អ.ស.ប.អំពាវនាវឲ្យអាជ្ញាធររតនគិរីបញ្ឈប់ការយាយីដល់សកម្មជនសិទ្ធិមនុស្សនិងអ្នកសារព័ត៌មាន
ដោយ ហ្សាការីយ៉ា
2009-09-15
ការិយាល័យនៃឧត្តមស្នងការទទួលបន្ទុកសិទ្ធិមនុស្សប្រចាំកម្ពុជានៃអង្គការសហប្រជាជាតិ (អ.ស.ប.) បានចេញសេចក្តីថ្លែងការណ៍មួយកាលពីពេលថ្មីៗនេះ ហៅការកោះហៅរបស់តុលាការខេត្តរតនគិរី ឲ្យអ្នកសារព័ត៌មានវិទ្យុអាស៊ីសេរី ចូលខ្លួនបំភ្លឺពីបទឃុបឃិតញុះញង់ ថាជាអំពើបំភិតបំភ័យនិងគំរាមកំហែងមកលើអ្នកកាសែត។
ការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា http://cambodia.ohchr.org/។
ប្រធានអង្គការសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា តុលាការខេត្តរតនគិរីបានកោះហៅអ្នកសារព័ត៌មានវិទ្យុអាស៊ីសេរី លោក រដ្ឋា វីសាល និងលោក ប៉ែន ប៊ុណ្ណារ៍ ដែលជាមន្រ្តីការពារសិទ្ធិមនុស្សនៃសមាគមអាដហុក ថាជារឿងមិនប្រក្រតី។
លោក អ៊ូ វីរៈ ថ្លែងយ៉ាងដូច្នេះ ៖ «ជាការព្យាយាមដើម្បីគំរាមកំហែងដល់ការងាររបស់អង្គការសង្គមស៊ីវិល និងការផ្សព្វផ្សាយនូវព័ត៌មានទាំងអស់នេះ ដូច្នេះប្រហែលជាអាចមានព័ត៌មានមួយចំនួនដែលចៅក្រមទាក់ទងករណីនេះ ព្យាយាមដើម្បីបិទបាំង»។
ក្នុងសេចក្តីថ្លែងការណ៍ខាងលើ បានអំពាវនាវម្តងទៀតបញ្ឈប់នៃការយាយីនិងគំរាមកំហែងចំពោះអ្នកសារព័ត៌មាននិងសកម្មជនសិទ្ធិមនុស្ស ហើយសុំឲ្យពិភាក្សាគ្នាដោយសន្តិវិធីជាមួយសហគមន៍មូលដ្ឋានដែលពាក់ព័ន្ធនឹងដីធ្លីប្រសើរជាង ដើម្បីដោះស្រាយវិវាទទាំងនោះតាមផ្លូវច្បាប់និងយុត្តិធម៌ដែលមានចែងក្នុងច្បាប់។
លោក រដ្ឋា វីសាល ដែលជាអ្នកយកព័ត៌មានវិទ្យុអាស៊ីសេរីប្រចាំខេត្តរតនគិរី បានឲ្យដឹងថា ចៅក្រមស៊ើបអង្កេតខេត្តរតនគិរី លោក ថោ សារ៉ន បានចេញដីកាកោះហៅលោកកាលពីថ្ងៃទី៧ ខែកញ្ញានេះ ថាជារឿងកំហឹងផ្ទាល់ខ្លួននិងជាការគំរាមកំហែង ៖ «គាត់ខឹងខ្ញុំពីរឿងផ្សាយព័ត៌មានតែម្ដង គាត់គួរតែប្ដឹងខ្ញុំពីរឿងផ្សាយដំណឹងមិនពិត តែគាត់យកអំណាចគាត់ក្នុងនាមជាចៅក្រមស៊ើបអង្កេតមកកោះហៅយើង ដើម្បីធ្វើការគំរាមកំហែងស្មារតីយើង ដើម្បីជាការតថ្លៃកុំឲ្យយើងហ៊ានសរសេររឿងគាត់ទៀត»។
