ខេត្តចំនួនពីរកំពុងរងគ្រោះដោយសារទឹកជំនន់ទឹកភ្លៀង
h091912tn.mp3
មន្ត្រីគណៈកម្មាធិការជាតិគ្រប់គ្រងគ្រោះមហន្តរាយ និងអាជ្ញាធរខេត្ត កំពុងជួយផ្តល់ជំនួយមនុស្សធម៌ និងជម្លៀសអ្នកភូមិចេញទៅទីទួលមានសុវត្ថិភាព បន្ទាប់ពីមានរបាយការណ៍បឋមថា មានមនុស្ស២នាក់បានស្លាប់ក្នុងគ្រោះទឹកជំនន់ឆ្នាំនេះ។
នាយខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី ឲ្យដឹងនៅថ្ងៃទី១៩ ខែកញ្ញា ថា ទឹកជំនន់ទឹកភ្លៀង បានជន់លិចផ្ទះរបស់ប្រជាពលរដ្ឋ និងដីស្រែចម្ការរបស់អ្នកភូមិក្នុងខេត្តសៀមរាប និងខេត្តបន្ទាយមានជ័យ។ រីឯខេត្តមួយចំនួនទៀត រួមមានខេត្តព្រះវិហារ ទឹកបានចាប់ផ្ដើមស្រកនៅសល់ត្រឹមកម្ពស់ ១០,២៥ម៉ែត្រ តែមេឃនៅតែបន្តភ្លៀងដដែល។ ឯខេត្តកំពង់ធំ វិញ កម្ពស់ទឹកស្ទឹងសែន បានកើនឡើងដល់ ១៣,២០ម៉ែត្រ តែមិនទាន់ដល់កម្រិតប្រកាសអាសន្ននៅឡើយទេ ដែលមានកម្ពស់ ១៣,៦០ម៉ែត្រ។
លោក កែវ វី៖ «យើងមានតែ២ខេត្តទេ ដែលជន់លិចនៅបន្ទាយមានជ័យ ធ្ងន់ ហើយនិងនៅសៀមរាប មួយទេ ក្រៅពីហ្នឹង មិនទាន់ជន់លិចអីទេ គ្រាន់តែវាទឹកកើនឡើងនៅខេត្តកំពង់ធំ កំពង់អីហ្នឹង»។
តាមតួលេខបឋមដែលលោក កែវ វី ទទួលបានពីផលប៉ះពាល់នៃគ្រោះទឹកជំនន់ទឹកភ្លៀង បង្ហាញថា នៅក្នុងស្រុកពួក ខេត្តសៀមរាប លិចដំណាំស្រូវប្រមាណជាង៤ពាន់ហិកតារ។ រីឯខេត្តបន្ទាយមានជ័យ លិចដំណាំស្រូវប្រមាណជាង៥រយហិកតារ និងដំណាំដំឡូងមីជាង១ពាន់ហិកតារ។
នៅឯខេត្តបន្ទាយមានជ័យ អ្នកនាំពាក្យសាលាខេត្តបន្ទាយមានជ័យ លោក អ៊ុក កែវរតនៈ ឲ្យដឹងថា ទឹកជំនន់បានជន់លិចឃុំខ្លះ ក្នុងស្រុកម៉ាឡៃ ស្រុកអូរជ្រៅ និងក្រុងប៉ោយប៉ែត។ ហើយកម្ពស់ទឹកបានច្រាលឡើងខ្លាំងនៅថ្ងៃទី១៩ ខែកញ្ញា ដោយហូរចាក់មកពីស្រុកអារញ្ញ ប្រទេសថៃ ជាប់ព្រំប្រទល់ និងក្រុងប៉ោយប៉ែត ខេត្តបន្ទាយមានជ័យ។
លោកបន្តថា បើទឹកជំនន់ទឹកភ្លៀងក្នុងស្រុក វាមិនសូវរងគ្រោះប៉ុន្មានទេ តែរងគ្រោះធ្ងន់នោះ គឺទឹកជំនន់ច្រាលចេញពីស្រុកអារញ្ញ ប្រទេសថៃ ចាក់ចូលក្នុងអូរជ្រៅ និងបានពន្លិចហៀរតាមថ្នល់ជាតិលេខ៥ ផ្លូវលំមួយចំនួន និងផ្លូវរថភ្លើងដែលទើបតែសាងសង់រួច៖ «ព្រោះព្រឹកមិញនេះ ទឹកមកពីប្រទេសថៃ កាន់តែបុកខ្លាំង ព្រោះនៅប្រទេសថៃ វាភ្លៀងបុកកាត់ឡើងមកវាចូលដីប៉ោយប៉ែត តំបន់ទំនាបលិចស្ទើរគ្រប់ឃុំហើយ»។
