នៅមុនការចូលទៅសួរសុខទុក្ខនោះ លោក ស៊ូយ៉ា ស៊ូប៊ែឌី បានមានប្រសាសន៍ប្រាប់ក្រុមអ្នកកាសែតនៅថៃ្ងសៅរ៍ ២៣ មករានេះថា លោកនឹងចូលទៅសួរសុខទុក្ខដើម្បីចង់ដឹងមើលថា តើអ្នកកាសែតនៅក្នុងគុកនោះមានអ្វីត្រូវថ្លែងប្រាប់ឲ្យលោកដឹង។ លោករីករាយនឹងចូលជួបនៅល្ងាចថៃ្ងសៅរ៍នេះ នៅអគារម.១ ក្នុងគុកព្រៃស។
លោក ហង្ស ចក្រា ជាចាងហ្វាងកាសែតខែ្មរម្ចាស់ស្រុក ត្រូវបានតុលាការរាជធានីភ្នំពេញ កាត់ទោសឲ្យជាប់គុករយៈពេល១២ខែ និងផាកពិន័យជាប្រាក់ចំនួន៩លានរៀល កាលពីថៃ្ងទី២៦ ខែមិថុនា ឆ្នាំ២០០៩កន្លងទៅ ក្រោមបទផ្សាយព័ត៌មានមិនពិតនិងបរិហារកេរ្តិ៍ ដោយសារតែលោកបានចុះផ្សាយព័ត៌មានមួយចោទប្រកាន់ថា មន្រ្តីនិយមលោកឧបនាយករដ្ឋមន្រ្តី សុខ អាន ត្រូវបានចេញពីតំណែងនិងអត្ថបទនិយាយថា លោកនាយករដ្ឋមន្រ្តី ហ៊ុន សែន បំបែកសម្បុកមន្រ្តីពុករលួយនៅជុំវិញលោក សុខ អាន។
លោក រស់ សុឃិត ត្រូវបានតុលាការរាជធានីភ្នំពេញ បានកាត់ទោសឲ្យជាប់គុករយៈពេល២ឆ្នាំ ក្រោមបទផ្សាយព័ត៌មានមិនពិតកាលពីថៃ្ងទី៦ ខែវិច្ឆិកា ឆ្នាំ២០០៩កន្លងទៅ ដោយសារតែលោកបានផ្ញើសារតាមទូរស័ព្ទដៃទៅលោក សយ សុភាព ជាអ្នកយកព័ត៌មានរបស់ទូរទស្សន៍ CTN ដើម្បីសាកសួរជុំវិញអំពើពុករលួយនិងជំរិតទារប្រាក់៕