មេដឹកនាំចលនាប្រឆាំងដែលកំពុងកាប់កាប់អគាររដ្ឋាភិបាលថៃ គឺលោក ចំលង ស្រ៊ីមួង បានថ្លែងប្រាប់អ្នកសារព័ត៌មានថា បុរសទាំងពីររូបឈ្មោះ ថានី ខានុរី អាយុ២៨ឆ្នាំ និង វ៉ាតតាណា អាយុ ២២ឆ្នាំ គឺជាឆ្មាំសន្តិសុខរបស់សម្ព័ន្ធភាពប្រជាជនដើម្បីលទ្ធិប្រជាធិបតេយ្យ ប៉ុន្តែពួកគេត្រូវបានបណ្តេញចេញពីក្រុមតាំងពី១០ថ្ងៃមុនមកម្ល៉េះ ដោយសារពួកគេមិនស្តាប់បង្គាប់និងចេះតែប្រព្រឹត្តមិនត្រឹមត្រូវពីមុនមក។
បុរសទាំងពីររូបត្រូវបានចាប់ខ្លួនកាលពីរសៀលថ្ងៃអាទិត្យ នៅខណៈដែលពួកគេជិះម៉ូតូនៅក្នុងស្រុកឌូស៊ីត ក្នុងក្រុងបាងកក។ ប៉ូលិសបានរឹបអូសពីពួកគេនូវគ្រាប់បែកដៃប្រភេទ M67 ចំនួន៣គ្រាប់ គ្រាប់បែកប្រភេទ Pingpong ចំនួន២២គ្រាប់ គ្រាប់បែកច្នៃមួយគ្រាប់ កាំភ្លើងខ្លី៤ដើម និងដាវសាំមួរ៉ៃមួយ។
នៅក្នុងព្រឹត្តិការណ៍ដាច់ដោយឡែកមួយទៀត កាលពីព្រឹកថ្ងៃច័ន្ទ ដើមសប្តាហ៍នេះដែរ ប៉ូលិសភាគខាងត្បូងប្រទេសថៃបានឲ្យដឹងថា ទាហានឈុតខ្មៅមួយរូបបានត្រូវសម្លាប់ និង៥នាក់ ផ្សេងទៀតរងរបួសនៅក្នុងការដាក់បំផ្ទុះគ្រាប់បែកដោយក្រុមឧទ្ទាមតាមដងផ្លូវក្នុងខេត្តណារ៉ាធីវ៉ាត់។
គួររំឭកផងដែរ កាលពីដើមសប្តាហ៍ទី១ នៃខែវិច្ឆិកានេះ មនុស្សប្រហែល៨០នាក់ រាប់ទាំងទាហានល្បាតរបស់ថៃផង បានត្រូវរងរបួសដោយការបង្កៃបំផ្ទុះគ្រាប់បែកដោយក្រុមឧទ្ទាមនៅខេត្តភាគខាងត្បូងមួយចំនួនរបស់ថៃ ជាប់នឹងប្រទេសម៉ាឡេស៊ី៕