លោកបន្តថា ស្រុកអារញ្ញ ប្រទេសថៃ នៅតែបន្តមានភ្លៀងធ្លាក់ ហើយទឹកជំនន់នៅតែបន្តហូរចូលតំបន់ទំនាបក្នុងប្រទេសកម្ពុជា ដោយអាជ្ញាធរខេត្តមិនអាចទប់ស្កាត់ ឬរារាំងទឹកនោះបានទេ។ លោកថា ទឹកជំនន់៤ថ្ងៃមកនេះ មានអ្នកភូមិមួយចំនួននៅតែក្រាញនៅក្នុងផ្ទះរបស់ខ្លួនដែលជន់លិចនោះ ព្រោះនឹកស្ដាយទ្រព្យសម្បត្តិមួយចំនួន។
តែទោះជាយ៉ាងណា អាជ្ញាធរខេត្តរំដោះពួកគេ និងជម្លៀសអ្នកភូមិជាង១ពាន់គ្រួសារ ទៅទីទួលមានសុវត្ថិភាពរួចហើយ តែតួលេខនេះអាចមានការកើនឡើងថែមទៀត ដោយសារតែអាជ្ញាធរនៅតែបន្តសកម្មភាពជម្លៀសអ្នកភូមិនៅឡើយ។
លោកបន្តថា មានផ្ទះអ្នកភូមិជាង២ពាន់ខ្នង បានជន់លិច និងមានផ្ទះខ្លះលិចបាត់ដំបូលតែម្តង ហើយប្រសិនបើស្ថានភាពទឹកជំនន់នៅតែបន្តអូសបន្លាយ១០ថ្ងៃទៀតនោះ ដំណាំស្រូវរបស់អ្នកភូមិនឹងរលួយខូចទាំងអស់៖ «ឥឡូវហ្នឹង យើងដឹងថា ផ្លូវថ្នល់ផ្លូវលំមួយចំនួន ត្រូវដាច់ ហើយដាច់ខ្ទេចខ្ទីអស់ហើយ។ ហើយម៉ាថ្ងៃម្សិលមិញ ដែលយើងមានដាក់នៅ ដែលហៅថាស្ទឹងបត់ ដែលយើងយកស្ពានដេឡេ ដើម្បីជួយសង្គ្រោះដាក់ ឥឡូវហ្នឹងស្ពានហ្នឹងច្រោះដាច់ក្បាលស្ពានទៅទៀត។ ឥឡូវស្ពានហ្នឹង ទឹកវាហូរកាត់ពីស្ពានហូរកាត់ច្រោះហូរដាច់ក្បាលស្ពានហ្នឹងទៅទៀត។ យើងមិនអាចទប់ស្កាត់បានតទៅទៀត វាសាហាវដល់ថ្នាក់ហ្នឹង»។
អ្នកនាំពាក្យសាលាខេត្តបន្ទាយមានជ័យ រូបនេះបន្តថា គ្រោះទឹកជំនន់នេះបានធ្វើឲ្យបុរសវ័យជាង៤០ឆ្នាំម្នាក់ស្លាប់ ហើយអាជ្ញាធរដឹងនៅពេលដែលសពជនរងគ្រោះទើបផុសចេញពីទឹក នៅថ្ងៃទី១៩ ខែកញ្ញា។ លោកឲ្យដឹងថា ខាងគណៈកម្មាធិការជាតិគ្រប់គ្រងគ្រោះមហន្តរាយ ដែលដឹកនាំដោយលោក ញឹម វណ្ណដា នឹងចុះចែកអំណោយកាកបាទក្រហម ដល់ជនរងគ្រោះនៅថ្ងៃព្រហស្បតិ៍ ហើយអាជ្ញាធរនឹងបង្កើនកម្លាំងថែមទៀត ដើម្បីជួយសង្គ្រោះជនរងគ្រោះឲ្យមានសុវត្ថិភាព។
របាយការណ៍បឋមដូចគ្នានៅឯខេត្តសៀមរាប ឲ្យដឹងថា មានកុមារម្នាក់ក៏បានស្លាប់ក្នុងគ្រោះទឹកជំនន់ទឹកភ្លៀងនៅខេត្តនោះដែរ។