វិទ្យុអាស៊ីសេរីមិនអាចទាក់ទងសុំការបំភ្លឺពីចៅក្រមស៊ើបអង្កេតខេត្តរតនគិរី លោក ថោ សារ៉ន តាមទូរស័ព្ទបានទេនៅថ្ងៃទី១៤ កញ្ញា។
លោក រដ្ឋា វីសាល បានបញ្ជាក់ថា លោក ថោ សារ៉ន បានចេញដីកាកោះហៅលោក គឺនៅបន្ទាប់ពីលោកបានផ្សាយព័ត៌មានចុងក្រោយកាលពីពេលថ្មីៗ អំពីលោកចៅក្រមរូបនេះបានស្នើសុំដីចំនួន១០០ហិកតារក្នុងស្រុកលំផាត់ដើម្បីចិញ្ចឹមគោ ប៉ុន្តែបែរជាមានដីកាកោះហៅលោកពីបទឃុបឃិតក្នុងការញុះញង់ជនជាតិដើមភាគតិចព្នងដែលមានជម្លោះដីជាមួយក្រុមហ៊ុន D.M. Group ដែលជាប់គាំងតាំងពីយូរនោះមកវិញ។
សេចក្តីថ្លែងការណ៍ខាងលើរបស់ការិយាល័យឧត្ដមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្សនៅកម្ពុជា បានឲ្យដឹងទៀតថា ការចេញដីកាកោះហៅនេះ គឺជាលេសមួយដើម្បីគំរាមកំហែងបន្ថែមទៀតដល់អ្នកទាំងពីរខាងលើ ហើយក៏ជាការយាយីដល់អ្នកការពារសិទ្ធិមនុស្សដទៃទៀត និងសហគមន៍មូលដ្ឋានក្នុងការការពារសិទ្ធិរបស់ពួកគេប្រឆាំងនឹងអំពើរំលោភដីធ្លីនៅតំបន់នោះ ដែលកំពុងកក្រើកឡើង។
លោក អ៊ូ វីរៈ បានបញ្ជាក់ទៀតថា លោកបានដាក់លិខិតទៅក្រុមប្រឹក្សានៃអង្គចៅក្រមរួចហើយ ដើម្បីសុំឲ្យស៊ើបអង្កេតអំពីករណីខាងលើ៕
អត្ថបទដែលទាក់ទង
ទីភ្នាក់ងារព័ត៌មានកម្ពុជានិងវៀតណាមបង្កើនកិច្ចសហប្រតិបត្តិការ
អ្នកកាសែតជាប់ឃុំម្នាក់បន្តប្ដឹងឧទ្ធរណ៍ក្នុងរឿងក្ដីជាមួយសយសុភាព
មន្រ្តីជាន់ខ្ពស់ខ្មែរខ្វែងគំនិតគ្នាក្នុងការលើកលែងទោស ហង្ស ចក្រា
ព្រះមហាក្សត្រស្នើសុំឲ្យពិនិត្យមើលលទ្ធភាពក្នុងការដោះលែង ហង្ស ចក្រា
អតីតអ្នកកាសែតម្នាក់ត្រូវផ្តន្ទាទោសឲ្យជាប់គុក២ឆ្នាំពីបទផ្សាយព័ត៌មានមិនពិត
កាសែតសេរីភាពថ្មីផ្អាកការបោះពុម្ពផ្សាយព្រោះបញ្ហាថវិកា
សង្គមស៊ីវិលអំពាវនាវឲ្យអ្នកកាសែតប្រុងប្រយ័ត្នក្នុងការសរសេរព័ត៌មាន
អ្នកកាសែតម្នាក់ត្រូវឃាត់ខ្លួនពីបទផ្សាយព័ត៌មានមិនពិត
ក្រុមអ្នកកាសែតជួបពិភាក្សាអំពីក្រមសីលធម៌អ្នកសារព័ត៌មាន
