លោក សួស ណារិន អ្នកស៊ើបអង្កេតរបស់សមាគមការពារសិទ្ធិមនុស្សអាដហុក ប្រចាំខេត្តសៀមរាប ដែលបានចូលស្តាប់សវនាការបានមានប្រសាសន៍ថា តំណាងអ្នកតវ៉ាដីស្រែប្រាំងនៅឃុំជីក្រែង ស្រុកជីក្រែង ចំនួន៥នាក់ ត្រូវបានគេចោទប្រកាន់ពីបទបង្ខាំងមនុស្សខុសច្បាប់ មានឈ្មោះ ស៊ិន លាភ, ច័ន្ទ លាភ, ឆេង សាវឿន, គ្លិន អៀង និង ស៊ីញ សំឡី ក៏ប៉ុន្តែជនជាប់ចោទ២នាក់ក្នុងចំណោមនោះមិនមានវត្តមានក្នុងសវនាការទេ។
លោក សួស ណារិន បានមានប្រសាសន៍ថា សហចៅក្រមចំនួន៣រូបបានបើកសវនាការដេញដោលរឿងនោះ ក៏ប៉ុន្តែគេមិនទាន់ដឹងការវិនិច្ឆ័យយ៉ាងណានៅឡើយ ដោយការប្រកាសសាលក្រមត្រូវបានពន្យារពេលទៅថ្ងៃទី៧ ខែធ្នូ។
លោក សួស ណារិន មានប្រសាសន៍ដូច្នេះ ៖ «ចម្លើយរបស់ជនជាប់ចោទទាំង៣រូបហ្នឹង គេបដិសេធនូវអ្វីដែលជាការចោទប្រកាន់នោះ។ ចំណុចបដិសេធហ្នឹងវាស្ថិតនៅក្នុងវិមតិសង្ស័យខ្លះដែលធ្វើឲ្យមេធាវីការពារជនជាប់ចោទហ្នឹង គេសុំឲ្យលើកលែងការចោទប្រកាន់នោះ»។
មេធាវីការពារតំណាងអ្នកភូមិជីក្រែង លោក លួង សុខា បានមានប្រសាសន៍ថា អ្នកភូមិ៣នាក់ដែលជាភាគីជម្លោះដីធ្លីម្ខាងទៀត បានចោទប្រកាន់កូនក្តីរបស់លោក៥នាក់ថា បានទៅឃាត់ពួកគេមិនឲ្យសាបគ្រាប់ស្រូវនិងស្ទូងក្នុងដីទំនាស់ ហើយបានឃាត់ពួកគេមិនឲ្យទៅផ្ទះ កាលពីថ្ងៃទី២៩ ខែវិច្ឆិកា ឆ្នាំ២០០៨ កន្លងមក។
លោក លួង សុខា បានមានប្រសាសន៍ថា លោកសុំឲ្យតុលាការលើកលែងការចោទប្រកាន់បទបង្ខាំងមនុស្សខុសច្បាប់នេះចេញពីកូនក្តីរបស់លោក ប៉ុន្តែលោកមិនដឹងថាយ៉ាងណា ពីព្រោះតុលាការមិនទាន់ប្រកាសសាលក្រមនៅឡើយ។
លោក លួង សុខា មានប្រសាសន៍ដូច្នេះ ៖ «ខ្ញុំសុំឲ្យតុលាការលើកលែងបទចោទប្រកាន់ពីបទបង្ខាំងមនុស្សខុសច្បាប់ ដែលមានដើមបណ្ដឹង២នាក់គេប្តឹងយើងហ្នឹង មិនអាចទៅដាក់បន្ទុកអីឲ្យច្បាស់១០០%ទេ រឿងនេះវានៅស្រពេចស្រពិលខ្លាំងណាស់»។
សហចៅក្រមនៃសវនាការជំនុំជម្រះ លោក លី សុខឡេង មិនបានពន្យល់ក្បោះក្បាយទេកាលពីព្រឹកថ្ងៃពុធ (២ ធ្នូ) ដោយលោកគ្រាន់តែមានប្រសាសន៍ថា រឿងនេះតុលាការរង់ចាំការពិគ្រោះគ្នាមួយរយៈសិន។
តំណាងអ្នកឃុំជីក្រែង ដែលតវ៉ាដីស្រែប្រាំងនៅទំនប់៧៨សួងចំនួន៣នាក់ក្នុងសវនាការកាលពីព្រឹក(២ ធ្នូ)នេះ ម្នាក់ឈ្មោះ ឃឹម សាវឿន ត្រូវបានសមត្ថកិច្ចចាប់ឃុំខ្លួនកាលពីថ្ងៃទី២២ ខែមីនា បន្ទាប់ពីមានការបង្រ្កាបដោយបាញ់រះ និងឈ្មោះ ស៊ិន លាភ, ច័ន្ទ លាភ ត្រូវបានសមត្ថកិច្ចចាប់ឃុំខ្លួនម្តងមកហើយ កាលពីខែធ្នូ ឆ្នាំ២០០៨ ក្រោយមកត្រូវបានដោះលែងមួយរយៈ និងបន្ទាប់មកត្រូវបានចាប់ឃុំខ្លួនវិញកាលពីខែមិថុនា ឆ្នាំ២០០៩ ដោយចោទប្រកាន់ពីបទបង្ខាំងមនុស្សខុសច្បាប់។
ស្របពេលដែលបើកសវនាការជំនុំជម្រះទោសតំណាងប្រជាពលរដ្ឋឃុំជីក្រែង កាលពីព្រឹកថ្ងៃពុធ (២ ធ្នូ) ប៉ូលិសប៉ុស្តិ៍ឃុំគៀនសង្កែ ស្រុកសូត្រនិគម បានរារាំងប្រជាពលរដ្ឋឃុំជីក្រែង ជាង២០នាក់មិនឲ្យធ្វើដំណើរចូលមកខេត្តសៀមរាប ដើម្បីចូលរួមស្តាប់សវនាការនោះទេ៕