មន្ត្រីអ.ស.ប.បដិសេធថាគ្មានការប៉ុនប៉ងនាំ ឌុច ចេញពីកម្ពុជាទេ
ដោយ ហ៊ុយ វណ្ណៈ
2009-06-25
មន្ត្រីអង្គការសហប្រជាជាតិ (អ.ស.ប.) បានបដិសេធថា គ្មានការប៉ុនប៉ងនាំខ្លួនអតីតមេខ្មែរក្រហមម្នាក់ឈ្មោះ កាំង ហ្កេកអ៊ាវ ហៅ ឌុច ឲ្យភៀសខ្លួនចេញពីប្រទេសកម្ពុជាទៅកាន់ប្រទេសប៊ែលហ្ស៊ិកនោះឡើយ ហើយថា ឌុច បានថ្លែងប្រឌិតរឿងនេះ។
នៅក្នុងបទសម្ភាសន៍ជាមួយវិទ្យុអាស៊ីសេរីនាព្រឹកថ្ងៃពុធ លោក ស៊ូរីយ៉ា ស៊ូបេឌី ជាអ្នករាយការណ៍ពិសេសបស់អង្គការសហប្រជាជាតិប្រចាំប្រទេសកម្ពុជាអំពីសិទ្ធិមនុស្សដែលទើបបានតែងតាំងថ្មីថ្លែងថា លោកបានសួរលោក Christophe Peschoux រួចហើយ អំពីរឿងដែល ឌុច បានចោទថា លោក Peschoux ជាអ្នកជួយរៀបចំឲ្យ ឌុច ភៀសខ្លួនចេញពីប្រទេសកម្ពុជាកាលពីឆ្នាំ១៩៩៩នោះ។
លោក ស៊ូរីយ៉ា ស៊ូបេឌី ថ្លែងយ៉ាងដូច្នេះថា ៖ «ខ្ញុំមិនយល់ថា គាត់ធ្វើរឿងហ្នឹងដើម្បីរឿងអ្វីនោះទេ អ៊ីចឹងវាមានការពិបាកណាស់សម្រាប់ខ្ញុំក្នុងការយល់អំពីរឿងនេះ ប៉ុន្តែពិតណាស់ លោក ប៉េសូ បដិសេធការចោទទម្លាក់កំហុសលើគាត់នោះ។ ខ្ញុំបានស្ដាប់ប្រសាសន៍លោកនាយករដ្ឋមន្រ្តី ហ៊ុន សែន ហើយខ្ញុំក៏បានស្ដាប់លោក ប៉េសូ ដែរ នៅលើទិដ្ឋភាពនៃព័ត៌មានទាំងនេះ ខ្ញុំនឹងយកទៅពិចារណាដើម្បីធ្វើអនុសាសន៍ឲ្យបានត្រឹមត្រូវ»។
សូមជម្រាបថា កាលពីថ្ងៃទី២២ ខែមេសា អតីតមេគុកទួលស្លែង កាំង ហ្កេកអ៊ាវ ហៅ ឌុច បានថ្លែងជាសាធារណៈក្នុងសាលាក្តីខ្មែរក្រហមថា លោក Christophe Peschoux បានទៅជួបគាត់នៅឯខេត្តបាត់ដំបង ហើយប្រាប់គាត់ឲ្យភៀសខ្លួនចេញពីប្រទេសកម្ពុជាទៅកាន់ប្រទេសថៃដើម្បីទៅជ្រកកោននៅឯប្រទេសប៊ែលហ្ស៊ិកក្នុងឋានៈជាជនភៀសខ្លួននយោបាយ។
នៅក្នុងជំនួបនាពេលថ្មីៗនេះដែរ លោកនាយករដ្ឋមន្ត្រី ហ៊ុន សែន ក៏បានស្នើឲ្យលោក ស៊ូរីយ៉ា ស៊ូបេឌី សើរើអំពីរឿងនេះដើម្បីបញ្ជាក់ការពិតនិងបញ្ជូនឯកសារពាក់ព័ន្ធករណីនេះទៅស្ថាប័នសិទ្ធិមនុស្សនៅទីក្រុងហ្សឺណែវ ប្រទេសស្វ៊ីសផងដែរ។
