ការចាប់រទេះគោក្របីអ្នកស្រុក នៅក្នុងឃុំជីខ ស្រុកស្រែអំបិល កាលពីម្សិលមិញ គឺបន្ទាប់ពីអ្នកស្រុកបានបរលើផ្លូវមួយ ដែលក្រុមលោកឧកញ៉ាបានហ៊ុមព័ទ្ធយកនិងបានដាំធ្វើជាចម្ការអំពៅ បន្ទាប់ពីរដ្ឋបានធ្វើសម្បទានជាដីសេដ្ឋកិច្ចទៅឲ្យលោកឧកញ៉ា លី យ៉ុងផាត់ នោះមក។
តំណាងប្រជាសហគមន៍ លោក អាន ឆៃយ៉ា ខេត្តកោះកុង បានប្រាប់វិទ្យុអាស៊ីសេរីថា មានការដោះស្រាយខ្លះហើយ បន្ទាប់ពីអ្នកស្រុកបានបង់ប្រាក់ ដោយការខ្លាចនឹងអំណាចក្រុមសន្តិសុខឯកជនរបស់លោកឧកញ៉ា លី យ៉ុងផាត់ នោះមក។
អាន ឆៃយ៉ា ៖ «កងសន្តិសុខស៊ីឈ្នួលការពារក្រុមហ៊ុនរបស់ឧកញ៉ា លី យ៉ុងផាត់ បានទៅយករទេះគោ ចាប់គោ ចាប់ក្របីប្រជាពលរដ្ឋដែលដឹកឫស្សីចេញមកពីតំបន់ព្រៃ ឆ្លងកាត់តាមផ្លូវប្រជាពលរដ្ឋប្រើប្រាស់ពីមុនមកនោះ ដោយសារមានការយកលុយទៅបង់រំលោះ ឥឡូវគេដោះលែង ៣រទេះហើយ នៅសល់ ៣រទេះទៀត»។
ហ៊ុយ វណ្ណៈ ៖ «តម្លៃគេទារបង់ហ្នឹងដោយសារអ្វី? ហើយតម្លៃប៉ុន្មានដែរ? អាន ឆៃយ៉ា ៖ «គេទារបង់ឮថា ១០ម៉ឺន ប៉ុន្តែប្រជាជនសុំឲ្យមានការដោះលែង ខ្លះឲ្យ ៣ម៉ឺន ខ្លះឲ្យ ៥ម៉ឺន»។
ហ៊ុយ វណ្ណៈ ៖ តើបង់ហ្នឹង បង់ទៅអាជ្ញាធរ ឬបង់ទៅក្រុមហ៊ុន?
អាន ឆៃយ៉ា ៖ «បង់ទៅខាងសន្តិសុខក្រុមហ៊ុន។ ប្រជាជនបានទៅពឹងពាក់អាជ្ញាធរភូមិឃុំដែរ ប៉ុន្តែអាជ្ញាធរខាងភូមិឃុំ ដូចអត់ទាន់មានឆ្លើយតបថា គេជួយធ្វើការសម្របសម្រួលដោះស្រាយយ៉ាងម៉េច ឲ្យប្រជាពលរដ្ឋផង អត់មាន»។
ហ៊ុយ វណ្ណៈ ៖ យ៉ាងម៉េចបានក្រុមហ៊ុនមានសិទ្ធិផាកទៅលើប្រជាជនអ្នកបរទេសហ្នឹងទៅវិញ?
អាន ឆៃយ៉ា ៖ «ខ្ញុំក៏ឆ្ងល់ដែរ ឆ្ងល់ថាតើខាងក្រុមហ៊ុនគេមាននាទីអី ក្នុងការចាប់ឲ្យប្រជាពលរដ្ឋបររទេះ នៅតាមផ្លូវហ្នឹង ខ្ញុំឆ្ងល់ប៉ុណ្ណឹង។ ប៉ុន្តែ អានេះនិយាយរួមវាជាតួនាទីខាងសមត្ថកិច្ចអាជ្ញាធរទេតើ ដែនដីអស់ហ្នឹង ប៉ុន្តែដោយសារមានការសម្បទានដីសេដ្ឋកិច្ច ឲ្យទៅ លី យ៉ុងផាត់ ដាំអំពៅដាំអី នៅចំណុចហ្នឹង ប៉ុន្តែមិនដឹងរាជរដ្ឋាភិបាលសម្បទានហ្នឹងទាំងផ្លូវដែរឬយ៉ាងម៉េច មិនដឹងដែរ»។
ហ៊ុយ វណ្ណៈ ៖ គាត់បររទេះហ្នឹង ធ្វើឲ្យខូចដំណាំ ឬក៏ខូចអីគេ បានជាគេផាកអ៊ីចឹង?
