ឌុច បានថ្លែងនៅក្នុងការជំនុំជម្រះក្ដីនាថ្ងៃពុធ ទី២២ ខែមេសានេះទៀតថា កាលណោះ មន្ត្រីនៃអង្គការសហប្រជាជាតិ គឺលោក Christophe Peschoux បានទៅជួបគាត់នៅឯបាត់ដំបង។
បន្ទាប់ពីសាកសួរគាត់រួចនាល្ងាចថ្ងៃទី៣ ខែឧសភា ឆ្នាំ១៩៩៩ មន្ត្រីនោះប្រាប់ថា ចង់ឲ្យគាត់ចេញទៅប្រទេសប៊ែលហ្ស៊ិក ៖ «Peschoux (ប៉េស្សូ) ... គេប្រាប់ខ្ញុំថា Peschoux បានរត់ចុះរត់ឡើងពេញមួយសកលលោកដើម្បីឲ្យខ្ញុំទៅសុំជ្រកកោន ដើម្បីឲ្យខ្ញុំទៅជ្រកកោនក្នុងឋានៈជាជនភៀសខ្លួននយោបាយ ហើយដល់ចុងបញ្ចប់គេថា រកមិនបាន ឥឡូវទៅជាប់គុកនៅប៊ែលហ្ស៊ិកទៅ។ ខ្ញុំហួសចិត្ត។ ដល់អ៊ីចឹងខ្ញុំសួរទៅវិញ ខ្ញុំថាទៅប៊ែលហ្ស៊ិកហ្នឹង បើសិនជាគេកាត់ទោសខ្ញុំមិនដល់មួយជីវិត ខ្ញុំនៅសល់ទោសខ្លះត្រឡប់មកវិញ ខ្ញុំបានលុយឯណាជិះកប៉ាល់ហោះ?»។
ឌុច បន្តថា នៅគ្រានោះ គាត់ក៏បានព្យាយាមបដិសេធសំណើនោះផងដែរ ៖ «ក៏ប៉ុន្តែគេនៅតែបង្ខំចិត្តឲ្យខ្ញុំទៅ ឲ្យលុយខ្ញុំ ៥០ដុល្លារ ឲ្យខ្ញុំជិះឡានទៅ ឲ្យខ្ញុំចេញទៅហួសប៉ោយប៉ែតទៅ ទៅឲ្យប៉ូលិសអន្តរជាតិចាប់ខ្ញុំនៅទីហ្នុង ហើយគេបញ្ជូនទៅប៊ែលហ្ស៊ិកតាមរយៈហ្នឹង។ ខ្ញុំហួសចិត្ត»។
ហើយ ឌុច ចោទថាអ្វីដែលមន្ត្រីអង្គការសហប្រជាជាតិធ្វើនោះ គឺមិនត្រឹមត្រូវទេ ៖ «ប៉េស្សូ ធ្វើដូចចោរអ៊ីចឹង។ ប្រទេសគេមានអធិបតេយ្យ ម៉េចមិនឯកភាពគ្នាជាមួយរដ្ឋាភិបាលសិន? នេះជាសេចក្ដីសន្និដ្ឋានរបស់ខ្ញុំ។ បើខ្ញុំមានទោសត្រឹមតែសន្និដ្ឋាន សុំទទួលទោស»។
លោក Christophe Peschoux មិនទាន់អាចទាក់ទងដើម្បីបំភ្លឺរឿងដែល ឌុច ទម្លាយចេញនោះនៅឡើយទេ។
សូមជម្រាបថា កាលឆ្នាំ១៩៩៩ លោក Christophe Peschoux បានធ្វើការងារក្នុងប្រទេសកម្ពុជា ដោយមានតួនាទីជាប្រធានអង្គភាពឃ្លាំមើលនិងការពារសិទ្ធិមនុស្សនៃការិយាល័យឧត្តមស្នងការនៃអង្គការសហប្រជាជាតិទទួលបន្ទុកសិទ្ធិមនុស្សប្រចាំប្រទេសកម្ពុជា ហើយបច្ចុប្បន្នលោកគឺជាប្រធានការិយាល័យអង្គការសហប្រជាជាតិខាងលើនោះ។
អ្នកស្រាវជ្រាវខ្មែរមួយរូបដែលបានដឹងរឿងនោះ បានថ្លែងថា អ្វីដែល ឌុច លើកឡើង គឺជារឿងមិនត្រឹមត្រូវទាំងស្រុងទេ។
កាំង ហ្កេកអ៊ាវ ហៅ ឌុច ធ្លាប់ជាមេគុកទួលស្លែងនៃរបបខ្មែរក្រហម។ បន្ទាប់ពីការដួលរលំរបបខ្មែរក្រហម ឌុច បានរស់នៅភាគពាយ័ព្យនៃប្រទេសកម្ពុជាដោយប្តូរឈ្មោះ ថា ហង់ ពិន។
ឌុច ត្រូវអាជ្ញាធរខ្មែរចាប់ខ្លួនក្នុងឆ្នាំ១៩៩៩ ហើយបច្ចុប្បន្នត្រូវសាលាក្តីវិសាមញ្ញកំពុងបន្តជំនុំជម្រះរឿងក្តីដែលគាត់ទទួលខុសត្រូវលើការសម្លាប់មនុស្សក្នុងរបបខ្មែរក្រហម៕