លោក ស៊ូរីយ៉ា ស៊ូបេឌី ថ្លែងបន្តថា លោក Christophe Peschoux នឹងសហការជាមួយមន្ត្រីរដ្ឋាភិបាលខ្មែរដើម្បីបន្តស្រាវជ្រាវរឿងនេះ ៖ «នៅពេលដែលខ្ញុំជួបជាមួយលោក ឱម យ៉ិនទៀង ជាទេសរដ្ឋមន្រ្តីនោះ គាត់មានប្រសាសន៍ថា គាត់ពិតជាចង់ជួបលោក Christophe Peschoux ដើម្បីជជែកឲ្យយល់គ្នាថាតើត្រូវចាត់ការរឿងនេះយ៉ាងដូចម្ដេច? ដូច្នេះខ្ញុំសង្ឃឹមថា នឹងមានកិច្ចសហការដ៏ល្អរវាងមន្រ្តីការិយាល័យយើងនៅទីនេះ និងមន្រ្តីរដ្ឋាភិបាលកម្ពុជា»។
កាលពីឆ្នាំ១៩៩៩ ឌុច រស់នៅដោយមានសេរីភាពនៅក្នុងខេត្តបាត់ដំបង បើទោះបីជាគេដឹងថា ឌុច ធ្លាប់ជាមេគុកទួលស្លែង ដែលទទួលខុសត្រូវលើការសម្លាប់រង្គាលមនុស្សប្រមាណ១ម៉ឺន៦ពាន់នាក់នាអំឡុងរបបខ្មែរក្រហមនោះក៏ដោយ។
កាលណោះដែរ លោក Christophe Peschoux គឺប្រធានអង្គភាពឃ្លាំមើលនិងការពារសិទ្ធិមនុស្សនៃការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំប្រទេសកម្ពុជា។
បច្ចុប្បន្ន លោកក៏កំពុងបន្តធ្វើការក្នុងប្រទេសកម្ពុជាក្នុងតួនាទីជាប្រធានការិយាល័យនៃអង្គការសហប្រជាជាតិដដែលនោះ៕
អត្ថបទដែលទាក់ទង
កម្ពុជាបកស្រាយរឿងចាប់ខ្លួននិងហាមថៃមិនឲ្យបញ្ជាចរាចរណ៍ជើងអាកាស
តំណាងបក្សសមរង្ស៊ីនៅអាមេរិកចេញសេចក្ដីថ្លែងការណ៍ថ្កោលទោសសភាខ្មែរ
គណៈកម្មការខ្មែរម្ចាស់ស្រុកនឹងរៀបចំកិច្ចប្រជុំស្ដីពីបញ្ហានៅកម្ពុជា
មន្ត្រីការបរទេសថៃឲ្យកម្ពុជាគោរពតាមកិច្ចព្រមព្រៀងពាណិជ្ជកម្ម
កម្ពុជាហាមបុគ្គលិកថៃមិនឲ្យចូលធ្វើការក្នុងក្រុមហ៊ុនត្រួតពិនិត្យជើងយន្តហោះ
កម្ពុជាមិនទាន់ទទួលលិខិតផ្លូវការស្នើសុំដោះលែងចារកម្មថៃនៅឡើយ
មន្រ្តីរដ្ឋាភិបាលបំភ្លឺពីបញ្ហាព្រំដែននិងការលើកអភ័យឯកសិទ្ធិសមរង្ស៊ី
ទស្សនៈនានាជុំវិញការលើកអភ័យឯកសិទ្ធិសមរង្ស៊ី
មន្ត្រីការទូតថៃត្រូវគេអនុញ្ញាតឲ្យចូលជួបជនជាប់ចោទពីបទចារកម្ម
សមាជិកអាស៊ានប្រជុំគ្នារកវិធានការប្រឆាំងឧក្រិដ្ឋកម្មឆ្លងដែន
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.