លោក ស៊ូ ភិរិន្ទ អភិបាលខេត្តសៀមរាប បានមានប្រសាសន៍ថា ទឹកជំនន់ដែលកំពុងជន់លិចឃុំខ្លះនៃស្រុកពួក នោះ គឺមានលិចផ្នែកខ្លះនៃស្រុកអង្គរជុំ និងស្រុកក្រឡាញ់។ ទោះយ៉ាងណា អាជ្ញាធរខេត្តសៀមរាប មិនទាន់បានទទួលរបាយការណ៍ស្ដីពីការខូចខាត ដោយសារទឹកជំនន់នោះនៅឡើយទេ។ លោក ស៊ូ ភិរិន្ទ បានបញ្ជាក់ថា ទីក្រុងសៀមរាប ប្រហែលជាអាចជៀសផុតពីគ្រោះទឹកជំនន់នៅក្នុងឆ្នាំនេះ ដោយសារតែអាជ្ញាធរបានខិតខំបញ្ចៀសផ្លូវទឹកជាច្រើនកន្លែង។
ក្រសួងធនធានទឹក និងឧតុនិយម បានប្រកាសពីស្ថានភាពប្រឈមនឹងទឹកជំនន់ទឹកភ្លៀង បន្ទាប់ពីរកឃើញថា សម្ពាធទាប និងប្រព័ន្ធសម្ពាធទាប បានអូសកាត់ និងមានឥទ្ធិពលលើប្រទេសកម្ពុជា បង្កឲ្យមានភ្លៀងធ្លាក់ខ្លាំងនៅទូទាំងប្រទេស រហូតដល់ថ្ងៃទី២៣ ខែកញ្ញា ឆ្នាំ២០១២ ដែលអាចបង្កឲ្យមានទឹកជំនន់ទឹកភ្លៀងកើតឡើងចំនួន១៤ខេត្ត។
តាមអនុសាសន៍របស់លោកនាយករដ្ឋមន្ត្រី ហ៊ុន សែន ក្នុងការជួយសង្គ្រោះប្រជាពលរដ្ឋពីគ្រោះទឹកជំនន់ឆ្នាំ២០១២ ក្រសួងការពារជាតិ និងកងរាជអាវុធហត្ថ បានត្រៀមកម្លាំងប្រមាណជាង៥ពាន់នាក់ សម្រាប់ជួយសង្គ្រោះជនរងគ្រោះ រួមទាំងត្រៀមឧបករណ៍សង្គ្រោះមួយចំនួន រួមមាន ពោងសុវត្ថិភាព អូប័រ ទូក តង់ចល័ត ត្រៀមអាហារ ទឹកស្អាត បង្គន់អនាម័យ និងគ្រូពេទ្យសម្រាប់ជួយសង្គ្រោះពលរដ្ឋថែមទៀត។
ធនាគារអភិវឌ្ឍន៍អាស៊ី (ADB) បានវាយតម្លៃថា ការខូចខាតដោយសារគ្រោះទឹកជំនន់ឆ្នាំ២០១១ ក្នុងខេត្តចំនួន១៨ នៅប្រទេសកម្ពុជា មានតម្លៃសរុបជិត៥០០លានដុល្លារសហរដ្ឋអាមេរិក និងប៉ះពាល់ដល់ប្រជាពលរដ្ឋជិត២លាននាក់។ ទឹកជំនន់ឆ្នាំ២០១១ បានសម្លាប់មនុស្សចំនួន២៥០នាក់ និងមានប្រជាពលរដ្ឋជាង៥ម៉ឺនគ្រួសារ ត្រូវជម្លៀសទៅកាន់ទីទួលមានសុវត្ថិភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
CheyVorman007
ពី AngKor Watបើតាមយើងសង្កេតមើលទៅមិនដែលឃើញពួកលោកបណ្ឌិត
សេកទៅដេញពលរដ្ឆរស់នៅទីទឹកលិចនឹងទីយួនរស់នៅយកដី
មកអភិវឌ្ឈន៏សោះ លោកនឹងបក្សពួកត្រៀមចាំជួយចាំសង្រ្គោះ
ជានិច្ច យើងគួរអរគុណព្រះគុណនេះអោយស្មើនឹងគុណ៧មករា។
Sep 20, 2012 11:02 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
