យជនជាប់ចោទ ដែលខ្ញុំជាមេធាវីតំណាងគាត់ បានប្ដឹងជំទាស់ទៅនឹងសាលក្រមកំបាំងមុខហ្នឹង។ កាលណាមិនមានវត្តមានជនជាប់ចោទ បានន័យថា ជនជាប់ចោទមិនទាន់បានមកបំភ្លឺ ក៏ដូចជាបានមកបង្ហាញភស្តុតាងផ្សេងៗដែលគាត់នឹងយកមកឲ្យតុលាការហ្នឹងកាត់ក្ដីប្រកបដោយយុត្តិធម៌ចំពោះខ្លួនគាត់»។
លោក មឿង សុន ជាប្រធាននៃអង្គការមូលនិធីទ្រទ្រង់អរិយធម៌ខែ្មរ បានមានប្រសាសន៍ប្រាប់វិទ្យុអាស៊ីសេរី តាមទូរស័ព្ទពីប្រទេសបារាំងមកថា លោកមិនអាចមកចូលរួមក្នុងសវនាការខាងមុខនេះបានទេ។
លោក មឿង សុន បានឲ្យដឹងដូច្នេះ ៖ «ពីព្រោះដោយសារខ្ញុំមានការភ័យបារម្ភ ក្នុងការចាប់ខ្លួនរបស់អំណាចនៃតុលាការនៅប្រទេសកម្ពុជា ដែលលោកបានកាត់ទោសរួចជាស្រេចហើយកាលពីថ្ងៃទី១៤ ខែ៧ កន្លងទៅ គឺពុំមានយុត្តិធម៌សម្រាប់រូបខ្ញុំ។ ភស្តុតាងមួយដ៏សំខាន់បញ្ជាក់ថា អ្វីដែលខ្ញុំបានលើកឡើងនៅក្នុងលិខិតជូនសម្ដេច ហ៊ុន សែន មិនមែនជារឿងខុស មិនមែនប្រឌិត ហើយក៏មិនមែនញុះញង់ ពីព្រោះយូណេស្កូជាស្ថាប័នមួយកំពូលដែលត្រួតពិនិត្យនូវបេតិកភណ្ឌជាតិ និងពិភពលោកនៅក្នុងប្រទេសកម្ពុជា ហើយនិងគេមានការបារម្ភយល់ដូចខ្ញុំដែរ ហ្នឹងគំនិតរបស់ខ្ញុំជាគំនិតត្រឹមត្រូវ»។
លោក ប៉ាល់ ចាន់ដារ៉ា ជាមេធាវីការពារក្តីឲ្យរដ្ឋាភិបាលកម្ពុជាជាដើមបណ្ដឹងនោះ បានមានប្រសាសន៍ថា ជំហររបស់លោកមិនប្រែប្រួលទេ ៖ «រដ្ឋាភិបាលនៅតែដដែល ប្ដឹងដដែល ពីបទផ្សាយព័ត៌មានមិនពិតនិងញុះញង់ដដែល»។
លោក មឿង សុន ប្រធាននៃអង្គការមូលនិធិទ្រទ្រង់អរិយធម៌ខែ្មរ ត្រូវបានតុលាការសាលាដំបូងរាជធានីភ្នំពេញ បានផ្តន្ទាទោសកំបាំងមុខកាលពីថៃ្ងទី១៤ ខែកក្កដាកន្លងទៅ ឲ្យជាប់គុក២ឆ្នាំ និងផាកពិន័យជាប្រាក់ចំនួន១៥លានរៀល ក្រោមបទផ្សាយព័ត៌មានមិនពិតនិងញុះញង់ ក្រោយពីលោកបានចោទប្រកាន់ថា ក្រុមហ៊ុនឯកជនមួយឈ្មោះស៊ូជីង បានដាប់ថ្មអង្គរវត្តដើម្បីដាក់អំពូលអគ្គិសនីកាលពីខែឧសភាកន្លងទៅ។ រឿងនោះហើយបានញ៉ាំងឲ្យមានប្រតិកម្មជាច្រើនពីមន្រ្តីរដ្ឋាភិបាលកម្ពុជា និងមន្រ្តីរបស់យូណេស្កូ ព្រមទាំងប្រជាពលរដ្ឋកម្ពុជា៕