អាន ឆៃយ៉ា ៖ «អត់មានទេ។ ប្រជាពលរដ្ឋគាត់បររទេះទៅកាប់ឫស្សីពីព្រៃ មិនមែនទៅកាប់អំពៅ ឬបរកិនអំពៅរបស់ឯកឧត្ដមឧកញ៉ា លី យ៉ុងផាត់ នោះទេ អ៊ីចឹងខ្ញុំឆ្ងល់ថា ការចាប់ឬឃាត់ទារប្រាក់ ពីប្រជាពលរដ្ឋហ្នឹង ហ្នឹងជាតួនាទីខាងណាខ្ញុំអត់ដឹងដែរ»។
ហ៊ុយ វណ្ណៈ ៖ ប៉ុន្តែប្រជាពលរដ្ឋគាត់បរកាត់ដីគេ ឬក៏គាត់ទៅកាប់ឫស្សី ក្នុងដីឧកញ៉ា លី យ៉ុងផាត់?
អាន ឆៃយ៉ា ៖ «និយាយរួមទៅ ដីរបស់ឧកញ៉ា លី យ៉ុងផាត់ គាត់ដាំអំពៅ មិនមែនដាំឫស្សីទេ។ គាត់ដាំអំពៅ ដូច្នេះរឿងបញ្ហាឫស្សីស្ថិតនៅព្រៃផ្សេង ខាងមុនឯណោះទេ ប៉ុន្តែតាមផ្លូវពីមុនមក គឺជាផ្លូវរបស់ប្រជាពលរដ្ឋប្រើប្រាស់តាមតំបន់ហ្នឹង ដល់ពេលឥឡូវក្រុមហ៊ុនដាំអំពៅទៅដាំនៅក្នុងចំណុចហ្នឹង ប៉ុន្តែប្រជាជនឆ្លងកាត់ផ្លូវហ្នឹងដែរ ប៉ុន្តែថាបើសិនជាប្រជាជនឆ្លងកាត់ ត្រូវសុំពីខាងសន្តិសុខក្រុមហ៊ុន»។
ហ៊ុយ វណ្ណៈ ៖ ឆ្លងកាត់ហ្នឹងមានចម្ការអំពៅហើយឬនៅ ឬក៏ដីទទេ? អាន ឆៃយ៉ា ៖ «ចម្ការអំពៅមានហើយ ផ្លូវវាមានតាំងពីមុនចម្ការអំពៅទៀត»។
ហ៊ុយ វណ្ណៈ ៖ ចុះឥឡូវនៅសល់ ៣រទេះទៀត យ៉ាងម៉េចដែរ?
អាន ឆៃយ៉ា ៖ «មិនទាន់ធ្វើការដោះស្រាយទេ ឥឡូវហ្នឹង កំពុងពិភាក្សាគ្នា តើពឹងពាក់ឲ្យអាជ្ញាធរភូមិឃុំ ទៅជួយធ្វើការសម្របសម្រួលដោះស្រាយ ប៉ុន្តែឥឡូវមិនទាន់បានដោះស្រាយ។ គាត់ទើបចេញពីពួកខ្ញុំទៅអម្បាញ់មិញដែរ»។
វិទ្យុអាស៊ីសេរី នៅមិនទាន់មានប្រតិកម្មពីក្រុមឆ្មាំសន្តិសុខរបស់លោកឧកញ៉ា លី យ៉ុងផាត់ ចំពោះរឿងចាប់រទេះគោក្របីអ្នកស្រុកនិងការបង្ខំទារប្រាក់នោះ៕